2 Timóteo 1:7—“Espíritu neʼebé Maromak fó ba ita la hamosu hahalok taʼuk-teen”

“Tanba espíritu neʼebé Maromak fó ba ita la hamosu hahalok taʼuk-teen, maibé fó ita kbiit, domin no hanoin neʼebé loos.”—2 Timóteo 1:7, Tradusaun Mundu Foun.

“Maromak nia prezente neʼe laʼós ema taʼuk-teen nia neon, maibé espíritu kbiit, domin no ukun an nian.”—2 Timóteo 1:7, Liafuan diak ba imi, segundu edisaun.

Signifikadu husi 2 Timóteo 1:7

Maromak bele ajuda ema atu brani halo buat neʼebé loos. Maromak lakohi ema atu sai “taʼuk-teen”. Sentimentu taʼuk bele hanetik ema ida atu halo buat neʼebé halo Maromak kontente.

Hanoin toʼok kona-ba hahalok tolu husi versíkulu neʼe, neʼebé Maromak fó atu ajuda ema hodi bele manán sentimentu taʼuk.

“Kbiit.” Ema Kristaun sira konsege serbí Maromak ho aten-brani, maski hasoru inimigu barak no situasaun perigu oioin. Sira la dada an tanba sente taʼuk. (2 Korinto 11:23-27) Oinsá mak sira bele halo nuneʼe? Apóstolu Paulo dehan: “Tanba iha situasaun hotu haʼu hetan forsa liuhusi nia neʼebé fó kbiit mai haʼu.” (Filipe 4:13) Maromak bele fó “kbiit neʼebé la hanesan baibain” ba ema neʼebé adora nia atu sira bele manán susar naran deʼit.—2 Korinto 4:7.

“Domin.” Domin neʼebé boot ba Maromak bele ajuda ema Kristaun atu defende buat neʼebé loos ho aten-brani. Hanesan neʼe mós, domin ba ema seluk book ema Kristaun atu hanoin uluk ema seluk nia diʼak duké ninia diʼak rasik. Nia halo nuneʼe, maski hasoru ema neʼebé kontra ka situasaun perigu.—João 13:34; 15:13.

“Hanoin neʼebé loos.” Iha Bíblia, fraze “hanoin neʼebé loos” baibain refere ba ema Kristaun nia kapasidade atu foti desizaun diʼak neʼebé bazeia ba Bíblia. Ema neʼebé iha hanoin neʼebé loos bele tetu didiʼak situasaun, maski hasoru susar oioin. Nia bele foti desizaun sira neʼebé haleno Maromak nia hanoin, tanba nia hatene katak ninia relasaun ho Maromak mak importante liu fali ema seluk nia opiniaun.

Kontestu husi 2 Timóteo 1:7

Livru Segundu Timóteo iha Bíblia mak karta husi apóstolu Paulo ba ninia belun no maluk serbisu-naʼin Timóteo. Iha karta neʼe, Paulo anima Timóteo neʼebé idade kiʼik liu fali nia atu kontinua serbí Maromak ho badinas. (2 Timóteo 1:1, 2) Karik Timóteo mak moedór no neʼe bele hanetik Timóteo atu halaʼo atividade oioin iha kongregasaun Kristaun. (1 Timóteo 4:12) Maibé Paulo fó-hanoin fali ba Timóteo kona-ba prezente neʼebé nia simu ona husi Maromak, neʼe mak knaar espesiál atu serbí iha kongregasaun. Paulo anima Timóteo atu la dada an atu uza ninia podér nuʼudar katuas kongregasaun. No mós la dada an atu haklaken liafuan diʼak, no tahan situasaun susar neʼebé akontese tanba fiar.—2 Timóteo 1:6-8.

Maski Paulo hakerek liafuan sira-neʼe ba Timóteo, maibé neʼe hametin ema hotu neʼebé hakarak serbí Maromak ohin loron atu fiar katak Maromak sei fó ajuda neʼebé sira presiza hodi bele serbí Nia ho susesu, maski hasoru susar naran deʼit.