Banati-tuir Jeová no Jesus nia dalan atu hanoin

1-2. Hadomi Jeová envolve saida deʼit? Oinsá Jesus hatudu katak nia hadomi Jeová ho neon tomak?

“IMI tenke hadomi Jeová, imi-nia Maromak, ho imi-nia laran tomak, ho imi-nia moris tomak, ho imi-nia kbiit tomak no ho imi-nia neon tomak.” (Lc 10:27) Jesus hatete katak neʼe mak mandamentu neʼebé importante liu iha Moisés nia Ukun-Fuan. Ita-nia domin ba Jeová envolve ita-nia laran, neʼe inklui ita-nia hakarak, sentimentu, no emosaun. Neʼe mós envolve ita-nia moris, kbiit, no neon, inklui dalan neʼebé ita hanoin. Klaru katak ita nunka bele komprende Jeová nia hanoin iha dalan kompletu, maibé ita presiza hakaʼas an atu iha hanoin hanesan Jeová nia hanoin. Ita bele halo ida-neʼe hodi estuda “Kristu nia hanoin” tanba Kristu haleno ninia Aman nia hanoin iha dalan neʼebé perfeitu.—1 Kor 2:16.

² Jesus hadomi Jeová ho neon tomak. Nia hatene saida mak Maromak hakarak husi nia, no nia deside metin atu halo tuir maski hasoru terus. Tanba Jesus fokus atu halo ninia Aman kontente, nia la husik buat ida atu sai importante liu fali ninia Aman nia hakarak.

3. Saida mak apóstolu Pedro aprende husi Jesus, no Pedro anima ema Kristaun atu halo saida? (1 Pedro 4:1)

³ Pedro no apóstolu sira seluk iha oportunidade furak atu gasta tempu hamutuk ho Jesus no aprende ninia hanoin. Bainhira Pedro hakerek ninia karta primeiru, nia anima ema Kristaun atu prepara sira-nia an ho hanoin neʼebé hanesan Kristu nian. (Lee 1 Pedro 4:1.) Iha lian orijinál, liafuan “prepara imi-nia an”, fó ideia kona-ba soldadu neʼebé prepara an ho armas atu bá funu. Entaun, se ema Kristaun ida aprende atu iha hanoin hanesan Jesus nian, nia sei iha armas neʼebé diʼak atu luta hasoru ninia hakarak neʼebé sala no Satanás nia mundu.—2 Kor 10:​3-5; Éf 6:12.

4. Iha lisaun neʼe, ita sei aprende kona-ba saida?

⁴ Iha lisaun neʼe, ita sei buka-hatene Jesus nia dalan atu hanoin no haree oinsá ita bele banati-tuir. Ita sei buka-hatene oinsá ita bele (1) iha hanoin hanesan Jeová nian, neʼebé sei ajuda ita hotu atu iha hanoin ida deʼit, (2) hatudu haraik an, no (3) iha hanoin neʼebé loos hodi sadere ba Jeová liuhusi orasaun.

IHA HANOIN HANESAN JEOVÁ NIAN

5. Iha situasaun saida mak Pedro nia hanoin la hanesan ho Jeová nian?

⁵ Hanoin toʼok situasaun ida bainhira Pedro nia hanoin la hanesan ho Jeová nia hanoin. Jesus hatete ba apóstolu sira katak nia sei bá Jeruzalein, tuirmai ema sei entrega nia ba ulun-naʼin relijiaun sira, ema sei fó-terus ba nia, no oho nia. (Mt 16:21) Pedro hatene katak Jesus mak Mesias neʼebé sei salva Maromak nia povu. Entaun, karik susar ba Pedro atu fiar katak Jeová sei husik ema atu oho Jesus. (Mt 16:16) Tan neʼe, Pedro lori Jesus ba sorin no hatete: “Naʼi, hatudu laran-sadiʼa ba Ita-nia an. Susar sira-neʼe sei la kona Ita.” (Mt 16:22) Pedro ho Jesus iha hanoin neʼebé la hanesan tanba Pedro la hanoin tuir Jeová nia hanoin.

6. Oinsá mak Jesus hatudu katak nia haleno Jeová nia hanoin iha dalan kompletu?

⁶ Jesus haleno ninia Aman nia hanoin iha dalan kompletu. Jesus hatete ba Pedro: “Sees tiha husi haʼu, Satanás! Ó hanesan fatuk sidi nian ba haʼu tanba ó-nia hanoin la tuir Maromak nian, maibé tuir ema nian.” (Mt 16:23) Karik Pedro iha motivu neʼebé diʼak, maibé Jesus la simu Pedro nia hanoin. Neʼe mak lisaun importante mai ita. Jesus hatene katak nia presiza hetan terus no mate atu kumpre Jeová nia hakarak. Iha situasaun neʼe, Pedro aprende katak nia presiza iha hanoin hanesan ho Jeová nian.

7. Oinsá mak Pedro hatudu katak nia hakarak iha hanoin hanesan Jeová nian? (Haree dezeñu.)

⁷ Liutiha tempu balu, Pedro hatudu katak nia hakarak atu iha hanoin hanesan Jeová nian. Bainhira tempu toʼo ona ba Jeová atu simu ema husi nasaun seluk neʼebé la hetan sirkunsizaun, nia haruka Pedro atu haklaken ba Cornélio, ema husi nasaun seluk neʼebé sei sai ema Kristaun primeiru. Baibain ema Judeu la ransu ho ema husi nasaun seluk, tan neʼe Pedro presiza hetan ajuda atu prepara an ba ninia knaar. Bainhira Pedro rekoñese Maromak nia hakarak ba ema husi nasaun seluk, nia hadiʼa ninia hanoin. Rezultadu mak nia bá Cornélio nia uma “la ho laran-todan”. (Após 10:​28, 29) Pedro haklaken ba Cornélio no ninia umakain tomak, no sira hetan batizmu.—Após 10:​21-23, 34, 35, 44-48.

8. Oinsá mak ita bele hatudu katak ita iha hanoin hanesan ho Jeová nian? (1 Pedro 3:8 no nota-rodapé)

⁸ Tinan balu liu tiha, Pedro anima maluk Kristaun atu “iha hanoin neʼebé hanesan”. (Lee 1 Pedro 3:8 no nota-rodapé.) Nuʼudar Jeová nia povu, ita bele iha hanoin neʼebé hanesan ho irmaun-irmán sira hodi tuir Jeová nia hanoin neʼebé fó sai iha Bíblia. Porezemplu, Jesus haruka ita atu buka uluk Maromak nia Ukun. (Mt 6:33) Tan neʼe, bainhira irmaun ka irmán ida deside atu foti pioneiru ka serbí Jeová tempu-tomak, diʼak liu ita koʼalia pozitivu kona-ba ninia planu no oferese ajuda, duké fó sujestaun ba nia atu hili dalan neʼebé fasil.

HATUDU HARAIK AN

9-10. Oinsá mak Jesus hatudu haraik an?

⁹ Iha kalan antes Jesus mate, nia hanorin Pedro no apóstolu seluk lisaun importante kona-ba haraik an. Antes neʼe, Jesus haruka ona Pedro no João atu prepara buat oioin ba ninia han-kalan ikus. Karik buat neʼebé sira prepara inklui basia no toalla, hodi nuneʼe bele fase bainaka sira-nia ain antes han-kalan. Maibé sé mak sei hatudu haraik an atu fase ema seluk nia ain?

¹⁰ Jesus la dada an, no hatudu katak nia mak haraik an tebes. Apóstolu sira hakfodak hodi haree Jesus halo serbisu neʼebé baibain atan sira mak halo. Nia hasai ninia roupa liʼur, kesi toalla iha ninia knotak, tau bee iha basia laran, no komesa fase apóstolu sira-nia ain. (João 13:​4, 5) Jesus fase apóstolu sira hotu nia ain, no karik neʼe han tempu balu. Nia fase Judas nia ain maski hatene katak lakleur tan Judas sei faʼan nia. Maski nuneʼe, Jesus haraik an hodi halo hotu ninia serbisu. Tuirmai, Jesus ho pasiénsia esplika: “Imi komprende buat neʼebé haʼu foin halo ba imi ka lae? Imi bolu haʼu ‘Mestre’ no ‘Naʼi’, no ida-neʼe loos, tanba haʼu hanesan neʼe duni. Entaun, maski haʼu mak Naʼi no Mestre, maibé haʼu fase imi-nia ain, se nuneʼe imi mós tenke fase imi-nia maluk nia ain.”—João 13:​12-14.

11. Oinsá mak Pedro hatudu katak nia aprende ona atu hatudu haraik an? (1 Pedro 5:5 no nota-rodapé) (Haree mós dezeñu.)

¹¹ Pedro aprende husi Jesus nia haraik an. Depois Jesus saʼe ba lalehan, Pedro halo milagre ida hodi kura mane neʼebé ain-aat husi moris mai kedas. (Após 1:​8, 9; 3:​2, 6-8) Neʼe dada ema barak nia atensaun. (Após 3:11) Maibé Pedro lakohi dada atensaun ba ninia an maski nia moris iha kultura neʼebé ema barak hakarak atu iha naran-boot. Duké buka glória ba ninia an, nia hatudu haraik an no dehan ba ema atu fó hahiʼi ba Jeová no Jesus, hodi hatete: “Liuhusi [Jesus nia] naran no liuhusi ami-nia fiar ba ninia naran mak ema neʼe, neʼebé imi haree no hatene, sai forsa fali.” (Após 3:​12-16) Tuirmai, Pedro hakerek ba ema Kristaun atu haburas haraik an hodi uza liafuan neʼebé fó ideia katak tau haraik an hanesan roupa. Neʼe fó-hanoin ita kona-ba tempu neʼebé Jesus kesi toalla iha ninia knotak no fase apóstolu sira-nia ain.—Lee 1 Pedro 5:5 no nota-rodapé.

12. Hanesan Pedro, oinsá mak ita bele haburas haraik an?

¹² Ita bele banati-tuir Pedro atu haburas haraik an. Hanoin-hetan katak haraik an neʼebé loos laʼós deʼit ho liafuan. Fraze neʼebé Pedro uza ba “haraik an” envolve dalan neʼebé ita hanoin kona-ba ita-nia an no ema seluk. Ita serbí ema seluk tanba ita hadomi Jeová no ema, laʼós tanba hakarak ema gaba ita. Ita hatudu katak ita mak ema neʼebé haraik an se ita kontente serbí Jeová no irmaun-irmán sira maski ema la haree buat neʼebé ita halo.—Mt 6:​1-4.

“IHA HANOIN NEʼEBÉ LOOS”

13. Esplika toʼok “iha hanoin neʼebé loos” envolve saida deʼit.

¹³ “Iha hanoin neʼebé loos” envolve saida deʼit? (1 Ped 4:7) Se ita iha hanoin neʼebé loos, ita sei hakaʼas an atu foti desizaun neʼebé haleno Jeová nia hanoin. Ita hatene katak la iha buat ida mak importante liu fali ita-nia relasaun ho Jeová. Ita mós la hanoin demais kona-ba ita-nia an no rekoñese katak ita-nia koñesimentu mak limitadu. Se ita iha hanoin neʼebé loos, ita sei sadere ba Jeová hodi halo orasaun beibeik no buka ninia matadalan.a

14. Oinsá mak Pedro la sadere ba Jeová?

¹⁴ Iha Jesus nia kalan ikus, nia fó avizu ba ninia dixípulu sira: “Iha kalan neʼe, imi hotu sei sidi tanba buat neʼebé sei akontese ba haʼu.” Maibé Pedro ho fiar an hatete: “Maski ema seluk hotu sidi tanba buat neʼebé akontese ba Ita, maibé haʼu sei nunka sidi!” Iha kalan neʼebá, Jesus hatete ba ninia dixípulu balu: “Matan-moris nafatin bá no harohan beibeik.” (Mt 26:​31, 33, 41) Se Pedro halo tuir, nia sei brani atu fó sai katak nia mak Jesus nia dixípulu ida. Maibé realidade mak Pedro nega Jesus, no ikusmai nia arrepende an tebes.—Mt 26:​69-75.

15. Saida mak ajuda Jesus atu iha hanoin neʼebé loos durante ninia kalan ikus?

¹⁵ Jesus sadere ba Jeová ho laran tomak. Maski Jesus mak perfeitu, maibé nia halo orasaun beibeik. Neʼe ajuda nia atu kumpre Jeová nia hakarak ho aten-brani. (Mt 26:​39, 42, 44; João 18:​4, 5) Klaru, Pedro nunka haluha katak Jesus halo orasaun dala barak durante ninia kalan ikus.

16. Oinsá mak Pedro hatudu katak nia haburas ona hanoin neʼebé loos? (1 Pedro 4:7)

¹⁶ Pedro aprende atu sadere liután ba Jeová liuhusi orasaun. Bainhira Jesus moris hiʼas ona, nia fó-hatene Pedro no apóstolu sira seluk katak sira sei simu espíritu santu hodi bele haklaken liafuan diʼak. Maibé Jesus husu sira atu hein iha Jeruzalein toʼo ida-neʼe akontese. (Lc 24:49; Após 1:​4, 5) Nuʼudar Pedro hein, nia halo saida? Pedro ho ninia maluk sira “kontinua halo orasaun”. (Após 1:​13, 14) Liutiha tempu balu, iha Pedro nia karta primeiru, nia anima maluk Kristaun atu iha hanoin neʼebé loos no sadere ba Jeová liuhusi orasaun. (Lee 1 Pedro 4:7.) Pedro aprende atu sadere ba Jeová no sai hanesan ai-riin neʼebé hametin kongregasaun.—Gal 2:9.

17. Ita presiza kontinua halo saida? (Haree mós foto.)

¹⁷ Atu iha hanoin neʼebé loos, ita tenke halo orasaun beibeik ba Jeová. Ita rekoñese katak ita presiza kontinua halo orasaun maski ita iha ona abilidade atu halo buat ruma ho didiʼak. Se ita halo nuneʼe, bainhira ita presiza halo desizaun importante ruma, ita sei halo uluk orasaun ba Jeová atu husu ninia matadalan hodi fiar metin katak Jeová hatene buat neʼebé diʼak liu mai ita.

18. Oinsá mak ita bele banati-tuir Jeová?

¹⁸ Ita agradese tebes tanba Jeová kria ita ho abilidade atu haleno ninia hahalok furak sira. (Gén 1:26) Klaru katak ita labele banati-tuir Jeová ho perfeitu. (Isa 55:9) Maski nuneʼe, hanesan Pedro, mai ita kontinua hakaʼas an atu iha hanoin hanesan Jeová nian, hatudu haraik an, no iha hanoin neʼebé loos.