Fó ajuda ba ema neʼebé hasoru dezastre

Iha tinan 2020, akontese dezastre naturais oioin no mosu pandemia COVID-19. Oinsá Testemuña ba Jeová ajuda ema neʼebé hetan impaktu husi buat sira-neʼe?

Durante tinan serbisu nian tinan 2020,a Komisaun Koordenadór husi Grupu Administradór aprova organizasaun atu uza dolar millaun 28b atu ajuda ema neʼebé hasoru dezastre. Ida-neʼe ajuda vítima sira husi dezastre 200 liu, inklui pandemia COVID-19, anin-fuik oioin, bee-saʼe iha Áfrika, rai-hamlaha iha rai-Venezuela no bailoro naruk iha rai-Zimbabué. Kontribuisaun neʼebé ema fó uza ba sosa hahán, bee, hela-fatin, roupa no presiza médiku no mós sasán neʼebé uza atu hamoos, hadiʼa no halo konstrusaun. Haree toʼok ezemplu balu kona-ba oinsá organizasaun fó ajuda ba ema neʼebé hasoru dezastre.

COVID-19. Iha mundu tomak, pandemia COVID-19 fó impaktu ba irmaun-irmán sira iha dalan fíziku, emosaun no ekonómiku. Atu ajuda sira, organizasaun forma Komisaun ba Dezastre hamutuk 800 liu iha mundu tomak. Komisaun sira-neʼe buka-hatene kona-ba irmaun-irmán sira-nia presiza no prepara relatóriu sira neʼebé ajuda Komisaun Koordenadór atu hatene oinsá atu fó ajuda.

Durante tinan neʼe, Komisaun ba Dezastre ajuda ema barak atu hetan hahán, bee, sasán balu neʼebé uza atu mantein ijiene, no ai-moruk. Iha área balu, Komisaun ba Dezastre mós serbisu hamutuk ho katuas kongregasaun lokál atu ajuda irmaun-irmán sira simu ajuda husi governu.

Organizasaun balu neʼebé mós fó ajuda kuandu dezastre mosu, nota serbisu neʼebé ita halo. Porezemplu, iha rai-Zámbia, xefe distritál ba Nakonde naran Field Simwinga hatete ba irmaun sira: “Ami agradese tebes ba ajuda neʼebé imi fó iha tempu neʼebé loos ba família sira neʼebé hasoru susar.”

Rai-hamlaha iha rai-Angola. Tanba pandemia COVID-19, hahán sai menus iha rai-Angola no hahán nia folin mós saʼe makaʼas. Ita-nia irmaun-irmán barak sente susar atu sosa hahán.

Sukursál iha rai-Brazíl hetan knaar atu ajuda haruka hahán ba irmaun-irmán sira iha rai-Angola. Atu bele uza didiʼak osan kontribuisaun, irmaun-irmán sira buka-hatene kona-ba produtu hahán sira no dalan diʼak atu haruka no tuirmai sira sosa barak tiha kedas. Tuirmai irmaun-irmán sira fahe hahán sira-neʼe ba falun barak. Falun ida-idak nia todan mak besik kilograma 20 no inklui hahán hanesan foos, koto, no mina. Osan neʼebé gasta atu sosa no haruka falun ida-idak mak maizumenus dolar 22. Toʼo ohin loron, sira haruka ona hahán hamutuk falun 33.544, no sasán sira-neʼe nia todan mak hamutuk tonelada 721. Hahán neʼe tau hamutuk ho produtu hahán lokál, no fó han ema naʼin-50.000 liu.

Ita-nia irmaun-irmán sira sente oinsá kona-ba arranju neʼe? Irmaun Alexandre neʼebé hela iha área izoladu iha rai-Angola hatete: “Haʼu bele haree katak Jeová hadomi haʼu no haʼu la mesak. Jeová nia organizasaun hafolin haʼu!” Irmán Mariza neʼebé haboot oan mesak deʼit hatete: “Jeová rona haʼu-nia orasaun. Haʼu sente agradese tebes ba Jeová no nia organizasaun.”

Bailoro naruk iha rai-Zimbabué. Durante tinan serbisu nian tinan 2020, rai-Zimbabué hasoru bailoro naruk no rezultadu mak ema millaun ba millaun terus tanba rai-hamlaha. Testemuña rihun ba rihun ladún iha hahán.

Organizasaun forma Komisaun ba Dezastre lima atu ajuda fó hahán ba irmaun-irmán sira. Irmaun-irmán atus ba atus mak ajuda atu haloot hahán, hatama ba karreta sira ka fó empresta sira-nia karreta atu tula hahán sira-neʼe.c Durante tinan serbisu nian tinan 2020, organizasaun uza dolar 691.561 atu ajuda fó han ba ema naʼin-22.700 liu.

Iha situasaun balu, irmaun-irmán sira-nia hahán hotu ona bainhira sira simu ajuda. Bainhira hahán toʼo iha sira-nia fatin, irmaun-irmán sira fó hahiʼi ba Jeová. Irmaun-irmán balu komesa kanta knananuk reuniaun nian.

Iha área ida, irmán faluk rua tuir enkontru neʼebé komunidade organiza atu koʼalia kona-ba hahán neʼebé Organizasaun Naun Goveramentál (ONG) planu atu fó ba komunidade. Maibé iha enkontru neʼe, ema komesa kahur asuntu neʼe ho buat polítiku. Tan neʼe, irmán naʼin-rua neʼe la konkorda ho buat neʼebé sira presiza halo atu bele simu ajuda neʼe. Bainhira sira sai husi enkontru neʼe, ema goza sira no hatete: “Keta mai buka hahán husi ami!” Maibé semana rua liutiha, irmaun-irmán sira toʼo ona área neʼe no fó irmán sira-neʼe hahán neʼebé sira presiza. Irmaun-irmán sira-neʼe fó ajuda antes ONG konsege fó ajuda.

Ajuda neʼebé irmaun-irmán sira fó mós fó sasin diʼak. Porezemplu, hanoin toʼok esperiénsia ida husi Prisca neʼebé hela iha knua kiʼik. Maski hasoru situasaun susar tanba bailoro naruk, maibé Prisca nafatin haklaken iha loron-kuarta no sesta semana-semana, inklui mós tempu atu halo toʼos. Ema iha ninia knua goza nia hodi dehan: “Ó-nia família sei hamlaha deʼit tanba ó haklaken.” Prisca hatán: “Jeová nunka husik ninia atan sira.” Lakleur deʼit, nia simu hahán husi ita-nia organizasaun. Ida-neʼe book viziñu balu nia laran, no sira hatete ba Prisca: “Maromak nunka husik ó, tan neʼe ami hakarak aprende liután kona-ba nia.” Agora ninia viziñu naʼin-hitu rona ba reuniaun sira neʼebé fó sai liuhusi rádiu.

Nuʼudar mundu nia rohan sai besik daudaun, ita sei kontinua hasoru dezastre naturais. (Mateus 24:3, 7) Ami hafolin tebes imi-nia kontribuisaun neʼebé imi fó ho laran-luak liuhusi dalan oioin neʼebé temi iha donate.jw.org. Kontribuisaun sira-neʼe sei ajuda ema sira neʼebé hasoru daudaun susar.