Matan-moris nafatin hodi la monu ba tentasaun

1-2. (a) Jesus fó avizu saida ba ninia dixípulu sira? (b) Tanbasá ninia dixípulu sira husik hela nia? (Haree mós dezeñu.)

“LARAN hakarak, maibé isin fraku.”a (Mt 26:41b) Jesus nia liafuan sira-neʼe hatudu katak nia komprende ita mak ema la perfeitu. Maibé, liafuan sira-neʼe mós inklui avizu ida: Kuidadu atu la fiar an demais. Oras balu antes Jesus hatete liafuan sira-neʼe, ninia dixípulu sira ho fiar an promete katak sira sei laran-metin ba sira-nia Naʼi. (Mt 26:35) Sira-nia motivu mak diʼak, maibé sira la rekoñese katak sira bele sai fraku bainhira hasoru susar. Tan neʼe, Jesus fó avizu ba sira: “Matan-moris nafatin bá no harohan beibeik, atu nuneʼe imi labele monu ba tentasaun.”—Mt 26:41a.

² Triste mak dixípulu sira la matan-moris nafatin. Bainhira ema kaer Jesus, sira nafatin laran-metin ba nia ka lae? Ka sira monu ba tentasaun no husik hela Jesus? Tanba sira la matan-moris, tan neʼe sira la halo tuir sira-nia promesa no husik hela Jesus.—Mt 26:56.

3. (a) Atu nafatin laran-metin ba Jeová, tanbasá ita labele fiar an demais? (b) Iha lisaun neʼe ita sei koʼalia kona-ba saida?

³ Ita labele fiar an demais. Klaru katak ita deside metin ona atu la husik buat naran deʼit halo ita la laran-metin ba Jeová. Maibé, ita mós la perfeitu no fasil deʼit atu monu ba tentasaun. (Rom 5:12; 7:​21-23) Derrepente deʼit ita bele hasoru tentasaun atu halo buat neʼebé sala. Atu bele laran-metin nafatin ba Jeová no ninia Oan-Mane, ita presiza halo tuir Jesus nia konsellu atu kontinua matan-moris kona-ba tentasaun. Lisaun neʼe sei ajuda ita atu halo nuneʼe. Primeiru, ita sei haree hamutuk iha situasaun saida deʼit mak ita presiza matan-moris nafatin. Tuirmai, oinsá atu proteje ita-nia an husi tentasaun. Ikusliu, ita sei haree oinsá atu matan-moris nafatin.

ITA PRESIZA MATAN-MORIS IHA SITUASAUN SAIDA DEʼIT?

4-5. Tanbasá importante atu la halo sala maski neʼe mak kiʼik deʼit?

⁴ Maski sala balu mak kiʼik deʼit, maibé neʼe bele halo fraku ita-nia relasaun ho Jeová. No mós, sala neʼebé kiʼik bele halo ita monu ba sala neʼebé boot.

⁵ Ita hotu hasoru tentasaun atu halo sala. Maibé ita ida-idak iha fraku neʼebé la hanesan, karik neʼe mak atu halo sala neʼebé sériu, halo hahalok neʼebé la moos, ka hatudu hahalok tuir mundu neʼe nian. Porezemplu, karik ema ida luta makaʼas hasoru tentasaun atu halo sala seksuál. Ema seluk karik hakaʼas an atu la halo hahalok neʼebé la moos, hanesan masturbasaun ka haree pornografia. No ema balu karik luta hasoru sentimentu taʼuk ba ema, foti an, hirus lalais, ka buat seluk tan. Hanesan buat neʼebé Tiago hatete: “Ema ida-idak hetan koko liuhusi ninia hakarak rasik neʼebé dada nia no tenta nia.”—Tgo 1:14.

6. Ita presiza rekoñese saida kona-ba ita-nia an?

⁶ Ita rasik hatene ka lae, iha situasaun saida deʼit mak fasil ba Ita atu monu ba tentasaun? Se Ita la rekoñese Ita rasik nia fraku ka hanoin katak Ita iha ona kbiit atu la monu ba sala, neʼe bele lori perigu ba Ita. (1 João 1:8) Hanoin-hetan, Paulo hatete katak maski “ema espirituál” mós bele monu ba tentasaun se sira la matan-moris nafatin. (Gal 6:​1, nota) Ita presiza buka-hatene kona-ba ita-nia an no rekoñese ita-nia fraku sira neʼebé bele halo ita monu ba sala.—2 Kor 13:5.

7. Ita presiza tau atensaun liu ba saida? Fó toʼok ezemplu.

⁷ Bainhira ita hatene ona kona-ba situasaun neʼebé baibain tenta ita, saida mak ita presiza halo? Hametin ita-nia an atu bele luta hasoru tentasaun! Porezemplu, iha Bíblia nia tempu sidade nia parte neʼebé fraku mak ninia portaun sira. Tan neʼe, presiza guarda barak atu hein iha portaun. Nuneʼe mós, ita presiza tau atensaun liu ba ita-nia fraku sira.—1 Kor 9:27.

OINSÁ ATU PROTEJE AN HUSI TENTASAUN

8-9. Oinsá mak mane joven neʼebé temi iha Provérbios kapítulu 7 bele hasees an husi sala neʼebé sériu? (Provérbios 7:​8, 9, 13, 14, 21)

⁸ Oinsá mak ita bele proteje an husi tentasaun no sala? Haree toʼok saida mak ita bele aprende husi mane joven ida neʼebé temi iha Provérbios kapítulu 7. Nia halo sala seksuál ho feto neʼebé la iha morál. Versíkulu 22 hatete katak “lakleur deʼit” ka derrepente deʼit mane joven neʼe laʼo tuir feto neʼe. Maibé versíkulu sira antes neʼe hatudu katak nia halo ona hakat balu neʼebé neineik-neineik halo fasil ba nia atu monu ba sala.

⁹ Saida mak nia halo antes monu ba sala? Primeiru, iha kalan “nia laʼo besik [feto neʼebé la iha morál] nia dalan sikun”. Tuirmai, nia laʼo atu bá feto neʼe nia uma. (Lee Provérbios 7:​8, 9.) No bainhira nia haree feto neʼe, nia la hasees an. Maibé nia husik feto neʼe reʼi nia no rona ba feto neʼe nia liafuan katak feto neʼe hasaʼe ona sakrifísiu, karik atu halo nia hanoin katak feto neʼe mak ema diʼak. (Lee Provérbios 7:​13, 14, 21.) Se mane joven neʼe la halo hakat sira neʼebé beik, nia bele hasees an husi tentasaun no la monu ba sala.

10. Hanesan ho mane joven neʼe, ohin loron oinsá mak ema ida bele monu ba sala?

¹⁰ Salomão nia istória neʼe hanorin ita kona-ba buat neʼebé bele akontese ba Jeová nia atan ida. Karik nia bele monu ba sala neʼebé sériu, no tuirmai sente katak neʼe akontese derrepente deʼit. Maibé, se nia hanoin fali kona-ba buat neʼebé akontese, karik nia sei rekoñese katak antes neʼe nia halo ona hakat balu neʼebé la matenek no lori nia ba sala neʼebé sériu. Karik hakat sira-neʼe mak inklui ransu neʼebé la diʼak, atividade halimar nian neʼebé la diʼak, ka sempre loke website ka bá fatin neʼebé la diʼak. Karik nia mós para ona atu halo orasaun, lee Bíblia, tuir reuniaun, ka bá haklaken. Hanesan mane joven neʼebé temi iha Provérbios, karik nia monu ba sala neʼebé sériu laʼós derrepente deʼit.

11. Atu la monu ba sala, ita presiza hasees an husi saida?

¹¹ Ita aprende lisaun saida? Ita presiza hasees an laʼós deʼit husi sala, maibé mós husi hakat sira neʼebé lori ita ba sala. Neʼe mak buat neʼebé Salomão esplika depois nia konta tiha istória kona-ba mane joven no feto neʼebé la iha morál. Kona-ba feto neʼe, Salomão hatete: “Keta laʼo sala hodi tama ba ninia dalan.” (Prov 7:25) Nia mós hatete: “Hadook an tiha husi feto neʼe; keta hakbesik ninia uma nia odamatan.” (Prov 5:​3, 8) Sin, ita proteje ita-nia an husi sala hodi hasees an husi situasaun neʼebé halo ita monu ba sala.b Neʼe inklui hasees an husi situasaun ka atividade neʼebé la sala tuir ema Kristaun nia haree maibé bele lori ita ba tentasaun.—Mt 5:​29, 30.

12. Saida mak Job halo, no oinsá neʼe ajuda nia atu proteje ninia an husi tentasaun? (Job 31:1)

¹² Atu sees husi situasaun neʼebé bele halo ita monu ba sala, ita presiza deside metin atu proteje ita-nia an. Neʼe mak buat neʼebé Job halo. Nia “halo ona aliansa ho [ninia] matan” atu la haree ba feto ida hodi kaan feto neʼe. (Lee Job 31:1.) No neʼe ajuda nia atu hasees an hodi la monu ba sala seksuál. Ita mós bele deside metin atu hasees an husi buat naran deʼit neʼebé karik bele halo ita monu ba tentasaun.

13. Tanbasá ita tenke proteje ita-nia hanoin? (Haree mós foto.)

¹³ Ita mós tenke proteje ita-nia hanoin. (Éx 20:17) Ema balu hanoin katak la sala atu imajina kona-ba buat neʼebé la morál, naran katak la halo ida-neʼe. Maibé, hanoin hanesan neʼe mak sala. Ema neʼebé kontinua hanoin kona-ba hakarak neʼebé sala, ikusmai halo ninia hakarak neʼe sai makaʼas liután. Neʼe hanesan nia kria tentasaun ida, no nia rasik mak tenke hasees an husi tentasaun neʼe. Klaru katak dala ruma hanoin neʼebé sala bele mosu iha ita-nia neon. Xave mak halakon kedas hanoin hanesan neʼe no troka ho hanoin neʼebé loos. Hodi halo nuneʼe, ita prevene hanoin neʼebé sala atu la hamosu fali hakarak neʼebé makaʼas toʼo susar ba ita atu luta hasoru, no karik bele halo ita monu ba sala neʼebé sériu.—Flp 4:8; Kol 3:2; Tgo 1:​13-15.

14. Saida tan mak bele ajuda ita atu proteje ita-nia an husi tentasaun?

¹⁴ Saida tan mak ita bele halo atu proteje ita-nia an husi tentasaun? Ita presiza fiar metin katak halo tuir Jeová nia matadalan sempre lori benefísiu. Dala ruma susar ba ita atu iha hanoin, no hakarak neʼebé tuir Jeová nia hakarak, maibé se ita hakaʼas an atu halo tuir Jeová, ita sei sente kontente.

15. Oinsá mak hodi haburas hakarak neʼebé loos bele ajuda ita proteje ita-nia an husi tentasaun?

¹⁵ Ita presiza haburas hakarak neʼebé loos. Se ita aprende atu “odi buat neʼebé aat, no hadomi buat neʼebé diʼak”, ita sei hametin ita-nia hakarak atu halo buat neʼebé loos no hasees an husi situasaun neʼebé bele halo ita monu ba sala. (Amós 5:15) Bainhira ita iha hakarak neʼebé loos, neʼe sei ajuda ita atu la monu ba tentasaun neʼebé mosu derrepente.

16. Oinsá mak atividade espirituál ajuda ita atu nafatin matan-moris? (Haree mós foto.)

¹⁶ Oinsá mak ita bele haburas hakarak neʼebé loos? Neʼe mak hodi kontinua okupadu ho atividade espirituál. Bainhira ita tuir reuniaun sira ka haklaken, neʼe sei ajuda ita atu la monu ba sala. Tuir loloos, ita haburas ita-nia hakarak atu halo Jeová kontente. (Mt 28:​19, 20; Ebr 10:​24, 25) Hodi lee no estuda Bíblia no medita kona-ba neʼe sei hametin ita-nia domin ba buat neʼebé diʼak, no odi buat neʼebé aat. (Jos 1:8; Sal 1:​2, 3; 119:​97, 101) Hanoin-hetan, Jesus hatete ba ninia dixípulu sira: “Harohan beibeik, atu nuneʼe imi labele monu ba tentasaun.” (Mt 26:41) Nuʼudar ita koʼalia beibeik ba ita-nia Aman iha lalehan liuhusi orasaun, neʼe fó oportunidade ba Jeová atu ajuda ita no ita sei deside metin atu halo nia kontente.—Tgo 4:8.

KONTINUA MATAN-MORIS

17. Pedro kontinua luta hasoru ninia fraku saida?

¹⁷ Karik ita bele manán hasoru ita-nia fraku balu. Maibé karik ita mós iha fraku balu neʼebé ita presiza kontinua luta hasoru ba tempu kleur. Haree toʼok buat neʼebé akontese ba apóstolu Pedro. Tanba taʼuk ba ema, neʼe halo nia nega Jesus ba dala tolu. (Mt 26:​69-75) Haree hanesan Pedro manán ona ninia sentimentu taʼuk ba ema bainhira nia haklaken ho aten-brani iha Sinédriu nia oin. (Após 5:​27-29) Maski nuneʼe, tinan balu liutiha, nia “taʼuk ba ema sira husi grupu neʼebé hetan ona sirkunsizaun”. Tan neʼe ba tempu balu, nia para atu han hamutuk ho ema Kristaun husi nasaun seluk. (Gal 2:​11, 12) Pedro nia sentimentu taʼuk mosu fila fali. Karik nia la konsege halakon hotu ninia sentimentu taʼuk ba ema.

18. Tanbasá ita presiza kuidadu kona-ba ita-nia fraku sira?

¹⁸ Karik ita mós bele hasoru situasaun neʼebé hanesan ho Pedro. Oinsá? Dala ruma ita hanoin katak ita manán ona ita-nia fraku ruma, no tuirmai fraku neʼe mosu fali. Porezemplu, irmaun ida hatete: “Ba tinan 10 haʼu bele manán haʼu-nia fraku atu haree pornografia no haʼu hanoin katak haʼu-nia problema rezolve ona. Maibé loloos fraku neʼe nafatin iha, hein deʼit ba tempu neʼebé loos atu neʼe mosu fali.” Maski nuneʼe, irmaun neʼe kontinua luta hasoru ninia fraku. Nia rekoñese katak nia presiza halo buat ruma loroloron atu luta hasoru ninia fraku no karik nia presiza halo neʼe durante ninia moris tomak iha mundu aat neʼe. Ho ajuda husi ninia feen no katuas kongregasaun, nia bele iha forsa atu luta hasoru ninia fraku.

19. Saida mak ita bele halo atu ita-nia fraku sira la halo ita monu ba sala?

¹⁹ Saida mak ita bele halo atu nuneʼe fraku neʼebé ita sei iha la halo ita monu ba sala? Hodi halo tuir Jesus nia konsellu atu “matan-moris nafatin bá”. Maski durante tempu neʼebé Ita sente katak Ita-nia fiar metin hela, kontinua hasees an husi situasaun neʼebé bele lori Ita ba tentasaun. (1 Kor 10:12) Kontinua halo buat neʼebé ajuda ona Ita atu luta hasoru Ita-nia fraku sira. Provérbios 28:14 hatete: “Ksolok ba ema neʼebé matan-moris nafatin.”—2 Ped 3:14.

BENEFÍSIU HUSI MATAN-MORIS NAFATIN

20-21. (a) Benefísiu saida mak ita sei hetan nuʼudar ita proteje ita-nia an husi tentasaun? (b) Se ita halo ita-nia parte, Jeová sei halo saida mai ita? (2 Korinto 4:7)

²⁰ Ita bele hetan benefísiu se ita matan-moris hodi la monu ba tentasaun. Maski sala bele halo ita “haksolok ba tempu uitoan”, maibé hodi halo tuir Jeová nia matadalan mak lori ksolok neʼebé loos. (Ebr 11:25; Sal 19:8) Neʼe tanba Maromak kria ita atu halo tuir ninia matadalan sira. (Gén 1:27) Ita sei kontente tanba iha konxiénsia neʼebé moos no ita bele hetan moris rohan-laek.—1 Tim 6:12; 2 Tim 1:3; Jud 20, 21.

²¹ Sin, “isin fraku”. Maibé neʼe la dehan katak ita la iha esperansa. Jeová prontu atu ajuda ita ho ninia kbiit. (Lee 2 Korinto 4:7.) Hanoin-hetan katak Maromak sei fó mai ita kbiit neʼebé la hanesan baibain. Maibé ita presiza uza uluk ita rasik nia kbiit atu kontra hasoru tentasaun, tanba neʼe mak ita-nia responsabilidade. Se ita halo ita-nia parte, ita bele fiar katak Jeová sei hatán ita-nia orasaun atu fó mai ita kbiit neʼebé ita presiza. (1 Kor 10:13) Sin, ho Jeová nia ajuda, ita bele proteje ita-nia an atu la monu ba tentasaun.