Kontinua laʼo tuir fiar

1. Tanbasá apóstolu Paulo sente kontente ho ninia moris?

APÓSTOLU Paulo hatene katak lakleur tan nia sei hetan kastigu-mate, maibé nia iha razaun barak atu sente kontente. Bainhira hanoin fali kona-ba ninia moris, nia hatete: “Haʼu halai ona toʼo rohan, haʼu moris tuir ona fiar.” (2 Tim 4:​6-8) Paulo halo ona desizaun neʼebé diʼak nuʼudar ema Kristaun, no nia fiar metin katak Jeová mós kontente ho nia. Ita mós hakarak halo desizaun neʼebé diʼak no halo Jeová kontente. Oinsá ita bele halo ida-neʼe?

2. Laʼo tuir fiar katak sá?

² Paulo koʼalia kona-ba ninia an no fiar-naʼin Kristaun seluk hodi dehan: “Ita laʼo tuir fiar, laʼós tuir buat neʼebé ita haree.” (2 Kor 5:7) Paulo nia liafuan katak sá? Iha Bíblia, liafuan “laʼo” dala ruma refere ba dalan neʼebé ema ida halaʼo moris. Bainhira ema ida laʼo tuir buat neʼebé nia haree, nia halo desizaun neʼebé bazeia deʼit ba buat neʼebé nia haree, rona, no sente. Maibé bainhira ema ida laʼo tuir fiar, nia halo desizaun neʼebé bazeia ba ninia fiar ba Maromak Jeová. Ninia hahalok hatudu sai ninia fiar katak nia sei hetan benefísiu bainhira halo tuir Jeová nia matadalan sira iha Bíblia.—Sal 119:66; Ebr 11:6.

3. Benefísiu saida mak ita hetan se ita laʼo tuir fiar? (2 Korinto 4:18)

³ Ita hotu dala ruma halo desizaun hodi tuir buat neʼebé ita haree, rona, no sente. Maibé, se ita halo desizaun importante ruma hodi tuir deʼit buat neʼebé ita haree, rona, no sente, neʼe sei lori problema. Tanbasá? Tanba neʼe bele lohi ita. Se ita halo desizaun hodi tuir deʼit buat neʼebé ita haree, rona, no sente, karik ita sei halo buat neʼebé la tuir Jeová nia hakarak. (Ecle 11:9; Mt 24:​37-39) Maibé bainhira ita laʼo tuir fiar, ita sei halo desizaun neʼebé “halo Naʼi kontente”. (Éf 5:10) Hodi halo tuir Jeová nia matadalan sei fó ita dame no kontente neʼebé loos. (Sal 16:​8, 9; Isa 48:​17, 18) No se ita kontinua laʼo tuir fiar, ita sei hetan moris ba nafatin iha futuru.—Lee 2 Korinto 4:18.

4. Ita hotu presiza husu pergunta saida deʼit?

⁴ Ita hotu presiza husu ba ita-nia an: Saida mak book haʼu atu foti desizaun neʼe? Haʼu foti desizaun tuir deʼit buat neʼebé haʼu haree ka lae? Ka haʼu foti desizaun tuir Jeová nia matadalan? Mai ita haree oinsá mak ita bele kontinua laʼo tuir fiar iha área importante tolu: Bainhira hili serbisu, bainhira hili pár, no bainhira simu matadalan husi ita-nia organizasaun. Iha situasaun ida-idak, ita sei koʼalia kona-ba saida mak ita presiza hanoin hodi bele halo desizaun neʼebé diʼak.

BAINHIRA HILI SERBISU

5. Baibain ita hanoin kona-ba saida bainhira hili serbisu?

⁵ Ita hotu hakarak tau matan ba ita-nia presiza no mós família. (Ecle 7:12; 1 Tim 5:8) Serbisu balu hetan saláriu boot, no neʼe ajuda serbisu-naʼin atu tau matan ba família nia presiza no bele mós rai osan atu uza iha futuru. Maibé, serbisu balu hetan saláriu kiʼik no bele uza deʼit atu tau matan ba família nia presiza báziku. Bainhira hili serbisu, klaru katak ita hanoin kona-ba saláriu neʼebé ita sei simu. Maibé, se ita hanoin deʼit kona-ba neʼe, neʼe katak ita la laʼo tuir fiar.

6. Oinsá mak ita bele laʼo tuir fiar bainhira hili serbisu? (Ebreu 13:5)

⁶ Se ita laʼo tuir fiar, ita mós sei hanoin didiʼak kona-ba oinsá mak serbisu neʼe kona ita-nia relasaun ho Jeová. Ita bele husu ita-nia an: ‘Serbisu neʼe envolve ho buat neʼebé Jeová odi ka lae?’ (Prov 6:​16-19) ‘Neʼe sei hanetik haʼu atu tuir reuniaun, bá haklaken, estuda Bíblia, no halo haʼu dook husi família ba tempu naruk ka lae?’ (Flp 1:10) Se resposta ba pergunta sira-neʼe mak sin, diʼak atu la simu serbisu neʼe maski susar ba ita atu buka serbisu. Tanba ita laʼo tuir fiar, ita sei halo desizaun neʼebé hatudu katak ita fiar Jeová sei tau matan mai ita.—Mt 6:33; lee Ebreu 13:5.

7-8. Oinsá mak irmaun Javier laʼo tuir fiar? (Haree mós foto.)

⁷ Irmaun Javiera iha Amérika Súl, rekoñese katak importante atu laʼo tuir fiar. Nia hatete: “Haʼu aplika ba serbisu ida neʼebé haʼu gosta tebes no ho saláriu boot ba dala rua liu fali haʼu-nia serbisu uluk.” Maibé, Javier mós hakarak atu sai pioneiru. Nia hatutan tan: “Haʼu simu konvite atu tuir entrevista ba serbisu neʼe. Antes entrevista, haʼu halo orasaun tanba haʼu fiar katak Jeová hatene buat neʼebé diʼak liu mai haʼu. Haʼu hakarak hetan serbisu ho saláriu boot, maibé haʼu sei la simu serbisu neʼe se neʼe la ajuda haʼu atu kumpre haʼu-nia planu espirituál.”

⁸ Javier hatete: “Durante entrevista, manajer fó-hatene haʼu katak haʼu presiza serbisu liu oras. Tan neʼe ho respeitu haʼu hatete katak haʼu labele halo ida-neʼe tanba neʼe sei hanetik haʼu atu haklaken.” Sin, Javier la simu serbisu neʼe. Semana rua tuirmai, nia komesa serbí nuʼudar pioneiru. No tempu balu liu tiha, nia hetan serbisu part-time. Nia hatete: “Jeová rona haʼu-nia orasaun no ajuda haʼu atu hetan serbisu neʼebé bele apoia haʼu-nia pioneiru. Haʼu kontente tebes ho serbisu neʼe, tanba haʼu bele iha tempu barak liu atu serbí Jeová no irmaun-irmán sira.”

9. Saida mak ita aprende husi irmaun Trésor nia esperiénsia?

⁹ Oinsá se ita-nia serbisu agora daudaun hanetik ita atu laʼo tuir fiar? Hanoin toʼok esperiénsia husi irmaun Trésor iha Kongu. Nia hatete: “Haʼu konsege hetan serbisu neʼebé kleur ona haʼu hakarak tebes. Haʼu hetan saláriu dala tolu liu fali haʼu-nia serbisu uluk nian no sai ema importante ida.” Maibé, neʼe hanetik Trésor atu tuir reuniaun beibeik tanba presiza serbisu liu oras. No mós ninia maluk serbisu-naʼin husu nia atu bosok. Trésor hakarak para serbisu, maibé nia hanoin barak se nia la hetan fali serbisu seluk. Saida mak ajuda nia? Nia hatete: “Habakuk 3:​17-19 ajuda haʼu komprende katak maski haʼu lakon serbisu, Jeová sei nafatin tau matan haʼu. Tan neʼe haʼu para serbisu.” Nia hatutan tan: “Patraun barak hanoin katak atu hetan saláriu neʼebé diʼak, serbisu-naʼin sei halo sakrifísiu naran deʼit, inklui família no buat espirituál. Haʼu kontente tanba bele proteje haʼu-nia relasaun ho Jeová no haʼu-nia família. Tinan ida liu tiha, Jeová ajuda haʼu atu hetan serbisu diʼak ho saláriu neʼebé natoon atu tau matan haʼu-nia presiza no iha tempu atu halaʼo atividade espirituál nian. Bainhira ita tau uluk Jeová, karik ba tempu balu ita sei hasoru susar kona-ba osan, maibé Jeová sei tau matan ita.” Sin, se ita tau fiar ba Jeová nia matadalan no promesa sira, ita sei kontinua laʼo tuir fiar no sei simu bensaun.

BAINHIRA HILI PÁR

10. Bainhira hili pár, ita hanoin kona-ba buat importante saida, maibé ita presiza kuidadu kona-ba saida?

¹⁰ Moris kaben nian mak prezente husi Maromak, no hakarak atu kaben mak buat neʼebé normál. Bainhira irmán ida hanoin kona-ba atu kaben, karik nia hanoin kona-ba irmaun neʼe nia fíziku, hahalok, reputasaun, ekonomia, responsabilidade iha família, no sei halo irmán neʼe kontente ka lae.b Buat sira-neʼe importante. Maibé, se nia hanoin deʼit kona-ba neʼe, nia sei halo desizaun hodi tuir deʼit buat neʼebé nia haree.

11. Oinsá mak ita bele laʼo tuir fiar bainhira hili pár? (1 Korinto 7:39)

¹¹ Jeová kontente tebes ho irmaun-irmán sira neʼebé halo tuir ninia matadalan bainhira hili pár! Porezemplu, sira aplika Bíblia nia matadalan atu hein toʼo sira “liu ona tempu foin-saʼe nian” antes namora. (1 Kor 7:36) Sira buka-hatene didiʼak katak ema neʼebé sira atu kaben iha hahalok sira neʼebé diʼak tuir Jeová nia haree. (Prov 31:​10-13, 26-28; Éf 5:33; 1 Tim 5:8) Se ema neʼebé laʼós Testemuña hatudu sentimentu ba sira, sira halo tuir matadalan kona-ba kaben deʼit “iha Naʼi”, neʼebé hakerek iha 1 Korinto 7:39. (Lee.) Sira kontinua laʼo tuir fiar tanba hatene katak Jeová sei fó apoiu ba sira iha dalan emosaun tuir sira-nia presiza.—Sal 55:22.

12. Saida mak Ita aprende husi Rosa nia ezemplu?

¹² Hanoin toʼok kona-ba pioneiru ida naran Rosa iha Kolómbia. Nia serbisu hamutuk ho mane ida neʼebé laʼós Testemuña no mane neʼe komesa hatudu interese ba nia. Rosa mós gosta nia. Nia hatete: “Haʼu sente mane neʼe diʼak tebes. Nia ajuda ema iha ninia área no moris ho saudavel. Nia hatudu laran-diʼak tebes mai haʼu. Nia bele sai laʼen neʼebé diʼak, maibé problema mak nia laʼós Testemuña ida.” Rosa hatutan tan: “Susar tebes atu la namora ho nia. Iha tempu neʼebá, haʼu sente mesamesak no hakarak atu kaben, maibé haʼu labele hetan ema neʼebé fiar hanesan ho haʼu.” Maibé Rosa la fokus deʼit ba buat neʼebé nia haree. Nia hanoin kona-ba saida mak sei akontese ba ninia relasaun ho Jeová se nia deside atu namora ho mane neʼe. Tan neʼe, Rosa para atu kontaktu mane neʼe no kontinua okupadu ho buat espirituál. Lakleur depois neʼe, nia hetan konvite atu tuir Eskola ba Haklaken-Naʼin Tempu-Tomak, no agora nia serbí nuʼudar pioneiru espesiál. Rosa hatete: “Jeová halo haʼu-nia laran nakonu ho kontente.” Dala ruma la fasil atu halo buat neʼebé Jeová hakarak, liuliu bainhira neʼe liga ho ita-nia sentimentu, maibé kuandu ita halo tuir Jeová nia matadalan, neʼe sempre lori bensaun.

BAINHIRA SIMU MATADALAN HUSI ITA-NIA ORGANIZASAUN

13. Dala ruma ita sente oinsá bainhira simu matadalan husi ita-nia organizasaun?

¹³ Dala barak ita simu matadalan husi ita-nia organizasaun liuhusi katuas kongregasaun, katuas área, sukursál, ka Grupu Administradór kona-ba oinsá atu halaʼo ita-nia adorasaun. Maibé dala ruma ita la komprende tanbasá organizasaun fó matadalan neʼe. Karik ita haree deʼit oinsá mak matadalan neʼe sei halo susar ba ita no komesa fokus ba irmaun sira-neʼe nia fraku.

14. Saida mak sei ajuda ita atu laʼo tuir fiar bainhira simu matadalan husi ita-nia organizasaun? (Ebreu 13:17)

¹⁴ Bainhira ita laʼo tuir fiar, ita iha konfiansa katak Jeová mak kontrola buat hotu no nia hatene ita-nia situasaun. Rezultadu mak ita lalais atu halo tuir no ita halo nuneʼe ho hanoin neʼebé loos. (Lee Ebreu 13:17.) Ita rekoñese katak se ita halo tuir matadalan sira-neʼe, neʼe sei lori unidade iha kongregasaun. (Éf 4:​2, 3) Maski irmaun sira neʼebé dirije ita mak la perfeitu, ita fiar katak Jeová sei haraik bensaun mai ita bainhira ita halo tuir sira. (1 Sam 15:22) No ita mós fiar katak maski matadalan ruma presiza troka, Jeová sei halo ida-neʼe iha tempu neʼebé loos.—Miq 7:7.

15-16. Saida mak ajuda Kevin atu laʼo tuir fiar maski nia duvida kona-ba matadalan neʼebé nia simu? (Haree mós foto.)

¹⁵ Haree toʼok esperiénsia neʼebé hatudu katak ita sei hetan benefísiu se ita laʼo tuir fiar. Iha Perú, maski ema barak koʼalia língua Españól, iha mós ema barak neʼebé koʼalia língua materna. Língua ida mak Quechua. Ba tinan barak, irmaun-irmán sira neʼebé koʼalia língua Quechua buka ema iha sira-nia área neʼebé koʼalia língua neʼe. Maibé, atu bele halo tuir governu nia lei, organizasaun presiza halo mudansa kona-ba oinsá atu bele buka ema neʼebé koʼalia língua Quechua. (Rom 13:1) Mudansa neʼe halo sira balu hanoin barak katak neʼe sei halo susar ba sira atu hetan ema neʼebé koʼalia língua Quechua. Tanba irmaun-irmán sira halo tuir matadalan neʼebé sira simu, Jeová haraik bensaun ba sira-nia hakaʼas an atu hetan ema neʼebé koʼalia língua neʼe.

¹⁶ Irmaun Kevin neʼebé serbí nuʼudar katuas iha kongregasaun Quechua mós hanoin barak kona-ba mudansa neʼe. Nia esplika: “Foufoun haʼu hanoin: ‘Oinsá mak ami bele hetan ema neʼebé koʼalia língua Quechua?’” Saida mak Kevin halo? Nia hatete: “Haʼu hanoin-hetan Provérbios 3:5. No haʼu hanoin kona-ba Moisés. Jeová haruka Moisés atu dirije povu Izraél bá Tasi Mean, no neʼe haree hanesan la lójiku tanba sei halo susar ba povu atu halai husi tropa Ejitu neʼebé duni tuir sira. Maski nuneʼe, Moisés halo tuir no Jeová haraik bensaun ba nia iha dalan neʼebé kmanek tebes.” (Éx 14:​1, 2, 9-11, 21, 22) Kevin prontu atu halo mudansa ba ninia dalan atu haklaken. Rezultadu mak saida? Nia hatete: “Haʼu admira tebes kona-ba oinsá Jeová haraik bensaun mai ami. Antes neʼe, ami presiza laʼo dook no dala ruma hasoru ema ida ka rua deʼit neʼebé koʼalia língua Quechua. Agora ami bá deʼit área neʼebé ema barak mak koʼalia língua neʼe. Rezultadu mak ami bele koʼalia ho ema barak, hetan vizita fali, no estuda Bíblia. Ema neʼebé tuir reuniaun mós aumenta.” Sin, Jeová sempre haraik bensaun mai ita bainhira ita laʼo tuir fiar.

17. Saida mak Ita aprende ona husi lisaun neʼe?

¹⁷ Ita koʼalia ona área importante tolu kona-ba oinsá atu kontinua laʼo tuir fiar. Maibé ita presiza halo desizaun hodi tuir Jeová nia hakarak iha buat hotu, hanesan hili atividade halimar nian, halo desizaun kona-ba edukasaun ka haboot oan. Ita presiza halo desizaun laʼós tuir deʼit buat neʼebé ita haree, maibé mós hanoin kona-ba ita-nia relasaun ho Jeová, ninia matadalan, no ninia promesa atu tau matan ita. Se ita halo nuneʼe, ita sei “laʼo tuir Jeová, ita-nia Maromak, tinan ba tinan ba nafatin”.—Miq 4:5.