Pergunta husi lee-naʼin
Tanbasá ema balu dehan katak liafuan “sira” iha Salmo 12:7 refere ba “Jeová nia liafuan” (versíkulu 6), maibé iha Tradusaun Mundu Foun refere ba “sira neʼebé iha terus laran” (versíkulu 5)?
Kontestu hatudu katak versíkulu neʼe refere ba ema.
Iha Salmo 12:1-4, ita lee katak “ema neʼebé laran-metin lakon ona husi ema nia leet”. No tuirmai iha Salmo 12:5-7 hatete:
“Jeová dehan: ‘Haʼu sei hamriik
Tanba ema hanehan sira neʼebé iha terus laran,
No tanba ema kiak sira-nia halerik.
Haʼu sei salva sira husi ema neʼebé odi sira.’
Jeová nia liafuan mak moos
Hanesan osan-mutin neʼebé hamoos ona iha ahi-matan neʼebé halo husi rai-mean, sin, hamoos ona ba dala hitu.
Oh Jeová, Ita sei tau matan ba sira;
Ita sei proteje nafatin ema ida-idak husi jerasaun neʼe.”
Versíkulu 5 koʼalia kona-ba saida mak Maromak sei halo ba ema neʼebé “iha terus laran”. Nia sei salva sira.
Versíkulu 6 hatete katak “Jeová nia liafuan mak moos hanesan osan-mutin neʼebé hamoos ona”. Neʼe mak buat neʼebé ita hotu sente kona-ba Maromak nia Liafuan.—Sal 18:30; 119:140.
Agora, hanoin toʼok kona-ba versíkulu tuirmai, Salmo 12:7: “Oh Jeová, Ita sei tau matan ba sira; Ita sei proteje nafatin ema ida-idak husi jerasaun neʼe.” Liafuan “sira” refere ba sé?
Tanba liafuan antes versíkulu 7 uza fraze “Jeová nia liafuan”, tan neʼe karik ema balu hanoin katak liafuan “sira” refere ba Maromak nia liafuan. No ita hatene katak Maromak proteje duni Bíblia maski kontdrador barak koko atu bandu no halakon ida-nee.—Isa 40:8; 1 Ped 1:25.
Maibé Jeová mós proteje ka tau matan ba ema, hanesan temi iha versíkulu 5. Jeová ajuda no salva ona “sira neʼebé iha terus laran” no nia sei kontinua halo nuneʼe.—Job 36:15; Sal 6:4; 31:1, 2; 54:7; 145:20.
Entaun, liafuan “sira” iha versíkulu 7 refere saida?
Kontestu husi salmo neʼe hatudu katak “sira” refere ba ema.
Iha Salmo 12:1 David koʼalia kona-ba ema aat sira neʼebé bosok Jeová nia “ema neʼebé laran-metin”. Tuirmai ita lee katak Jeová sei halakon ema neʼebé koʼalia bosok. Salmo neʼe fó konfiansa ba ita katak Maromak sei ajuda ninia povu tanba ninia liafuan mak moos.
Entaun versíkulu 7 neʼebé hatete katak Jeová sei tau matan no proteje “sira”, neʼe refere ba sira neʼebé iha terus laran tanba ema aat hanehan.
Manuskritu Masorétiku Ebraiku mak uza liafuan “sira”. Tradusaun Septuajinta Gregu uza liafuan “ami” dala rua iha versíkulu 7, no neʼe refere ba ema neʼebé laran-metin no iha terus laran. Ikusliu, versíkulu 7 hatete katak Jeová sei proteje “ema ida-idak husi jerasaun neʼe” husi ema neʼebé habelar hahalok la morál. (Sal 12:7, 8) Versíkulu 7 iha Targum Aramaiku hatete: “Ita-Boot, OH NAʼI, sei proteje ema laran-loos, ita sei proteje sira husi jerasaun aat neʼe ba nafatin.” Tradusaun neʼe fó tan prova katak liafuan “sira” iha Salmo 12:7 la refere ba Maromak nia liafuan.
Tan neʼe, versíkulu neʼe fó esperansa ba “ema neʼebé laran-metin” katak Maromak sei ajuda sira.