Jeová mak dirije haʼu-nia moris

HUSI INGLATERRA BÁ FALI ÁFRIKA

Haʼu moris iha tinan 1935 iha Darlaston iha rai-Inglaterra. Área Darlaston iha ahi-suar barak tanba fábrika sira. Kuandu haʼu tinan haat, haʼu-nia inan-aman komesa estuda Bíblia hamutuk ho Testemuña sira. Bainhira haʼu tinan 14, haʼu fiar katak ida-neʼe mak lia-loos, no haʼu hetan batizmu iha tinan 1952 kuandu haʼu tinan 16.

Iha tempu neʼebé hanesan, haʼu komesa serbisu iha fábrika neʼebé prodús ekipamentu no parte oioin husi karreta. Haʼu komesa hetan treinu atu serbisu nuʼudar sekretáriu, no haʼu gosta tebes serbisu neʼe.

Haʼu presiza halo desizaun importante ida bainhira katuas área konvida haʼu atu komesa dirije Reuniaun Estudu Livru nian iha kongregasaun Willenhall. Maibé desizaun neʼe susar. Iha tempu neʼebá, haʼu tuir kongregasaun rua. Iha loron baileet, haʼu tuir kongregasaun neʼebé besik haʼu-nia serbisu-fatin iha Bromsgrove, neʼe mak kilómetru 32 husi haʼu-nia hela-fatin. Iha findesemana, haʼu fila fali ba haʼu-nia inan-aman nia uma, no tuir kongregasaun Willenhall.

Tanba haʼu hakarak atu apoia Jeová nia organizasaun, haʼu simu katuas área nia konvite, maski neʼe katak haʼu tenke sai husi serbisu neʼebé haʼu gosta. Haʼu nunka arrepende haʼu-nia desizaun atu husik Jeová dirije haʼu-nia moris tanba neʼe fó oportunidade mai haʼu atu serbí Jeová liután.

Bainhira haʼu tuir reuniaun iha kongregasaun Bromsgrove, haʼu hasoru irmán Anne neʼebé bonita no tau fokus atu serbí Jeová. Ami kaben iha tinan 1957. Ami simu knaar oioin hanesan pioneiru regulár, pioneiru espesiál, katuas vizitante no serbí iha Betel. Anne sempre lori ksolok mai haʼu.

Iha tinan 1966, ami kontente atu tuir Eskola Gilead klase 42. Ami hetan knaar atu serbí iha rai-Malavi no ema Malavi sempre simu ema ho laran-diʼak. Maibé ami la espera katak ema la simu ami ho didiʼak.

SERBÍ JEOVÁ DURANTE TEMPU SUSAR IHA RAI-MALAVI

Ami toʼo iha rai-Malavi iha loron 1 Fevereiru 1967. Ba fulan primeiru ami uza ami-nia oras barak atu aprende língua no tuirmai ami komesa serbí nuʼudar katuas vizitante. Ami uza karreta boot neʼebé ema hanoin katak bele liu fatin hotu, inklui mota hotu. Maibé neʼe la loos. Ami bele liu deʼit mota neʼebé badak. Dala ruma, ami hela iha uma neʼebé harii husi tahu. Iha tempu udan, presiza taka ho lona atu bee la tama. Neʼe susar tebes ba ami neʼebé foin serbí nuʼudar misionáriu, maibé ami gosta ida-neʼe.

Iha fulan-Abríl, haʼu nota katak lakleur tan Testemuña sei hasoru problema husi governu. Iha rádiu, haʼu rona prezidente Malavi naran Doutór Hastings Banda hatete katak Testemuña la selu taxa no hamosu problema ba governu. Klaru katak neʼe la loos. Problema neʼe mosu tanba Testemuña neutrál no lakohi sosa kartaun partidu nian.

Iha fulan-Setembru, jornál fó sai katak prezidente duun irmaun-irmán sira hamosu problema iha fatin oioin. Prezidente fó sai katak lakleur tan ninia governu sei bandu Testemuña ba Jeová nia atividade. Iha loron 20 Outubru 1967, governu komesa bandu Testemuña. Lakleur polísia no ema sira husi imigrasaun mai atu taka sukursál no haruka misionáriu sira sai husi rai-Malavi.

Ami tama komarka durante loron tolu no tuirmai sira deporta ami ba rai-Maurísia neʼebé Bretaña mak ukun. Maibé autoridade iha neʼebá la fó lisensa ba ami atu hela nuʼudar misionáriu. Tan neʼe, sukursál haruka ami atu serbí iha rai-Rodézia (agora rai-Zimbabué). Bainhira toʼo, ami hasoru polísia imigrasaun ida neʼebé ulun-toos no lakohi ami tama rai-Zimbabué. Nia hatete: “Sira deporta imi husi rai-Malavi. No autoridade sira iha rai-Maurísia mós la simu imi. No imi mai iha neʼe tan deʼit la iha fatin seluk atu bá.” Anne komesa tanis. Ami sente katak ema hotu lakohi simu ami, tan neʼe haʼu hakarak tebes atu fila fali ba rai-Inglaterra. Ikusmai polísia imigrasaun husik ami atu hela kalan ida iha sukursál Zimbabué. Maibé loron tuirmai, ami presiza bá fali imigrasaun. Ami kole tebes, maibé ami kontinua hein atu haree oinsá Jeová sei ajuda ami. Bainhira ami bá fali imigrasaun, ami hakfodak tanba ami hetan lisensa atu hela iha rai-Zimbabué nuʼudar turista. Haʼu sei nunka haluha loron neʼe. Haʼu fiar katak Jeová dirije haʼu-nia moris.

TAU MATAN MALAVI HUSI ZIMBABUÉ

Iha sukursál Zimbabué, haʼu serbí iha Departamentu Serbisu nian hodi tau matan ba rai-Malavi no rai-Mosambike. Ema fó-terus makaʼas ba irmaun-irmán sira iha rai-Malavi. Haʼu-nia serbisu inklui tradús relatóriu husi katuas área sira iha rai-Malavi. Kalan ida haʼu tradús relatóriu toʼo kalan-boot no haʼu tanis bainhira lee esperiénsia husi irmaun-irmán sira neʼebé sai vítima ba hahalok violénsia.a Maibé haʼu mós hetan laran-manas tanba sira-nia laran-metin, fiar metin no tahan.​—2 Kor 6:4, 5.

Ami hakaʼas an atu nuneʼe irmaun-irmán sira iha rai-Malavi no sira neʼebé halai ba rai-Mosambike bele hetan publikasaun sira. Tradutór sira ba língua Chichewa muda ba irmaun ida nia rai iha rai-Zimbabué. Língua Chichewa mak língua neʼebé ema barak koʼalia iha rai-Malavi. Irmaun neʼe harii hela-fatin no eskritóriu ida ba sira, tan neʼe sira bele kontinua hala’o serbisu importante atu tradús publikasaun sira.

Tinan-tinan ami arranja katuas área sira iha rai-Malavi atu tuir reuniaun boot ho língua Chichewa iha rai-Zimbabué. Kuandu iha neʼebá, sira bele hetan nota sira ba diskursu. No bainhira sira fila fali ba rai-Malavi, sira fahe informasaun sira-neʼe ba irmaun-irmán sira tuir sira-nia kbiit. Tinan ida durante sira-nia vizita, ami konsege organiza Eskola ba Katuas Kongregasaun atu fó anima ba katuas área sira.

Iha fulan-Fevereiru 1975, haʼu bá vizita Testemuña sira iha kampu refujiadu iha rai-Mosambike tanba halai husi rai-Malavi. Sira kontinua halo tuir matadalan neʼebé foun liu husi Jeová nia organizasaun, inklui arranju foun kona-ba iha grupu katuas. Irmaun sira neʼebé foin serbí nuʼudar katuas arranja atividade espirituál oioin, inklui hatoʼo diskursu públiku, koʼalia hamutuk eskritura loroloron no Livru Haklaken, no sira mós halaʼo asembleia. Irmaun-irmán sira organiza kampu neʼe hanesan reuniaun boot tanba iha departamentu hamoos nian, departamentu hahán nian no seguransa. Ho Jeová nia bensaun, irmaun-irmán sira-neʼe kumpre buat barak. Fila husi neʼebá, haʼu sente laran-manas.

Maizumenus iha tinan 1979, sukursál Zámbia komesa tau matan ba rai-Malavi. Maibé haʼu nafatin hanoin kona-ba irmaun-irmán sira iha rai-Malavi no halo orasaun kona-ba sira. Dala ruma nuʼudar membru ba Komisaun ba Sukursál Zimbabué, haʼu halo enkontru ho reprezentante husi sede-jerál hamutuk ho irmaun sira seluk husi rai-Malavi, rai-Áfrika Súl, no rai-Zámbia. Tempu ida-idak ami sempre husu: “Oinsá ita bele ajuda liután irmaun-irmán sira iha rai-Malavi?”

Nuʼudar tempu liu daudaun, ema ladún fó-terus ba irmaun-irmán sira. Irmaun-irmán sira neʼebé halai sai husi rai-Malavi, neineik-neineik fila fali. No sira neʼebé hela iha rai-Malavi durante tempu neʼe, ladún hasoru ona susar hanesan uluk. Nasaun viziñu sira mós fó lisensa ba Testemuña atu haklaken no halibur hamutuk. Tuirmai rai-Mosambike halo buat neʼebé hanesan iha tinan 1991. Maibé ami hanoin: ‘Bainhira mak Testemuña iha rai-Malavi bele sai livre?’

FILA FALI BA RAI-MALAVI

Ikusmai situasaun polítiku iha rai-Malavi troka no iha tinan 1993 governu la bandu tan Testemuña ba Jeová. Liutiha tempu balu, haʼu koʼalia ho misionáriu ida neʼebé husu: “Ó hakarak fila fali ba Malavi ka lae?” Haʼu tinan 59, tan neʼe haʼu hatán: “Lae, haʼu katuas ona!” Maibé loron tuirmai, ami simu karta husi Grupu Administradór neʼebé konvida ami atu fila fali ba rai-Malavi.

Ami gosta tebes ami-nia knaar iha rai-Zimbabué no ami iha belun barak, tan neʼe susar ba ami atu foti desizaun. Grupu Administradór ho laran-diʼak fó opsaun ba ami atu hili hodi hela nafatin iha rai-Zimbabué se ami hakarak. Maibé haʼu hanoin-hetan Abraão no Sara neʼebé idade ona no husik sira-nia uma atu bele halo tuir Jeová nia matadalan.​—Gén 12:1-5.

Ami deside atu halo tuir matadalan husi Jeová nia organizasaun no ami fila fali ba rai-Malavi iha loron 1 Fevereiru 1995, neʼe mak tinan 28 husi tempu neʼebé ami toʼo iha rai-Malavi ba dala primeiru. Haʼu no irmaun naʼin-rua serbí nuʼudar membru ba Komisaun ba Sukursál, no lakleur deʼit ami sai okupadu atu organiza Testemuña nia atividade sira iha rai-Malavi.

JEOVÁ MAK HALO IDA-NEʼE AUMENTA

Haʼu kontente tebes atu haree oinsá Jeová ajuda ema barak atu hatene lia-loos. Iha tinan 1993 iha haklaken-naʼin maizumenus 30.000 no iha tinan 1998 haklaken-naʼin aumenta makaʼas toʼo 42.000 liu.b Grupu Administradór aprova planu atu harii sukursál iha rai-Malavi. Sukursál sosa rai ektare 12 iha sidade Lilongwe, no haʼu sai membru ba komisaun ba konstrusaun.

Irmaun Guy Pierce husi Grupu Administradór mak hatoʼo diskursu atu dedika sukursál foun neʼe iha fulan-Maiu 2001. Testemuña hamutuk naʼin-2.000 liu mak tuir. Sira barak hetan batizmu ona ba tinan 40 liu. Durante tinan barak, sira tahan susar sira ho laran-metin tanba governu bandu. Sira moris kiak, maibé riku iha dalan espirituál. Sira kontente atu vizita Betel. Iha fatin oioin iha Betel, sira kanta knananuk reuniaun nian hodi tuir ema Afrikanu nia dalan atu kanta, no esperiénsia neʼe book duni haʼu-nia laran. Jeová haraik bensaun barak ba ema sira neʼebé tahan hasoru susar ho laran-metin.

Bainhira projetu konstrusaun remata, haʼu simu knaar foun atu dedika Reuniaun-Fatin sira ba Jeová. Kongregasaun sira iha rai-Malavi hetan benefísiu husi arranju atu harii Reuniaun-Fatin sira ho lalais iha rai sira neʼebé irmaun-irmán sira ladún iha osan. Uluk, kongregasaun balu halaʼo reuniaun iha uma neʼebé halo husi ai-bubur. Sira tau biti iha kakuluk no sira halo kadeira naruk husi tahu. Maibé agora irmaun sira halo tijolu husi rai-mean, no harii Reuniaun-Fatin neʼebé furak. Maski nuneʼe, toʼo agora sira nafatin gosta kadeira neʼebé naruk tanba ema barak bele tuur.

Haʼu mós kontente atu haree oinsá Jeová ajuda ninia povu atu sai maduru. Haʼu admira irmaun joven sira tanba sira prontu atu ajuda no lalais atu aprende bainhira hetan treinu husi Jeová nia organizasaun. Rezultadu mak sira bele kaer responsabilidade barak liután iha Betel no mós iha kongregasaun. Kongregasaun mós hetan anima liuhusi irmaun sira neʼebé foin sai katuas área. Sira barak mak kaben-naʼin. Feen-laʼen sira-neʼe hili atu la iha oan, atu nuneʼe sira bele serbí Jeová liután maski sira-nia família la kontente ho sira-nia desizaun.

KONTENTE HO HAʼU-NIA DESIZAUN SIRA

Depois serbí tiha iha Áfrika durante tinan 52, haʼu sai moras. Grupu Administradór aprova rekomendasaun husi Komisaun ba Sukursál atu ami bele fila fali ba Bretaña. Ami triste tanba ami presiza husik hela knaar neʼebé ami gosta. Maibé família Betel iha Bretaña tau matan ami ho didiʼak.

Haʼu fiar katak husik Jeová atu dirije haʼu-nia moris mak desizaun neʼebé diʼak liu. Se haʼu sadere deʼit ba haʼu-nia matenek, karik haʼu-nia moris sei la sai hanesan agora. Jeová sempre hatene saida mak haʼu presiza atu ‘halo loos haʼu-nia dalan sira’. (Prov 3:5, 6) Bainhira joven, haʼu gosta aprende kona-ba serbisu iha kompañia boot. Maibé haʼu sente kontente liu atu serbisu hamutuk ho Jeová nia organizasaun iha mundu tomak. Ba haʼu, serbí Jeová mak dalan moris nian neʼebé diʼak liu.