Oinsá atu manán hasoru hakarak neʼebé sala

1. Ita hotu hasoru saida?

DALA ruma Ita iha hakarak neʼebé makaʼas atu halo buat neʼebé Jeová la gosta ka lae? Se nuneʼe, keta sai laran-kraik. Bíblia hatete: “Imi hetan tentasaun neʼebé baibain ema seluk mós hetan.” (1 Kor 10:13)a Neʼe katak maski Ita hasoru tentasaun naran deʼit, maibé Ita la mesak, no Jeová sei ajuda Ita atu manán.

2. Tentasaun hanesan saida mak karik ema Kristaun no estudante Bíblia balu hasoru? (Haree mós foto.)

² Bíblia mós hatete: “Ema ida-idak hetan koko liuhusi ninia hakarak rasik.” (Tgo 1:14) Neʼe katak ema ida-idak hasoru tentasaun neʼebé la hanesan. Porezemplu, karik ema Kristaun balu iha hakarak makaʼas atu halo relasaun seksuál ho ema neʼebé laʼós ninia kaben, ka relasaun seksuál entre mane ho mane ka feto ho feto. Ema neʼebé para ona atu haree pornografia, karik iha hakarak neʼebé makaʼas atu fila fali ba toman neʼe. Ema barak neʼebé uluk uza droga ka hemu tua barak mós hasoru situasaun neʼebé hanesan. Neʼe mak ezemplu balu neʼebé ema Kristaun no estudante Bíblia balu hasoru. Dala ruma ita hotu sente hanesan ho apóstolu Paulo neʼebé hakerek: “Bainhira haʼu hakarak halo buat neʼebé loos, buat neʼebé aat mós hamutuk ho haʼu.”—Rom 7:21.

3. Saida mak ema ida bele sente se nia sempre luta hasoru hakarak neʼebé sala?

³ Se Ita sempre luta hasoru hakarak neʼebé sala, karik Ita sente la iha forsa atu tahan, no sente la iha esperansa tanba hanoin katak Jeová la simu Ita. Maibé hanoin hanesan neʼe mak la loos! Tanbasá? Iha lisaun neʼe, ita sei buka-hatene resposta ba pergunta rua: (1) Sentimentu la iha forsa no la iha esperansa mai husi neʼebé? (2) Oinsá Ita bele manán hasoru hakarak neʼebé sala?

“AAT-NAʼIN” HAKARAK ITA ATU SENTE OINSÁ?

4. (a) Satanás hakarak ita atu sente oinsá? (b) Tanbasá ita bele fiar katak ita bele kontra hasoru hakarak neʼebé sala?

⁴ Satanás hakarak ita atu sente la iha forsa bainhira hasoru tentasaun. Jesus hatene ida-neʼe, tan neʼe nia hanorin ninia dixípulu sira atu halo orasaun: “Keta husik ami monu ba tentasaun, maibé salva ami husi aat-naʼin.” (Mt 6:13) Satanás hatete katak ema sei la halo tuir Jeová bainhira hasoru tentasaun. (Job 2:​4, 5) Tanbasá Satanás hanoin hanesan neʼe? Tanba nia mak ida neʼebé primeiru monu ba ninia hakarak neʼebé sala no la halo tuir Jeová. Tan neʼe, nia hanoin katak ita mós hanesan nia. Satanás mós hanoin katak Jesus neʼebé perfeitu mós sei monu ba tentasaun! (Mt 4:​8, 9) Maibé, hanoin toʼok: Ita la iha duni forsa atu kontra hasoru hakarak neʼebé sala ka lae? Lae duni! Ita konkorda ho apóstolu Paulo neʼebé dehan: “Iha situasaun hotu haʼu hetan forsa liuhusi nia neʼebé fó kbiit mai haʼu.”—Flp 4:13.

5. Oinsá mak ita hatene Jeová fiar duni katak ita bele kontra hasoru hakarak neʼebé sala?

⁵ La hanesan Satanás, Jeová fiar duni katak ita bele kontra hasoru hakarak neʼebé sala. Oinsá ita hatene? Jeová fó-hatene nanis katak ema-lubun boot mak sei liu terus boot. Hanoin toʼok, Jeová neʼebé nunka bosok mak hatete katak ema barak tebes mak sei tama mundu foun hodi “hatais roupa mutin”. Neʼe katak Jeová haree sira nuʼudar ema neʼebé moos ona. (Apok 7:​9, 13, 14) Klaru, Jeová hatene katak ita bele iha forsa atu kontra hasoru hakarak neʼebé sala.

6-7. Tanbasá Satanás hakarak ita hanoin katak ita la iha esperansa?

⁶ Satanás mós hakarak ita atu sente la iha esperansa. Nia hakarak ita hanoin katak tanba ita iha hakarak neʼebé sala, Jeová sei nunka simu ita. Maibé hanoin-hetan, Satanás mak ida neʼebé la iha esperansa, tanba Jeová sei nunka simu nia no nia sei lakon ba nafatin. (Gén 3:15; Apok 20:10) Satanás laran-moras tebes tanba nia la iha esperansa atu moris ba nafatin, maibé ita iha. Tan neʼe, nia koko makaʼas atu halo ita hanoin katak ita mak hanesan deʼit ho nia. Maibé ita iha duni esperansa! Bíblia hatete katak Jeová hakarak ajuda ita atu hetan moris rohan-laek. Nia “lakohi ema ida lakon maibé nia hakarak ema hotu atu arrepende sala”.—2 Ped 3:9.

⁷ Se ita hanoin katak ita la iha forsa no la iha esperansa, neʼe katak ita-nia hanoin mak tuir deʼit Satanás nia hakarak. Hodi komprende ida-neʼe bele ajuda ita deside metin atu kontra hasoru Satanás.—1 Ped 5:​8, 9.

TANBA ITA SALA-NAʼIN, NEʼE HALO ITA SENTE OINSÁ?

8. Liafuan “sala” refere ba saida deʼit? (Salmo 51:5) (Haree mós “Esplikasaun ba fraze”.)

⁸ Iha mós buat seluk tan neʼebé book ita atu hanoin katak ita la iha forsa no esperansa atu kontra hasoru hakarak neʼebé sala. Saida mak neʼe? Neʼe mak ita-nia kondisaun nuʼudar sala-naʼin neʼebé ita hetan husi Adão no Eva.b—Job 14:4; lee Salmo 51:5.

9-10. (a) Oinsá mak kondisaun nuʼudar sala-naʼin afeta Adão no Eva? (Haree mós dezeñu.) (b) Oinsá mak kondisaun nuʼudar sala-naʼin afeta ita?

⁹ Hanoin toʼok, oinsá mak kondisaun nuʼudar sala-naʼin afeta Adão no Eva? Depois halo tiha sala, sira subar husi Jeová no koko taka sira-nia isin. Sira halo hanesan neʼe tanba sira sente sala, moe, laran-susar, no la fiar an. Neʼe bele kompara hanesan Adão no Eva tama ba uma ho kuartu haat neʼebé xave metin. Sira bele muda husi kuartu ida ba kuartu seluk, maibé sira labele sai husi uma neʼe. Sira labele halai sees husi sira-nia kondisaun nuʼudar sala-naʼin.

¹⁰ Klaru katak ita-nia situasaun ladún hanesan ho Adão no Eva tanba Jesus nia sakrifísiu la aplika ba sira, maibé aplika ba ita. Liuhusi sakrifísiu neʼe, ita bele hetan perdua no iha konxiénsia neʼebé moos. (1 Kor 6:11) Maski nuneʼe, ita nafatin sala-naʼin. Tan neʼe, ita mós sente sala, moe, laran-susar, no la fiar an. Bíblia hatete katak sala kontinua kaer metin ema hotu, inklui ema neʼebé “la halo sala hanesan sala neʼebé Adão halo”. (Rom 5:14) Maski neʼe bele halo ita laran-kraik, maibé ita la presiza husik ida-neʼe atu halakon ita-nia forsa no esperansa. Ita bele duni manán hasoru sentimentu negativu. Oinsá?

11. Saida mak ita labele halo se ita sente la iha forsa, no tanbasá? (Roma 6:12)

¹¹ Tanba ita sala-naʼin, dala ruma ita sente la iha forsa atu kontra hasoru hakarak neʼebé sala. Neʼe hanesan lian ida mosu iha ita-nia neon no hatete katak ita sei nunka manán hasoru hakarak neʼebé sala. Maibé ita lakohi rona ba lian neʼe. Tanbasá? Tanba Bíblia hanorin katak ita labele husik sala atu kontinua ‘ukun ita nuʼudar liurai’. (Lee Roma 6:12.) Neʼe katak ita bele hili atu la halo tuir ita-nia hakarak neʼebé sala. (Gal 5:16) Jeová husu ita atu kontra hasoru tentasaun tanba nia fiar katak ita bele halo ida-neʼe. (Deut 30:​11-14; Rom 6:6; 1 Tes 4:3) Klaru, ita iha duni forsa atu kontra hasoru hakarak neʼebé sala.

12. Saida mak ita presiza halo bainhira ita sente la iha esperansa, no tanbasá?

¹² Nuneʼe mós, kuandu ita sente la iha esperansa, neʼe hanesan lian ida mosu iha ita-nia neon no hatete katak Jeová sei la simu ita tanba ita iha hakarak neʼebé sala. Maibé ita lakohi rona ba lian neʼe. Tanbasá? Tanba Bíblia hatete katak Jeová komprende ita-nia kondisaun nuʼudar sala-naʼin. (Sal 103:​13, 14) Nia “hatene buat hotu” kona-ba ita, inklui oinsá Adão nia sala afeta ita ida-idak. (1 João 3:​19, 20) Tan neʼe, se ita kontinua luta no la monu ba hahalok neʼebé sala, Jeová sei haree ita nuʼudar ema laran-loos. Oinsá ita bele fiar ida-neʼe?

13-14. Se ita iha hakarak neʼebé sala, neʼe katak Jeová sei la simu ita ka lae? Esplika toʼok.

¹³ Bíblia hatudu katak iha diferensa boot entre hakarak neʼebé sala no hahalok neʼebé sala. Dala ruma hakarak neʼebé sala bele mosu derrepente deʼit, maibé ita bele kontrola an atu la halo hahalok neʼebé sala. Porezemplu, iha apóstolu sira-nia tempu, ema Kristaun balu iha Korinto uluk halo hahalok omoseksuál. Paulo hakerek: “Uluk imi balu mós halo hanesan neʼe.” Neʼe katak sira-nia hakarak neʼe lakon ona ka lae? Karik lae, tanba baibain hakarak hanesan neʼe susar tebes atu fokit sai. Maibé, kuandu ema Kristaun ida kontrola an no la halo tuir ninia hakarak neʼebé sala, Jeová sei simu nia no haree nia nuʼudar ema neʼebé “fase moos ona”.—1 Kor 6:​9-11.

¹⁴ Nuneʼe mós ho Ita, se Ita luta hasoru daudaun hakarak neʼebé sala, Ita bele manán ida-neʼe. Maski Ita labele halakon ida-neʼe husi Ita-nia neon ho kompletu, maibé Ita bele kontrola an no tahan hasoru ‘Ita-nia hakarak no hanoin rasik’. (Éf 2:3) Saida mak bele ajuda Ita atu manán hasoru hakarak neʼebé sala?

OINSÁ ATU MANÁN?

15. Atu manán hasoru hakarak neʼebé sala, tanbasá ita presiza rekoñese ita-nia fraku?

¹⁵ Atu manán hasoru hakarak neʼebé sala, Ita presiza rekoñese Ita-nia fraku. Kuidadu bá atu la ‘lohi Ita-nia an’. (Tgo 1:22) Porezemplu, ema neʼebé iha problema kona-ba tua karik hanoin katak ninia problema ladún boot se kompara ho ema seluk neʼebé hemu tua barak liu. Ka ema neʼebé iha problema kona-ba pornografia karik koko atu fó-sala ema seluk hodi dehan: “Haʼu sei la monu ba problema neʼe se haʼu-nia feen hatudu domin mai haʼu.” Hanoin hanesan neʼe sei halo fasil ba Ita atu monu ba tentasaun. Tan neʼe, keta buka razaun atu halo buat neʼebé sala. Ita mak iha responsabilidade ba Ita-nia hahalok.—Gal 6:7.

16. Oinsá mak Ita bele deside metin atu la monu ba tentasaun?

¹⁶ Ita mós presiza deside metin atu la monu ba tentasaun. (1 Kor 9:​26, 27; 1 Tes 4:4; 1 Ped 1:​15, 16) Buka-hatene saida mak halo Ita fraku liu no bainhira. Karik iha situasaun balu ka iha tempu balu neʼebé halo Ita fraku toʼo monu ba tentasaun. Porezemplu, karik Ita sente fraku bainhira Ita kole ka iha kalan-boot. Se nuneʼe, Ita presiza prepara Ita-nia an no deside nanis saida mak Ita sei halo bainhira situasaun neʼe mosu. Tempu neʼebé diʼak atu halo nuneʼe mak antes tentasaun mosu.—Prov 22:3.

17. Saida mak ita aprende husi José nia ezemplu? (Génesis 39:​7-9) (Haree mós dezeñu.)

¹⁷ Hanoin toʼok saida mak José halo bainhira Potifar nia feen hakarak toba ho nia. Nia dehan kedas katak nia lakohi. (Lee Génesis 39:​7-9.) Saida mak ita bele aprende? José deside nanis ona atu halo buat neʼebé loos antes Potifar nia feen tenta nia. Ita mós bele deside nanis atu halo buat neʼebé loos antes tentasaun mosu. Hodi halo nuneʼe, kuandu Ita hasoru tentasaun, fasil ba Ita atu halo tuir buat neʼebé Ita deside tiha ona.

“KONTINUA KOKO IMI-NIA AN”

18. Oinsá mak Ita bele manán hasoru hakarak neʼebé sala? (2 Korinto 13:5)

¹⁸ Atu manán hasoru hakarak neʼebé sala, Ita presiza “kontinua koko” Ita-nia an. (Lee 2 Korinto 13:5.) Buka-hatene beibeik kona-ba Ita-nia hanoin no hahalok, no halo mudansa se presiza. Porezemplu, maski Ita konsege tahan hasoru tentasaun, Ita bele husu Ita-nia an: ‘Haʼu presiza tempu hira atu dehan lae?’ Se Ita rekoñese katak tempu balu liu tiha mak Ita foin dehan lae, keta fó-sala Ita-nia an. Hanoin kona-ba buat neʼebé Ita bele halo atu proteje an kuandu tentasaun mosu fali. Husu Ita-nia an: ‘Se hanoin neʼebé sala mosu iha haʼu-nia neon, haʼu halakon kedas hanoin neʼe ka lae? Atividade halimar neʼebé haʼu hili halo susar mai haʼu atu tahan hasoru tentasaun ka lae? Bainhira dezeñu foʼer mosu, haʼu hasees an kedas atu la haree ka lae? Haʼu komprende ka lae katak Jeová nia matadalan mak sempre diʼak maski haʼu tenke haburas hahalok kontrola an?’—Sal 101:3.

19. Oinsá mak desizaun kiʼik neʼebé la matenek bele halo susar ba ita atu kontra hasoru hakarak neʼebé sala?

¹⁹ Ita mós lakohi buka razaun ba ita-nia an. Bíblia hatete: “Laran mak makerek liu fali buat hotu-hotu no perigozu.” (Jer 17:9) Jesus hatete katak “husi laran mak mosu hanoin aat” ka buka razaun oioin. (Mt 15:19) Porezemplu, ema neʼebé uluk haree pornografia karik hanoin katak la sala atu haree foto neʼebé book ema atu iha hanoin foʼer, importante mak la haree foto molik. Ka ema neʼe hanoin katak la sala atu imajina kona-ba buat sira-neʼe, naran katak la halo ida-neʼe. Se ema ruma iha hanoin hanesan neʼe, neʼe hanesan nia “planu nanis kona-ba oinsá atu halo tuir hakarak isin nian”. (Rom 13:14) Oinsá mak Ita bele hasees an husi situasaun hanesan neʼe? Kuidadu atu la halo desizaun kiʼik sira neʼebé la matenek toʼo ikusmai book Ita atu halo desizaun boot neʼebé la matenek, hanesan deside atu halo hahalok sala.c Hasees an husi “hanoin aat” ka buka razaun atu halo hahalok sala.

20. Ita iha esperansa saida iha mundu foun, no ajuda hanesan saida mak ita hetan agora?

²⁰ Hanesan ita aprende ona, ho Jeová nia ajuda, ita bele iha forsa atu bele manán hasoru tentasaun. No mós, tanba Jeová mak laran-sadiʼa, ita iha esperansa atu moris ba nafatin. Iha mundu foun, ita sei serbí Jeová ho neon no laran neʼebé moos! Antes tempu neʼe, ita bele fiar metin katak ita iha duni forsa no esperansa atu kontra hasoru hakarak neʼebé sala. Se ita hakaʼas an, Jeová sei haraik bensaun no ita bele manán!