Irmaun-irmán nia ezemplu ajuda haʼu

Haʼu moris iha Sidade Kebeke, iha provínsia ida naran Kebeke iha rai-Kanadá no ema iha fatin neʼe koʼalia língua Fransés. Haʼu-nia inan-aman, Louis no Zélia mak laran-diʼak no hadomi haʼu. Haʼu-nia apá moedór no gosta lee. Haʼu gosta hakerek no haʼu hakarak atu sai jornalista.

Bainhira haʼu maizumenus tinan 12, apá nia kolega serbisu naran Rodolphe Soucy no ninia kolega vizita ami. Sira mak Testemuña ba Jeová. Haʼu ladún hatene kona-ba Testemuña no ladún interese ba sira-nia relijiaun. Maibé, haʼu admira sira tanba ho laran-diʼak no matenek sira hatán ba ami-nia pergunta hodi uza Bíblia. Haʼu-nia inan-aman mós admira sira, tan neʼe mak ami estuda Bíblia.

Iha tempu neʼebá, haʼu tuir eskola Katólika. Dala ruma, haʼu koʼalia ba kolega eskola kona-ba buat neʼebé haʼu aprende husi Bíblia. Ikusmai, padre sira neʼebé hanorin ami, hatene kona-ba neʼe. Duké uza Eskritura atu hatudu katak haʼu sala, padre ida duun haʼu nuʼudar kontradór iha klase nia oin. Maski susar, maibé ida-neʼe mak bensaun ida tanba haʼu bele haree katak matéria relijiaun iha eskola neʼe la bazeia ba Bíblia. Haʼu sente katak haʼu tenke sai husi eskola neʼe. Haʼu-nia família fó lisensa mai haʼu atu muda eskola.

APRENDE ATU GOSTA SERBISU HAKLAKEN

Haʼu kontinua estuda Bíblia, maibé haʼu ladún laʼo ba oin tanba haʼu taʼuk atu haklaken uma ba uma. Igreja Katólika iha influénsia boot no kontra makaʼas serbisu haklaken. Maurice Duplessis mak administradór iha Kebeke no nia iha relasaun metin ho igreja. Ho ninia apoia, ema-lubun haterus no ataka Testemuña. Iha tempu neʼebá presiza duni aten-brani atu haklaken.

Irmaun ida naran John Rae neʼebé tuir Eskola Gilead klase sia, ajuda haʼu atu la sai taʼuk. Irmaun John iha esperiénsia barak, nia laran-diʼak, haraik an no fasil atu hakbesik. Nia ladún fó konsellu kedas mai haʼu maibé haʼu aprende buat barak husi ninia ezemplu diʼak. Irmaun John ladún hatene língua Fransés, tan neʼe dala barak haʼu akompaña nia atu haklaken no ajuda nia aprende língua Fransés. Hodi uza tempu hamutuk ho irmaun John, neʼe ajuda haʼu atu sai Testemuña ba Jeová. Haʼu hetan batizmu iha 26 Maiu 1951, neʼe mak tinan sanulu depois Testemuña sira vizita ami.

Ami-nia kongregasaun kiʼik iha Sidade Kebeke iha pioneiru barak. Sira-nia ezemplu diʼak motiva haʼu atu sai pioneiru. Iha tempu neʼebá, ami uza deʼit Bíblia bainhira haklaken uma ba uma. Tanba la iha publikasaun, ami presiza uza Eskritura sira ho didiʼak. Tan neʼe, haʼu hakaʼas an atu buka-hatene eskritura sira neʼebé ajuda haʼu atu defende lia-loos. Maski nuneʼe, ema barak lakohi atu lee Bíblia se igreja Katólika la aprova versaun Bíblia neʼe.

Iha tinan 1952, haʼu kaben ho irmán laran-metin ida naran Simone Patry. Ami muda ba Montreál, no liutiha tinan ida, ami iha oan-feto ida naran Lise. Maski haʼu presiza para pioneiru lakleur antes kaben, maibé Simone no haʼu kontinua hakaʼas an atu halaʼo moris simples hodi ami bele halo buat barak iha kongregasaun nuʼudar família.

Tinan sanulu liutiha, haʼu komesa hanoin atu aumenta haʼu-nia serbisu haklaken. Iha tinan 1962, bainhira tuir Eskola ba Katuas no Atan ba Kongregasaun durante fulan ida iha Betel Kanadá, haʼu hela iha kuartu ida hamutuk ho irmaun Camille Ouellette. Haʼu admira tebes nia tanba nia laran-manas atu haklaken, liuliu tanba nia mós iha feen no oan sira. Iha tempu neʼebá iha Kebeke, iha inan-aman uitoan deʼit mak serbí nuʼudar pioneiru no mós tau matan ba oan sira, maibé neʼe mak Camille nia planu. Durante ami hamutuk, nia anima haʼu atu hanoin kona-ba haʼu-nia situasaun. Fulan balu liutiha, haʼu haree katak haʼu bele serbí fali nuʼudar pioneiru regulár. Ema balu duvida se haʼu-nia desizaun neʼe mak matenek ka lae, maibé haʼu sai pioneiru no fiar metin katak Jeová sei haraik bensaun ba haʼu-nia hakaʼas an atu aumenta haʼu-nia serbisu haklaken.

FILA FALI BA SIDADE KEBEKE NUʼUDAR PIONEIRU TEMPU-TOMAK

Iha tinan 1964, Simone no haʼu simu knaar nuʼudar pioneiru tempu-tomak iha Sidade Kebeke, no ami serbí tinan barak iha fatin neʼe. Iha tempu neʼebá, maski ema barak la kontra ona ami, maibé sei iha ema balu nafatin kontra.

Iha sábadu lokraik, polísia kaer haʼu iha Sainte-Marie, sidade kiʼik neʼebé besik Sidade Kebeke. Polísia ida lori haʼu ba postu polísia nian no hatama haʼu ba komarka tanba haʼu haklaken uma ba uma maski la iha lisensa. Ikusmai, sira lori haʼu ba juís ida naran Baillargeon, ninia oin halo ita taʼuk. Nia husu sé mak haʼu-nia advogadu. Bainhira haʼu temi Testemuña nia advogadu neʼebé koñesidu naran Glen How,a nia sai taʼuk tebes. Iha tempu neʼebá, irmaun Glen hetan susesu barak atu defende Testemuña ba Jeová. Lakleur deʼit tribunál fó-hatene katak haʼu-nia kazu taka ona.

Tanba ema kontra serbisu haklaken iha Kebeke, susar ba ami atu aluga fatin hodi halaʼo reuniaun sira. Ami-nia kongregasaun kiʼik bele aluga deʼit armazén tuan neʼebé malirin tebes. Atu bele sente manas durante tempu malirin, irmaun sira uza mákina atu halo manas fatin neʼe. Dala barak ami tuur haleʼu ida-neʼe ba oras balu antes reuniaun hodi fahe esperiénsia neʼebé ajuda ami sai aten-brani.

Haʼu kontente atu haree serbisu haklaken laʼo ba oin. Iha tinan 1960, iha Sidade Kebeke, Côte-Nord, no mós Gaspé Peninsula iha kongregasaun balu deʼit. Ohin loron, iha kongregasaun barak, no irmaun-irmán sira halibur iha Reuniaun-Fatin neʼebé furak.

VIZITA KONGREGASAUN SIRA

Iha tinan 1970, haʼu no Simone simu konvite atu serbí nuʼudar katuas área. Tuirmai iha tinan 1973, ami simu knaar atu serbí nuʼudar katuas vizitante. Durante tinan sira-neʼe, haʼu aprende buat barak husi irmaun sira neʼebé iha esperiénsia hanesan irmaun Laurier Saumur no David Splane.b Sira naʼin-rua mós vizita kongregasaun sira. Depois reuniaun boot ida-idak, David no haʼu fó sujestaun ba malu kona-ba oinsá ami bele hanorin diʼak liután. Haʼu hanoin-hetan David hatete: “Léonce, haʼu gosta ó-nia diskursu ikus. Diskursu neʼe diʼak, maibé ó hatoʼo informasaun barak demais.” Haʼu toman uza informasaun barak demais. Haʼu presiza aprende atu hatoʼo informasaun importante deʼit.

Katuas vizitante nia knaar mak atu anima katuas área. Maibé, haklaken-naʼin barak iha Kebeke koñese haʼu. Tan neʼe dala barak sira hakarak atu haklaken ho haʼu. Haʼu kontente atu haklaken ho sira, maibé haʼu ladún uza tempu ho katuas área. Loron ida, katuas área ida fó-hanoin haʼu: “Diʼak tanba Ita uza tempu hamutuk ho irmaun-irmán sira, maibé keta haluha katak Ita mai atu vizita haʼu. Haʼu mós presiza hetan anima!” Konsellu neʼe ajuda haʼu.

Iha tinan 1976 buat ida mosu derrepente no neʼe triste tebes. Haʼu-nia feen Simone moras makaʼas no mate. Nia mak feen neʼebé diʼak tanba nia la hanoin an deʼit no hadomi tebes Jeová. Hodi sai okupadu atu haklaken, ajuda haʼu atu tahan haʼu-nia laran-triste, no haʼu agradese ba Jeová tanba nia apoia haʼu iha tempu susar neʼe. Depois neʼe haʼu kaben ho Carolyn Elliott. Nia mak irmán pioneiru neʼebé laran-manas no nia koʼalia Inglés, nia muda mai iha Kebeke tanba presiza haklaken-naʼin liután. Fasil ba ema atu hakbesik ba Carolyn no nia mós hatudu interese ba ema, liuliu ba sira neʼebé moedór ka mesamesak. Nia ajuda tebes haʼu bainhira nia akompaña haʼu atu vizita kongregasaun.

TINAN NEʼEBÉ IMPORTANTE

Iha fulan-Janeiru 1978, Eskola Serbisu Pioneiru halaʼo ba dala primeiru iha Kebeke no haʼu simu knaar atu hanorin eskola neʼe. Haʼu sente taʼuk tanba haʼu seidauk tuir eskola neʼe no seidauk haree livru ba eskola neʼe. Haʼu agradese tanba klase primeiru neʼe iha pioneiru barak neʼebé iha esperiénsia. Maski haʼu mak hanorin, maibé haʼu aprende buat barak husi estudante sira.

Depois neʼe, iha tinan 1978, iha reuniaun boot internasionál neʼebé halaʼo iha estádiu iha Montreál. Neʼe mak reuniaun boot neʼebé boot liu hotu iha Kebeke, no ema naʼin-80.000 mak asiste. Iha reuniaun boot neʼe, haʼu simu knaar atu koʼalia ho jornalista barak. Haʼu kontente atu haree notísias pozitivu kona-ba ita. Rádiu no televizaun fó sai entrevista maizumenus ba oras 20, no mós jornál atus ba atus fó sai notísias kona-ba ita. Neʼe fó sasin neʼebé diʼak tebes.

MUDA BA ÁREA SELUK

Depois serbí tiha iha Kebeke husi tempu neʼebé haʼu batizmu no koʼalia lian Fransés, iha tinan 1996 haʼu simu knaar foun atu serbí nuʼudar katuas vizitante iha Torontu no koʼalia lian Inglés. Neʼe mak mudansa boot. Haʼu sente ladún iha matenek no taʼuk atu hatoʼo diskursu tanba haʼu-nia Inglés la diʼak. Haʼu presiza halo orasaun beibeik no sadere ba Jeová.

Haʼu taʼuk atu serbí iha fatin foun neʼe, maibé haʼu kontente tebes hodi serbí iha Torontu durante tinan rua. Carolyn hatudu pasiénsia hodi ajuda haʼu la taʼuk koʼalia Inglés, no irmaun-irmán sira mós anima no apoia haʼu. Lakleur deʼit ami iha belun foun barak.

Baibain haʼu presiza halo buat oioin atu prepara ba reuniaun boot sira, maibé haʼu mós sempre uza oras ida ka liu iha sesta kalan atu haklaken uma ba uma. Ema balu karik hanoin: ‘Tanbasá bá haklaken antes reuniaun boot?’ Maski nuneʼe, hodi haklaken ba ema, ida-neʼe anima haʼu. Haʼu sempre sente kontente bainhira haklaken.

Iha tinan 1998, haʼu no Carolyn simu fali knaar atu serbí nuʼudar pioneiru tempu-tomak iha Montreál. Durante tinan barak, haʼu-nia knaar inklui organiza haklaken públiku no serbisu hamutuk ho média atu hadiʼa ema nia hanoin sala kona-ba Testemuña. Agora haʼu no Carolyn gosta haklaken ba ema estranjeiru neʼebé muda mai Kanadá no dala barak sira hakarak estuda Bíblia.

Haʼu kontente tebes bainhira hanoin kona-ba tinan 68 neʼebé haʼu adora Jeová. Haʼu kontente tebes tanba haʼu aprende atu gosta haklaken no ajuda ema barak hatene lia-loos. Depois haʼu-nia oan-feto Lise no ninia laʼen haboot tiha sira-nia oan, sira komesa serbí nuʼudar pioneiru regulár. Haʼu-nia laran kontente bainhira haree nia kontinua laran-manas atu haklaken. Haʼu agradese tebes ba maluk Kristaun sira neʼebé hatudu ezemplu diʼak no mós fó konsellu neʼebé ajuda haʼu atu iha relasaun diʼak ho Jeová no atu halaʼo knaar oioin ba Jeová. Haʼu komprende katak atu bele kontinua halaʼo ita-nia knaar ita presiza sadere ba Jeová nia espíritu santu neʼebé iha forsa boot. (Sal 51:11) Haʼu kontinua hatudu agradese ba Jeová tanba fó haʼu priviléjiu furak atu hahiʼi ninia naran.—Sal 54:6.