Oinsá funu no konflitu sei remata?

MAROMAK SEI HALAKON EMA NIA GOVERNU

Maromak sei halakon ema nia governu iha funu ida neʼebé Bíblia bolu nuʼudar funu Armagedon.a (Apokalipse 16:16) Iha tempu neʼebá, “liurai sira iha mundu tomak” sei halibur hamutuk atu “bá funu iha Maromak neʼebé Kbiit Boot Liu Hotu nia loron boot”. (Apokalipse 16:14) Maromak sei uza funu Armagedon atu halakon funu hotu.

Maromak sei troka ema nia governu ho ninia Ukun ka governu neʼebé ukun husi lalehan no sei nunka lakon. (Daniel 2:44) Maromak hili ninia Oan-Mane Jesus Kristu nuʼudar Liurai. (Isaias 9:​6, 7; Mateus 28:18) Jesus hanorin ninia dixípulu sira atu halo orasaun kona-ba Ukunb neʼe. (Mateus 6:​9, 10) Ema hotu sei moris ho unidade bainhira governu ida deʼit mak ukun mundu tomak no Jesus mak sai nuʼudar Ukun-Naʼin.

Jesus la hanesan ho ukun-naʼin sira iha mundu neʼe, nia sei la uza ninia kbiit atu buka diʼak ba ninia an rasik. Jesus sei ukun ho justisa no sei la todan ba sorin. Tan neʼe ema sei la hasoru tan situasaun neʼebé la justisa tanba sira-nia rasa, nasionalidade, no suku. (Isaias 11:​3, 4) No ema la presiza luta ba sira-nia direitu. Tanbasá? Tanba Jesus sei tau matan ba ema ida-idak. “Nia sei salva ema kiak neʼebé halerik atu husu ajuda, no nia sei salva ema kiʼik no mós sira hotu neʼebé la iha ema atu ajuda sira. . . . Nia sei salva sira husi ema neʼebé hanehan sira no husi violénsia.”—Salmo 72:​12-14.

Maromak nia Ukun sei halakon armas hotu husi mundu. (Miqueias 4:3) Ukun neʼe mós sei halakon ema aat neʼebé kontinua halo funu no halo aat ba ema seluk. (Salmo 37:​9, 10) Mane, feto, no labarik sei hela iha mundu ho seguru.—Ezequiel 34:28.

Iha Maromak nia Ukun okos, ema hotu sei iha moris neʼebé diʼak liu. Ukun neʼe sei halakon problema hotu neʼebé hamosu funu hanesan kiak, rai-hamlaha, no la iha hela-fatin. Ema hotu sei iha hahán barak neʼebé saudavel no mós iha hela-fatin neʼebé diʼak.—Salmo 72:16; Isaias 65:​21-23.

Maromak nia Ukun sei halakon rezultadu aat oioin husi funu, inklui kanek iha dalan fíziku, mentál, no mós emosaun. Ema neʼebé mate ona sei hetan moris-hiʼas iha mundu. (Isaias 25:8; 26:19; 35:​5, 6) Família sira sei hasoru malu fali no memória aat kona-ba funu sei la iha tan tanba “buat sira neʼebé uluk nian lakon tiha ona”.—Apokalipse 21:4.

MAROMAK SEI HALAKON SALA

Iha Maromak nia Ukun okos, ema sei adora Maromak loos mesak deʼit naran Jeovác, “Maromak domin no dame nian”. (2 Korinto 13:11) Ema sei aprende oinsá atu moris hamutuk ho dame. (Isaias 2:​3, 4; 11:9) Ema hotu neʼebé halo tuir buat neʼebé sira aprende sei sai livre husi sala.—Roma 8:​20, 21.

MAROMAK SEI HALAKON SATANÁS NO ANJU AAT SIRA

Maromak nia Ukun sei halakon Satanás no anju aat sira tanba sira book ema atu halo funu. (Apokalipse 20:​1-3, 10) Bainhira sira lakon tiha, “dame sei sai barak”.—Salmo 72:7.

Ita bele iha konfiansa katak Maromak nia promesa atu halakon funu no konflitu sei sai loos. Nia iha kbiit no hakarak atu halakon funu.

• Maromak iha matenek no kbiit atu halakon funu no violénsia. (Job 9:4) La iha buat ida mak imposivel ba Maromak.—Job 42:2.

• Maromak la gosta haree ema terus. (Isaias 63:9) Nia mós “odi ema hotu neʼebé gosta violénsia”.—Salmo 11:5.

• Maromak sempre kumpre ninia liafuan, no nia labele bosok.—Isaias 55:​10, 11; Tito 1:2.