LISAUN ESTUDU 13
Hadomi malu tebetebes husi laran
“Hadomi malu tebetebes bá husi laran.”—1 PED 1:22.
KNANANUK 109 Hadomi malu tebetebes husi laran
IHA LISAUN NEʼEa
Iha Jesus nia kalan ikus hamutuk ho ninia apóstolu sira, nia fó-hatene katak importante tebes atu hatudu domin (Haree parágrafu 1-2)
1. Jesus fó mandamentu espesífiku saida ba ninia dixípulu? (Haree dezeñu iha livru oin.)
KALAN antes Jesus mate, nia fó mandamentu espesífiku ida ba ninia dixípulu sira. Nia hatete: “Hanesan haʼu hadomi ona imi, imi mós tenke hadomi malu.” Tuirmai nia hatutan tan: “Se imi hadomi malu, ema hotu sei hatene katak imi mak haʼu-nia dixípulu.”—João 13:34, 35.
2. Tanbasá importante atu hatudu domin ba malu?
2 Jesus hatete katak ema sei hatene ninia dixípulu sira neʼebé loos se sira hadomi ema seluk hanesan nia mós hadomi ema. Jesus nia liafuan neʼe aplika iha apóstolu sira-nia tempu no mós ohin loron. Tan neʼe importante tebes atu ita hatudu domin ba malu maski susar.
3. Iha lisaun neʼe, ita sei aprende kona-ba saida?
3 Tanba la perfeitu, neʼe halo susar ba ita atu hadomi malu tebetebes. Maski nuneʼe, ita tenke hakaʼas an atu banati-tuir Kristu. Iha lisaun neʼe, ita sei aprende oinsá domin bele ajuda ita atu buka dame, la todan ba sorin no hatudu laran-diʼak. Bainhira estuda lisaun neʼe, husu ba Ita-nia an: ‘Saida mak haʼu bele aprende husi irmaun-irmán sira neʼebé kontinua hatudu domin ba malu maski susar?’
BUKA DAME
4. Tuir Mateus 5:23, 24, tanbasá ita presiza buka dame ho irmaun ka irmán neʼebé hirus ita?
4 Jesus hanorin ita katak importante tebes atu buka dame ho irmaun ka irmán neʼebé hirus ita. (Lee Mateus 5:23, 24.) Nia hatete katak ita presiza kontinua iha relasaun diʼak ho ema seluk se ita hakarak halo Maromak kontente. Jeová kontente bainhira ita hakaʼas an atu buka dame ho irmaun-irmán sira. Nia lakohi simu ita-nia adorasaun se ita rai odi no la hakaʼas an atu buka dame.—1 João 4:20.
5. Tanbasá susar ba irmaun Mark atu buka dame?
5 Dala ruma susar atu buka dame. Tanbasá? Hanoin toʼok buat neʼebé akontese ba irmaun Mark.b Nia sente laran-kanek bainhira irmaun ida kritika nia no koʼalia buat aat kona-ba nia ba ema seluk iha kongregasaun. Saida mak irmaun Mark halo? Nia koʼalia ho hirus ba irmaun neʼe. Maibé depois neʼe, nia arrepende ninia hahalok no koko atu husu deskulpa ba irmaun neʼe no hadame malu fali. Maibé irmaun neʼe lakohi hadame malu. Foufoun irmaun Mark hanoin: ‘Nia lakohi buka dame, entaun tanbasá haʼu presiza kontinua hakaʼas an atu buka dame?’ Maibé, katuas área ida anima nia atu la rende an. Saida mak irmaun Mark halo?
6. (a) Oinsá mak irmaun Mark kontinua koko atu buka dame? (b) Oinsá mak irmaun Mark aplika Koloso 3:13, 14?
6 Irmaun Mark hanoin kona-ba ninia hahalok no nota katak dala ruma nia hanoin katak nia mak diʼak liu fali ema seluk. Nia rekoñese katak nia presiza troka ninia hahalok. (Kol 3:8, 9, 12) Ho haraik an nia hakbesik fali ba irmaun neʼe no husu deskulpa. Nia mós hakerek karta ba irmaun neʼe hodi husu deskulpa no husu atu sai belun fali. Nia mós fó prezente kiʼik neʼebé nia sente katak irmaun neʼe sei gosta. Triste mak irmaun neʼe kontinua rai odi. Maski nuneʼe, irmaun Mark kontinua halo tuir Jesus nia mandamentu atu hadomi no fó perdua ba ema seluk. (Lee Koloso 3:13, 14.) Maski irmaun ka irmán ida la simu ita-nia hakaʼas an atu buka dame, maibé domin neʼebé loos nuʼudar ema Kristaun sei ajuda ita atu kontinua fó perdua no halo orasaun atu hadame malu fali.—Mt 18:21, 22; Gal 6:9.
Se ema ruma hirus ita, karik ita presiza halo buat oioin hodi bele hadame malu fali (Haree parágrafu 7-8)c
7. (a) Jesus anima ita atu halo saida? (b) Situasaun susar saida mak irmán Lara hasoru?
7 Jesus anima ita atu kontinua halo ba ema hanesan ita hakarak sira halo ba ita. Jesus hatutan tan katak ita labele hadomi deʼit sira neʼebé hadomi ita. (Lc 6:31-33) Oinsá se ema ida iha kongregasaun hasees an husi Ita no lakohi kumprimenta Ita? Maski neʼe ladún akontese, maibé irmán Lara hasoru situasaun hanesan neʼe. Nia esplika: “Irmán ida la liga haʼu no haʼu la hatene tanbasá. Haʼu sente estrese no ladún gosta bá reuniaun.” Foufoun irmán Lara hanoin: ‘Haʼu la halo sala. No ema seluk iha kongregasaun mós sente katak irmán neʼe nia hahalok mak oin-seluk.’
8. Irmán Lara halo saida atu buka dame? Saida mak ita aprende husi ninia esperiénsia?
8 Irmán Lara halo buat ruma atu buka dame. Nia halo orasaun ba Jeová no deside atu koʼalia ho irmán neʼe. Sira koʼalia kona-ba problema neʼe, hakoʼak malu no hadame malu fali. Buat hotu laʼo ho diʼak. Irmán Lara hatete: “Maibé tuirmai, irmán neʼe hatudu fali hahalok hanesan uluk. Haʼu sente laran-kraik.” Foufoun irmán Lara sente katak nia bele sai kontente só deʼit se irmán neʼe troka ninia hahalok. Ikusmai irmán Lara rekoñese katak diʼak liu atu kontinua hadomi no perdua irmán neʼe. (Éf 4:32–5:2) Irmán Lara hanoin-hetan katak domin neʼebé loos nuʼudar ema Kristaun ajuda ita atu ‘la hanoin fali buat aat neʼebé ita simu. Domin lori todan hotu, fiar buat hotu, tau esperansa ba buat hotu, no tahan buat hotu’. (1 Kor 13:5, 7) Nia la hanoin barak tan kona-ba problema neʼe. Liutiha tempu balu, irmán neʼe habelun fali ho nia. Bainhira ita buka dame ho irmaun-irmán no kontinua hadomi sira, ita bele fiar katak ‘Maromak domin no dame nian sei hamutuk ho ita’.—2 Kor 13:11.
LA TODAN BA SORIN
9. Tuir Apóstolu 10:34, 35, tanbasá ita labele todan ba sorin?
9 Jeová la todan ba sorin. (Lee Apóstolu 10:34, 35.) Bainhira ita la todan ba sorin, ita hatudu katak ita mak Maromak nia oan. Ita halo tuir mandamentu atu hadomi ita-nia maluk hanesan ita-nia an rasik, no ita kontinua buka dame ho ita-nia irmaun-irmán sira.—Rom 12:9, 10; Tgo 2:8, 9.
10-11. Oinsá mak irmán Ruth manán hasoru ninia hanoin negativu?
10 La fasil atu la todan ba sorin. Porezemplu, hanoin toʼok buat neʼebé akontese ba irmán Ruth. Bainhira nia sei joven, ema ida husi nasaun seluk trata aat ninia família. Oinsá ida-neʼe afeta nia? Nia hatete: “Haʼu odi buat hotu kona-ba nasaun neʼe. Haʼu hanoin katak ema hotu husi nasaun neʼe mak hanesan deʼit, inklui mós irmaun-irmán sira.” Oinsá nia manán ninia hanoin negativu?
11 Irmán Ruth rekoñese katak nia tenke kontra hasoru ninia hanoin negativu. Nia lee esperiénsia sira no relatóriu kona-ba nasaun neʼe iha Buku Tahunan. Nia hatete: “Haʼu hakaʼas an atu iha hanoin pozitivu kona-ba ema husi nasaun neʼe. Haʼu komesa nota katak irmaun-irmán sira laran-manas atu halo Jeová nia serbisu. Haʼu komesa sente katak sira mós parte ba maluk Kristaun iha mundu tomak.” Neineik-neineik irmán Ruth rekoñese katak nia presiza halo buat seluk tan. Nia esplika: “Bainhira haʼu hasoru irmaun-irmán husi nasaun neʼe, haʼu hakaʼas an atu hatudu laran-diʼak ba sira. Haʼu koʼalia ho sira no koñese sira diʼak liután.” Rezultadu mak saida? Nia hatete: “Haʼu-nia hanoin negativu lakon tiha.”
Se ita hadomi tebes maluk fiar-naʼin hotu, ita sei la hatudu hahalok todan ba sorin (Haree parágrafu 12-13)d
12. Irmán Sarah iha problema saida?
12 Karik la ho neon, ema balu hatudu hahalok todan ba sorin. Porezemplu, irmán Sarah hanoin katak nia la todan ba sorin tanba nia la tesi-lia tuir deʼit ema nia rasa, rikusoin, ka knaar iha organizasaun. Maski nuneʼe, nia hatete: “Haʼu komesa nota katak haʼu todan ba sorin.” Iha dalan saida? Irmán Sarah boot iha família neʼebé iha edukasaun boot no nia gosta atu ransu deʼit ho ema sira neʼebé iha edukasaun boot. Loron ida nia hatete ba ninia belun ida: “Haʼu ransu deʼit ho maluk Kristaun neʼebé iha edukasaun boot. Haʼu hasees an husi ema seluk.” Klaru katak irmán Sarah presiza troka ninia hahalok. Oinsá?
13. Saida mak ita bele aprende husi mudansa neʼebé irmán Sarah halo?
13 Katuas área ida ajuda irmán Sarah atu analiza ninia hahalok. Irmán Sarah hatete: “Nia gaba haʼu tanba serbí Maromak ho laran-metin, fó komentáriu diʼak, no iha koñesimentu kona-ba Eskritura sira. Tuirmai nia esplika katak bainhira ita-nia koñesimentu aumenta, ita mós presiza haburas hahalok Kristaun hanesan haraik an no laran-sadiʼa.” Irmán Sarah aplika katuas área nia liafuan. Nia hatete: “Haʼu komprende katak buat neʼebé importante liu mak hatudu laran-diʼak no domin.” Rezultadu mak nia komesa haree irmaun-irmán sira iha dalan seluk. Nia esplika: “Haʼu koko atu komprende sira-nia hahalok neʼebé Jeová hafolin tebes.” Oinsá ho ita? Ita lakohi atu sente katak ita mak diʼak liu fali ema seluk tanba ita-nia edukasaun. Se ita hadomi tebes maluk fiar-naʼin hotu, ita sei la todan ba sorin.—1 Ped 2:17.
HATUDU LARAN-DIʼAK
14. Tuir Ebreu 13:16, Jeová sente oinsá bainhira ita hatudu laran-diʼak?
14 Jeová kontente bainhira ita hatudu laran-diʼak. (Lee Ebreu 13:16.) Ba Jeová, hahalok laran-diʼak mak parte ba ita-nia adorasaun, liuliu bainhira ita ajuda ema neʼebé presiza. (Tgo 1:27; 2:14-17) Tan neʼe, Eskritura anima ita atu “haburas toman atu simu ema ho laran-diʼak”. (Rom 12:13) Bainhira ita hatudu laran-diʼak, ita hatudu katak ita hanoin ema, hadomi ema no hakarak atu sai sira-nia belun. Jeová kontente bainhira ita fahe buat ruma ba ema atu han ka hemu, ka bainhira ita uza tempu hamutuk ho sira. (1 Ped 4:8-10) Maibé, dala ruma susar atu hatudu laran-diʼak.
“Uluk, haʼu ladún gosta atu hatudu laran-diʼak, maibé haʼu troka haʼu-nia hanoin no sente kontente liu” (Haree parágrafu 16)e
15-16. (a) Tanbasá ema balu karik dada an atu hatudu laran-diʼak? (b) Saida mak ajuda irmán Edit atu hatudu laran-diʼak?
15 Karik ita dada an atu hatudu laran-diʼak tanba ita-nia situasaun. Hanoin toʼok ezemplu husi feto-faluk ida naran Edit. Antes nia sai Testemuña, nia ladún gosta atu ransu ho ema. Nia sente katak ema seluk iha situasaun neʼebé diʼak liu atu hatudu laran-diʼak.
16 Depois sai Testemuña, irmán Edit troka ninia hanoin. Nia hakaʼas an atu hatudu laran-diʼak. Nia hatete: “Bainhira harii ami-nia Reuniaun-Fatin foun, katuas ida fó-hatene haʼu kona-ba feen-laʼen ida neʼebé mai atu ajuda projetu neʼe, no nia husu haʼu atu simu sira iha haʼu-nia uma ba semana rua. Haʼu hanoin-hetan oinsá Jeová haraik bensaun ba feto-faluk iha Sarepta.” (1 Reis 17:12-16) Irmán Edit simu feen-laʼen neʼe. Nia hetan bensaun ka lae? Nia hatete: “Haʼu kontente tanba ikusmai sira hela durante fulan rua. Durante tempu neʼe, ami sai belun diʼak.” Irmán Edit mós hetan bensaun seluk, nia iha belun barak iha kongregasaun. Agora nia serbí nuʼudar pioneiru no nia kontente atu konvida irmaun-irmán neʼebé haklaken hamutuk ho nia atu han iha ninia uma. Nia hatete: “Haʼu sente kontente atu fó ba ema seluk. No hodi halo nuneʼe, haʼu simu bensaun barak.”—Ebr 13:1, 2.
17. Irmaun Luke no ninia feen rekoñese saida?
17 Karik ita hatudu ona laran-diʼak, maibé ita bele hatudu laran-diʼak liután ka lae? Porezemplu, irmaun Luke no ninia feen toman atu konvida sira-nia inan-aman, família, belun no katuas área ho ninia feen ba sira-nia uma. Maibé nia hatete: “Ami rekoñese katak ami konvida deʼit ema sira neʼebé besik ami.” Oinsá mak irmaun Luke ho ninia feen hatudu laran-diʼak liután?
18. Oinsá mak irmaun Luke no ninia feen hatudu laran-diʼak liután?
18 Irmaun Luke no ninia feen troka sira-nia hanoin bainhira sira hanoin kleʼan tiha kona-ba Jesus nia liafuan: “Se imi hadomi deʼit ema neʼebé hadomi imi, imi hetan kolen saida?” (Mt 5:45-47) Sira rekoñese katak sira presiza banati-tuir Jeová neʼebé hatudu laran-diʼak ba ema hotu. Tan neʼe sira deside atu konvida irmaun-irmán sira neʼebé uluk sira la konvida. Irmaun Luke hatete: “Agora ami hotu kontente bainhira ransu hamutuk. Ema hotu hetan anima.”
19. Oinsá ita hatudu katak ita mak Jesus nia dixípulu? Ita rasik hakarak halo saida?
19 Ita aprende ona oinsá hadomi malu tebetebes bele ajuda ita atu buka dame, la todan ba sorin no hatudu laran-diʼak. Ita presiza manán hasoru hanoin negativu, no hadomi tebes irmaun-irmán sira husi laran. Se ita halo nuneʼe, ita sei kontente no sei hatudu katak ita mak Jesus nia dixípulu.—João 13:17, 35.
KNANANUK 88 Hanorin haʼu Ita-nia dalan sira
a Jesus hatete katak ema sei rekoñese ema Kristaun loos liuhusi domin neʼebé sira hatudu ba malu. Domin ba irmaun-irmán sira book ita atu buka dame, la todan ba sorin no hatudu laran-diʼak. Dala ruma neʼe la fasil. Lisaun neʼe sei fó sujestaun diʼak kona-ba oinsá ita bele kontinua hadomi malu tebetebes husi laran.
b Naran balu iha lisaun neʼe laʼós naran neʼebé loos.
c ESPLIKASAUN BA DEZEÑU: Irmán ida koko atu buka dame. Foufoun nia la hetan susesu, maibé nia kontinua hakaʼas an. Tanba nia hakaʼas an atu kontinua hatudu domin, neʼe lori rezultadu diʼak.
d ESPLIKASAUN BA DEZEÑU: Irmaun neʼebé idade sente katak ema seluk iha kongregasaun la liga nia.
e ESPLIKASAUN BA DEZEÑU: Foufoun irmán ida dada an atu hatudu laran-diʼak, maibé ikusmai nia troka ninia hanoin, no neʼe halo nia kontente liután.