Jeová nia liman nunka badak

1. Oinsá mak Moisés hatudu fiar ba Jeová bainhira nia dirije povu Izraél sai husi Ejitu?

LIVRU Ebreu koʼalia kona-ba ema barak neʼebé fiar metin ba Jeová. Sira ida mak Moisés. (Ebr 3:​2-5; 11:​23-25) Nia hatudu fiar bainhira dirije povu Izraél sai husi Ejitu. Nia la taʼuk ba Faraó ho ninia tropa sira. Hodi tau fiar ba Jeová, Moisés dirije povu hodi liu Tasi Mean, tuirmai liuhusi rai-fuik. (Ebr 11:​27-29) Ema Izraél barak lakon sira-nia fiar ba Jeová nia kbiit atu tau matan sira, maibé Moisés kontinua tau fiar ba Jeová. Moisés nia fiar neʼe la saugati deʼit tanba Jeová sempre fó ba ema Izraél ai-han no bee hodi sira bele kontinua moris iha rai-fuik.a—Éx 15:​22-25; Sal 78:​23-25.

2. Tanbasá mak Jeová husu Moisés: “Jeová nia liman badak demais ka?” (Números 11:​21-23)

² Maski Moisés iha fiar neʼebé metin, maibé tinan ida liu tiha husi tempu neʼebé povu Izraél sai husi Ejitu, nia komesa hanoin se Jeová iha kbiit atu fó naʼan ba povu neʼe ka lae, hanesan buat neʼebé Nia promete ona. Moisés labele imajina oinsá mak Jeová bele kumpre ninia liafuan atu fó naʼan ba ema Izraél millaun ba millaun iha rai-fuik. Tan neʼe, Jeová husu Moisés: “Jeová nia liman badak demais ka?” (Lee Números 11:​21-23.) Fraze “Jeová nia liman” refere ba Maromak nia espíritu santu, ka forsa neʼebé nia uza atu kumpre ninia hakarak. Loloos, Jeová hakarak husu ba Moisés: ‘Ó hanoin haʼu la iha kbiit atu kumpre buat neʼebé haʼu hatete ona ka?’

3. Tanbasá importante atu hanoin didiʼak kona-ba Moisés no ema Izraél nia esperiénsia?

³ Dala ruma Ita hanoin barak katak Jeová sei tau matan ba Ita no Ita-nia família nia presiza ka lae? Iha lisaun neʼe, ita sei haree esperiénsia kona-ba Moisés no povu Izraél neʼebé la tau fiar ba Jeová nia kbiit atu tau matan ba sira. Ita mós sei haree eskritura balu neʼebé bele hametin ita-nia fiar katak Jeová nia liman nunka badak.

APRENDE HUSI MOISÉS NO POVU IZRAÉL

4. Tanbasá mak ema Izraél barak komesa duvida kona-ba Jeová nia kbiit atu tau matan ba sira?

⁴ Hanoin toʼok kona-ba kontestu husi istória neʼe. Povu Izraél no “ema barak neʼebé laʼós ema Izraél” laʼo hela iha rai-fuik ba tempu barak atu bá rai neʼebé Maromak promete. (Éx 12:38; Deut 8:15) Ema neʼebé laʼós ema Izraél baruk ona atu han beibeik maná, no ema Izraél barak mós sente hanesan neʼe. Ikusmai sira hotu komesa muramura. (Núm 11:​4-6) Sira komesa hanoin fali ai-han neʼebé uluk sira han iha Ejitu. Tanba povu muramura ba Moisés, karik nia hanoin katak nia mak presiza buka naʼan ba sira hotu maibé la hatene atu buka iha neʼebé.—Núm 11:​13, 14.

5-6. Saida mak ita bele aprende husi ema Izraél neʼebé hetan influénsia husi ema seluk?

⁵ Ema neʼebé laʼós ema Izraél la hatudu agradese ba buat neʼebé Jeová fó ba sira, no neʼe book ema Izraél atu iha hanoin neʼebé hanesan. Neʼe mós bele akontese mai ita. Kuandu ema seluk neʼebé besik ita la hatudu agradese, ita mós bele sente la kontente ho buat neʼebé Jeová fó mai ita. Ita bele komesa hanoin katak ita-nia moris uluk nian mak diʼak liu, ka laran-moras ba buat neʼebé ema seluk iha. Maibé, ita sei kontente liután se ita haburas agradesimentu ba buat neʼebé ita iha.

⁶ Povu Izraél presiza hanoin-hetan katak Maromak promete ona ba sira atu fó buat diʼak barak tebes bainhira sira tama ona ba rai neʼebé nia promete, laʼós kuandu sira laʼo iha rai-fuik maran. Hanesan neʼe mós, duké fokus ba buat neʼebé ita la iha agora, hanoin kona-ba buat neʼebé Jeová promete mai ita iha mundu foun. Ita mós bele hanoin kleʼan kona-ba eskritura sira neʼebé bele ajuda ita atu hametin ita-nia fiar ba Jeová.

7. Tanbasá mak ita bele fiar katak Jeová nia liman la badak demais?

⁷ Bainhira Jeová husu Moisés pergunta: “Jeová nia liman badak demais ka?”, karik nia hakarak Moisés atu hanoin kona-ba buat rua: (1) Ninia forsa la iha limite; (2) Ninia forsa bele toʼo ba fatin naran deʼit. Maski ema Izraél iha fatin neʼebé dook, Jeová bele fó naʼan barak ba sira. “Ho liman neʼebé forte no ho liman neʼebé iha kbiit”, Jeová hatudu katak nia bele ajuda ema iha fatin naran deʼit. (Sal 136:​11, 12) Tan neʼe, bainhira iha susar laran, ita labele duvida katak Jeová nia liman badak demais atu ajuda ita.—Sal 138:​6, 7.

8. Saida mak ita bele aprende husi hahalok neʼebé ema Izraél barak hatudu? (Haree mós dezeñu.)

⁸ Lakleur deʼit, Jeová halo milagre hodi fó manu-kiukae barak tebes ba sira. Maibé ema Izraél barak hatudu hahalok kaan-teen duké hatudu agradese. Ba loron ida ho balu, sira halibur manu-kiukae barak liu fali buat neʼebé sira presiza. Tan neʼe, Jeová hirus ba “ema sira neʼebé hatudu hahalok kaan-teen” no fó kastigu ba sira. (Núm 11:​31-34) Neʼe mak lisaun mai ita. Ita presiza kuidadu atu la sai kaan-teen. Maski ita mak riku ka kiak, ita presiza halibur uluk “rikusoin iha lalehan” hodi hametin ita-nia relasaun ho Jeová no Jesus. (Mt 6:​19, 20; Lc 16:9) Kuandu ita halo nuneʼe, ita bele fiar katak Jeová sei tau matan mai ita.

9. Ita bele tau fiar ba Jeová kona-ba saida?

⁹ Jeová mós prontu atu ajuda ninia povu ohin loron. Maski nuneʼe, neʼe la dehan katak ita sei nunka hasoru problema ekonomia ka nunka hamlaha.b Maibé Jeová sei nunka husik ita mesak. Nia sei tau matan ita iha situasaun naran deʼit. Agora, mai ita hanoin kona-ba situasaun rua neʼebé ita bele tau fiar ba Jeová: (1) Kuandu hasoru problema ekonomia no (2) kuandu halo planu kona-ba tempu neʼebé ita idade ona.

KUANDU HASORU PROBLEMA EKONOMIA

10. Karik problema ekonomia saida deʼit mak ita hasoru?

¹⁰ Nuʼudar mundu nia rohan besik daudaun, problema kona-ba ekonomia sei sai aat liután. Situasaun polítiku, funu, dezastre naturais, ka pandemia bele halo ita lakon ita-nia osan, serbisu, no mós uma. Karik ita presiza buka serbisu foun ka hanoin atu muda ba fatin seluk hamutuk ita-nia família hodi bele buka moris. Saida mak bele ajuda ita atu halo desizaun neʼebé hatudu katak ita tau fiar ba Jeová?

11. Saida mak bele ajuda Ita atu tahan hasoru problema ekonomia? (Lucas 12:​29-31)

¹¹ Ulukliu Ita presiza fó sai Ita-nia laran-susar ba Jeová. (Prov 16:3) Husu Jeová atu fó Ita matenek no dame atu bele halo desizaun diʼak no la “hanoin demais” kona-ba Ita-nia situasaun. (Lee Lucas 12:​29-31.) Husu ninia ajuda atu bele sente kontente ho moris neʼebé simples. (1 Tim 6:​7, 8) Buka informasaun husi ita-nia publikasaun sira kona-ba oinsá atu tahan hasoru problema ekonomia. Ema barak hatete katak sira hetan benefísiu husi informasaun sira iha jw.org.

12. Pergunta saida deʼit mak bele ajuda ema Kristaun atu halo desizaun diʼak ba ninia família?

¹² Ema balu simu serbisu neʼebé halo sira dook husi família, maibé ikusmai sira rekoñese katak neʼe mak desizaun neʼebé la matenek. Antes simu serbisu ida, ita lakohi hanoin deʼit kona-ba saláriu, maibé mós kona-ba oinsá serbisu neʼe afeta ita-nia relasaun ho Jeová. (Lc 14:28) Husu Ita-nia an: ‘Se haʼu serbisu iha fatin dook, oinsá mak neʼe kona haʼu-nia moris kaben? Oinsá ho reuniaun, haklaken, no tempu atu ransu ho irmaun-irmán sira?’ Se Ita iha oan, Ita mós presiza husu pergunta importante hanesan: ‘Oinsá mak haʼu bele haboot sira “ho dixiplina no ho hanoin neʼebé tuir Jeová nia hakarak” se haʼu la hamutuk ho sira?’ (Éf 6:4) Bainhira halo desizaun, hanoin kona-ba Jeová nia hakarak, laʼós halo tuir deʼit família ka belun neʼebé la respeitu Bíblia nia prinsípiu.c Irmaun Tony neʼebé hela iha Ázia oeste, hetan oportunidade balu atu serbisu iha rai seluk ho saláriu neʼebé boot. Maibé, depois halo tiha orasaun no koʼalia hamutuk ho ninia feen, nia deside atu la simu serbisu neʼe no hakaʼas an atu hamenus gastu. Liutiha tinan barak, Tony hatete: “Haʼu hetan priviléjiu atu ajuda ema oioin koñese Jeová, no ami-nia oan sira mós serbí Jeová ho laran-manas. Ami aprende katak se ami halo tuir matadalan iha Mateus 6:​33, Jeová sei tau matan ami.”

KUANDU HALO PLANU KONA-BA TEMPU NEʼEBÉ ITA IDADE ONA

13. Ita bele halo saida atu prepara ba tempu neʼebé ita idade ona?

¹³ Ita mós bele hatudu katak ita tau fiar tomak ba Jeová bainhira halo planu kona-ba tempu neʼebé ita idade ona. Bíblia anima ita atu serbisu ho badinas hodi bele tau matan ba ita-nia presiza iha futuru. (Prov 6:​6-11) Tan neʼe, se bele, diʼak atu rai osan balu ba futuru. Sin, osan bele proteje ita kuandu ita presiza. (Ecle 7:12) Maibé, ita labele fokus liu atu buka osan iha ita-nia moris.

14. Oinsá mak Ebreu 13:5 bele ajuda ita bainhira halo planu kona-ba futuru?

¹⁴ Jesus konta ai-knanoik kona-ba mane ida neʼebé halo desizaun la matenek tanba halibur deʼit rikusoin maibé la sai “riku ba Maromak”. (Lc 12:​16-21) La iha ema ida mak hatene saida mak sei akontese iha loron aban. (Prov 23:​4, 5; Tgo 4:​13-15) Ita hasoru susar tanba ita mak Jesus nia dixípulu. Jesus hatete katak ita tenke prontu atu “husik hela” ita-nia rikusoin hodi bele laʼo tuir Jesus. (Lc 14:33) Iha tempu uluk, ema Kristaun iha Judeia la lakon sira-nia ksolok maski hasoru situasaun hanesan neʼe. (Ebr 10:34) Ohin loron mós irmaun-irmán barak lakon ona sira-nia osan no serbisu tanba lakohi hola parte iha buat polítiku. (Apok 13:​16, 17) Saida mak ajuda sira? Sira tau fiar tomak ba Jeová nia promesa neʼebé dehan: “Haʼu sei nunka husik ó, no haʼu sei nunka fila kotuk ba ó.” (Lee Ebreu 13:5.) Ita hakaʼas an atu prepara ba futuru, no se situasaun susar ruma akontese, ita tau fiar ba Jeová nia apoiu.

15. Inan-aman Kristaun presiza iha hanoin saida kona-ba sira-nia oan? (Haree mós foto.)

¹⁵ Iha kultura balu, ema barak hakarak iha oan atu nuneʼe oan bele tau matan bainhira sira idade. Ema hanesan neʼe haree sira-nia oan nuʼudar “garantia ba sira-nia futuru”. Maibé Bíblia hatete katak inan-aman mak tenke tau matan ba oan nia presiza. (2 Kor 12:14) Dala ruma inan-aman neʼebé idade ona presiza hetan ajuda ruma husi sira-nia oan, no oan barak kontente atu ajuda sira. (1 Tim 5:4) Maibé, inan-aman Kristaun presiza rekoñese katak sira-nia kontente la mai husi haboot oan atu hetan osan, maibé ajuda oan atu sai Jeová nia atan.—3 João 4.

16. Oinsá mak inan-aman bele prepara oan atu tau matan ba sira-nia an? (Éfeso 4:28)

¹⁶ Inan-aman sira, hatudu ezemplu diʼak no hanorin oan sira atu tau fiar ba Jeová nuʼudar imi prepara sira atu tau matan ba sira-nia an. Bainhira oan sei kiʼik, hanorin sira katak serbisu ho badinas sei lori benefísiu. (Prov 29:21; lee Éfeso 4:28.) Nuʼudar sira sai boot, ajuda sira atu aprende didiʼak iha eskola. Inan-aman Kristaun bele halo peskiza atu hetan Bíblia nia prinsípiu no ajuda oan atu halo desizaun neʼebé diʼak kona-ba edukasaun neʼebé sira sei hetan. Neʼe sei ajuda oan atu tau matan ba sira-nia an no iha tempu barak liután atu haklaken.

17. Ita bele fiar kona-ba saida?

¹⁷ Jeová nia atan sira neʼebé laran-metin fiar duni katak Jeová iha hakarak no kbiit atu tau matan ba sira-nia presiza fíziku. Nuʼudar mundu aat neʼe besik remata, ita sei hasoru situasaun neʼebé koko ita-nia fiar ba Jeová. Maski situasaun naran deʼit mak akontese, mai ita kontinua tau fiar ba Jeová, katak nia sei uza ninia forsa atu tau matan mai ita. Ita bele fiar metin katak Jeová nia liman neʼebé forte sei nunka badak atu ajuda ita.