Edukasaun no osan bele fó garantia ba futuru ka lae?

Ema barak hanoin katak ema neʼebé iha edukasaun boot no riku sei iha futuru neʼebé diʼak. Sira fiar katak hetan edukasaun iha universidade bele ajuda sira sai serbisu-naʼin neʼebé diʼak, família neʼebé diʼak no sidadaun neʼebé diʼak. Sira mós hanoin katak edukasaun boot bele ajuda sira atu hetan saláriu boot no se sira iha osan barak, neʼe sei halo sira kontente.

EMA BARAK NIA DESIZAUN

Haree toʼok komentáriu ida husi mane ida naran Zhang Chen, husi Xina. Nia hatete: “Uluk haʼu fiar katak haʼu presiza iha diploma universidade nian atu la moris kiak tan, no hetan serbisu ho saláriu boot nuʼudar garantia atu kontente no goza moris.”

Atu hetan futuru neʼebé diʼak liu, ema barak gosta atu bá universidade neʼebé naran-boot, karik iha rai seluk. Situasaun hanesan neʼe aumenta ba beibeik toʼo tempu COVID-19 mak hapara ema atu halo viajen. Maizumenus tinan 10 liubá, organizasaun ida fó sai katak, estudante neʼebé eskola iha rai liʼur 52% mak husi Ázia.

Inan-aman sira halo sakrifísiu boot atu sira-nia oan bele bá eskola iha rai liʼur. Qixiang, husi Taiwán, hatete: “Haʼu-nia inan-aman la riku, maibé sira haruka ami oan hotu hamutuk naʼin-haat ba eskola iha Estadus Unidus.” Atu selu edukasaun boot hanesan neʼe, ninia família presiza debe osan barak. Neʼe mak baibain akontese mós ba família seluk.

REZULTADU MAK SAIDA?

Feto joven ida haree kole no estrese nuʼudar nia tuur iha komputadór oin iha kalan-boot. — Ema barak neʼebé buka edukasaun boot no rikusoin ikusmai sai estrese

Edukasaun bele ajuda iha dalan balu, maibé neʼe laʼós sempre lori rezultadu neʼebé estudante sira hakarak. Porezemplu, ema balu depois tinan barak halo sakrifísiu no empresta osan atu selu eskola, ikusmai la hetan serbisu neʼebé sira hakarak. Reportajen husi Rachel Mui iha Business Times husi Singapura hatete: “Ema barak liu neʼebé remata universidade mak la hetan serbisu.” Doutoradu ida naran Jianjie, neʼebé hela iha Taiwán, hatete: “Ema barak mak la iha opsaun no tenke halo fali serbisu neʼebé la iha ligasaun ho buat neʼebé sira aprende iha eskola.”

Ema balu neʼebé hetan serbisu no pozisaun neʼebé sira hakarak mós dala ruma sente katak sira-nia moris la hanesan ho buat neʼebé sira hakarak. Niran, neʼebé husi Tailándia, bainhira remata tiha universidade iha Bretaña, nia hetan serbisu neʼebé nia hakarak. Nia hatete: “Diploma ajuda haʼu hetan serbisu ho saláriu boot. Maibé haʼu presiza serbisu makaʼas no uza oras barak. Ikusmai kompañia hasai serbisu-naʼin barak inklui mós haʼu. Haʼu rekoñese katak la iha serbisu ida mak bele fó garantia.”

Maski ema neʼebé iha osan barak no haree hanesan moris ho seguru mós hetan problema família, moras oioin, no hanoin barak kona-ba osan. Katsutoshi, husi Japaun, hatete: “Haʼu iha osan barak, maibé haʼu nafatin la kontente tanba ema laran-moras no hatudu hahalok aat mai haʼu.” Lam, feto ida husi Vietname hatete: “Ema barak koko buka serbisu ho saláriu boot tanba sira hanoin neʼe sei halo sira seguru, maibé dala barak sira la sente ida-neʼe, no sai moras no depresaun.”

TANBASÁ EDUKASAUN NO OSAN LABELE FÓ GARANTIA

Klaru, ema hotu presiza edukasaun báziku no osan atu sustenta sira-nia an no família. Maski nuneʼe, buat sira-neʼe la toʼo atu fó garantia kona-ba moris ho seguru iha futuru. Tanbasá? Haree toʼok saida mak Maromak nia Liafuan hatete.

EDUKASAUN NEʼEBÉ BOOT LAʼÓS SEMPRE LORI SUSESU.

“Laʼós ema neʼebé halai lalais mak sempre manán halai-taru, . . . no laʼós ema neʼebé iha kbiit atu hanoin mak sempre iha rikusoin, no laʼós ema neʼebé iha koñesimentu mak sempre hetan susesu, tanba tempu susar no situasaun neʼebé mosu derrepente deʼit kona sira hotu.”—ECLESIASTES 9:11.

Maski ema ida iha edukasaun neʼebé boot, karik nia mós la hetan susesu tanba iha buat barak neʼebé nia labele kontrola. Kuandu iha problema ekonomia, problema polítiku, ka ema hanoin aat ba nia, ema neʼebé iha edukasaun boot mós sei la susesu.

RIKUSOIN BELE LAKON.

“Keta halo kole ó-nia an atu hetan rikusoin. Labele halo tan ida-neʼe, maibé hatudu matenek bá. Bainhira ó hateke ba rikusoin, neʼe la iha ona, tanba rikusoin neʼe sei iha liras hanesan manu-makikit no semo ba lalehan.”—PROVÉRBIOS 23:4, 5.

Karik osan bele halo ita seguru maibé laʼós ba nafatin. Ita bele lakon ita-nia osan derrepente deʼit. Dezastre naturais hanesan rai-nakdoko, ahi han no anin boot bele halakon rikusoin hotu.

OSAN BELE LORI PROBLEMA.

“Ema riku nia rikusoin sei halo nia labele toba-dukur.”—ECLESIASTES 5:12.

Ida-neʼe akontese ba mane ida naran Franklin, neʼebé hela iha Honkóng. Nia iha edukasaun boot no hetan serbisu ho saláriu diʼak. Ikusmai nia sai manajer. Nia hatete: “Estrese komesa fó impaktu ba haʼu-nia saúde. Haʼu hanoin barak toʼo labele toba-dukur.” Nia la tahan ho ida-neʼe. Nia hatete: “Haʼu komesa husu pergunta ba haʼu-nia an, tanbasá haʼu halo nuneʼe? Neʼe book haʼu atu hanoin liután kona-ba objetivu ba moris.”

“Keta halo kole ó-nia an atu hetan rikusoin.”—PROVÉRBIOS 23:4

Hanesan ho Franklin, ema barak hanoin katak iha buat ida neʼebé importante liu fali edukasaun boot ka rikusoin iha sira-nia moris. Duké fokus ba buat materiál nian, sira buka futuru kapás hodi hakaʼas an sai ema neʼebé diʼak no halo diʼak ba ema seluk. Neʼe sei fó garantia ba ita-nia futuru ka lae? Informasaun tuirmai sei hatán ba pergunta neʼe.