Ema hotu hakarak iha futuru neʼebé diʼak

Maibé ema barak duvida katak sira labele hetan futuru diʼak neʼebé sira hakarak, tanba sira haree situasaun neʼebé mosu derrepente deʼit. Porezemplu pandemia COVID-19 fó impaktu ba ema nia moris, problema ekonomia, no mós mate. Rezultadu mak sira hanoin katak sira-nia futuru sei la sai diʼak.

Tanba labele hatene futuru ho loloos, ema barak buka dalan oioin atu hetan moris neʼebé diʼak liu. Ema balu tau fiar ba kbiit neʼebé labele haree hanesan sorte ka destinu. Ema barak buka edukasaun boot no rikusoin, hodi hanoin katak neʼe bele fó garantia ba sira atu hetan buat neʼebé sira hakarak. Ema seluk sente katak sai ema neʼebé diʼak mak fó garantia ba sira atu iha moris diʼak.

Buat sira-neʼe bele ajuda ita ka lae? Mai ita haree pergunta sira tuirmai:

• Saida mak determina Ita-nia futuru?

• Edukasaun no osan bele fó garantia atu iha moris neʼebé diʼak liu ka lae?

• Sai ema diʼak bele fó garantia ba futuru neʼebé diʼak ka lae?

• Iha neʼebé mak ita bele hetan matadalan atu hetan futuru neʼebé diʼak?

Livru Haklaken neʼe sei ajuda Ita atu hetan resposta.