LISAUN ESTUDU 15
KNANANUK 30 Haʼu-nia Aman, Maromak no Belun
“Hakbesik ba Maromak mak diʼak” mai ita!
“Kona-ba haʼu, atu hakbesik ba Maromak mak diʼak mai haʼu.”—SAL 73:28.
OBJETIVU
Buka-hatene oinsá ita bele hakbesik ba Jeová no benefísiu saida deʼit mak ita bele hetan bainhira halo nuneʼe.
1-2. (a) Saida mak ita presiza halo atu haburas relasaun belun ho ema ida? (b) Iha lisaun neʼe, ita sei aprende kona-ba saida?
HANOIN toʼok kona-ba Ita-nia belun diʼak ida. Oinsá mak Ita bele sai belun ho nia? Karik Ita gasta tempu ho nia, hatene ninia susar sira, no saida mak nia gosta ka la gosta. Ita haree ninia hahalok furak sira neʼebé Ita hakarak banati-tuir, no neʼe book Ita atu hadomi nia.
2 Atu haburas relasaun belun ho ema ida, presiza tempu no hakaʼas an. Ita mós presiza uza tempu atu haburas relasaun belun ho Maromak Jeová. Iha lisaun neʼe, ita sei aprende kona-ba oinsá mak ita bele hakbesik liután ba ita-nia Maromak no benefísiu saida deʼit mak ita hetan bainhira ita halo nuneʼe. Primeiru, mai ita haree tanbasá diʼak atu hakbesik ba Jeová nuʼudar ita-nia Belun neʼebé diʼak.
3. Tanbasá importante atu hanoin kleʼan kona-ba benefísiu neʼebé ita hetan bainhira ita hakbesik ba Jeová? Fó toʼok ezemplu.
3 Ita konkorda katak hakbesik ba Jeová mak buat neʼebé diʼak. Maibé, hodi hanoin kleʼan kona-ba oinsá neʼe lori diʼak mai ita bele motiva ita atu kontinua hakbesik ba nia. (Sal 63:6-8) Porezemplu, ita hatene katak se ita han ai-han neʼebé saudavel, halo ezersísiu, deskansa, no hemu bee barak sei lori diʼak mai ita. Maibé, ema barak lakohi hanoin atu halo buat sira-neʼe no la tau matan ba sira-nia saúde. Loloos, bainhira ita hanoin beibeik kona-ba oinsá toman diʼak sira-neʼe lori benefísiu mai ita, neʼe sei motiva ita atu kontinua halo buat sira-neʼe. Hanesan neʼe mós, ita hatene ona katak hakbesik ba Jeová mak diʼak mai ita, maibé hodi hanoin kleʼan kona-ba ninia benefísiu sira, neʼe sei motiva ita atu kontinua hakbesik ba nia.—Sal 119:27-30.
4. Saida mak hakerek-naʼin ba Salmo 73:28 hatete?
4 Lee Salmo 73:28. Hakerek-naʼin ba Salmo 73 mak ema Levi ida neʼebé iha knaar atu serbí nuʼudar kantadór iha Jeová nia templu. Karik nia serbí Jeová ho laran-metin ba tinan barak ona. Maski nuneʼe, nia nafatin presiza fó-hanoin ba ninia an no ema seluk katak “hakbesik ba Maromak” mak diʼak ba nia no ba sira. Hodi halo nuneʼe lori benefísiu saida?
“HAKBESIK BA MAROMAK” LORI KONTENTE
5. (a) Tanbasá hakbesik liután ba Jeová lori kontente mai ita? (b) Oinsá mak matenek neʼebé Jeová fó ba Ita ajuda no proteje ona Ita? (Provérbios 2:6-16)
5 Nuʼudar ita hakbesik liután ba Jeová, ita sei sente kontente liután. (Sal 65:4) Iha razaun barak tanbasá ita bele sente kontente. Porezemplu, ita hetan benefísiu hodi aplika matenek neʼebé mai husi ninia Liafuan, Bíblia. Matenek neʼe proteje ita husi influénsia neʼebé la diʼak no ajuda ita atu la halo sala neʼebé sériu. (Lee Provérbios 2:6-16.) Tan neʼe, Bíblia hatete: “Ksolok ba ema neʼebé hetan ona matenek no ema neʼebé hatene atu tetu didiʼak.”—Prov 3:13.
6. Tanbasá mak hakerek-naʼin ba salmo neʼe lakon ninia kontente?
6 Klaru katak Jeová nia belun sira mós dala ruma sente triste. Ema neʼebé hakerek Salmo 73 lakon ninia kontente bainhira nia iha hanoin negativu. Nia komesa hanoin katak ema neʼebé halo hahalok aat iha moris diʼak maski sira la interese kona-ba Maromak no la halo tuir nia. Neʼe halo nia hirus no laran-moras. Nia iha hanoin sala katak ema neʼebé halo violénsia no foti an sempre moris riku, iha saúde diʼak, no la hasoru susar ida. (Sal 73:3-7, 12) Neʼe halo nia hanoin katak serbí Jeová la lori buat diʼak ida. Nia triste tebes no hatete: “Haʼu hatudu laran-moos nafatin no haʼu fase liman hodi hatudu katak haʼu la iha sala, maibé loloos neʼe saugati deʼit.”—Sal 73:13.
7. Bainhira ita sente triste, saida mak ita bele halo? (Haree mós dezeñu.)
7 Hakerek-naʼin ba salmo neʼe la husik sentimentu triste manán fali nia. Nia halo buat ruma. Nia “tama ba Maromak nia fatin sagradu neʼebé kmanek” no husik Jeová korrije ninia hanoin. (Sal 73:17-19) Bainhira ita triste, Jeová, ita-nia Belun neʼebé diʼak liu hotu, hatene kona-ba neʼe. Se ita halo orasaun hodi husu ninia matadalan no simu ajuda liuhusi Bíblia no kongregasaun, ita sei hetan forsa atu tahan hasoru sentimentu triste. No maski ita sente laran-taridu tebes, Jeová sei fó kmaan no halo ita kontente fali.—Sal 94:19.a
Ema Levi neʼebé hakerek Salmo 73 hamriik iha “Maromak nia fatin sagradu neʼebé kmanek” (Haree parágrafu 7)
“HAKBESIK BA MAROMAK” HALO ITA-NIA MORIS IHA OBJETIVU NO ESPERANSA
8. Benefísiu saida tan mak ita hetan bainhira ita hakbesik ba Maromak?
8 Hakbesik ba Maromak mak diʼak mai ita iha dalan importante rua tan. Primeiru, halo ita-nia moris iha objetivu. Segundu, fó ita esperansa neʼebé metin kona-ba futuru. (Jer 29:11) Mai ita buka-hatene liután kona-ba benefísiu sira-neʼe.
9. Oinsá mak hakbesik ba Jeová halo ita-nia moris iha objetivu?
9 Hakbesik ba Jeová halo ita-nia moris iha objetivu. Ema barak ohin loron dehan katak Maromak la iha. Tan neʼe sira la hatene tanbasá ema moris iha mundu, no sira fiar katak iha futuru ema sei la iha tan. Maibé, bainhira ita aprende Bíblia, ita fiar metin katak “Maromak iha duni” no nia “sei fó kolen ba sira neʼebé buka nia ho laran”. (Ebr 11:6) No mós, Jeová kria ita ho hakarak atu serbí nia. Tan neʼe, bainhira ita serbí nia, ita sei sente kontente tebes.—Deut 10:12, 13.
10. Saida mak Maromak promete ba ema neʼebé tau fiar ba nia? (Salmo 37:29)
10 Ema barak la iha esperansa neʼebé loos kona-ba futuru. Tan neʼe sira fokus deʼit atu halo serbisu, kaben, iha oan, no rai osan ba tempu idade. Sira la hatene Maromak nia promesa kona-ba futuru. Maibé ita hatene katak Jeová tau matan ba ninia atan sira. (Sal 25:3-5; 1 Tim 6:17) Ita tau fiar ba ita-nia Maromak no Belun, no hatene katak nia sei kumpre ninia promesa mai ita. Iha futuru, ita sei goza buat diʼak barak, liuliu adora nia ba nafatin iha Paraízu.—Lee Salmo 37:29.
11. Ita sente oinsá bainhira sai Jeová nia belun, no Jeová sente oinsá?
11 Hakbesik ba Jeová lori diʼak mai ita iha dalan seluk tan. Porezemplu, Jeová promete atu fó perdua ba ita-nia sala bainhira ita arrepende an. (Isa 1:18) Tan neʼe, ita la presiza hanoin barak kona-ba sala neʼebé ita halo iha tempu uluk. (Sal 32:1-5) No ita sente kontente bainhira ita halo Jeová kontente. (Prov 23:15) Sin, iha razaun diʼak barak neʼebé halo ita kontente tanba sai Jeová nia belun. Maibé, saida mak ita bele halo atu kontinua hakbesik ba Maromak?
OINSÁ ITA BELE KONTINUA “HAKBESIK BA MAROMAK”
12. Saida deʼit mak Ita halo ona atu hakbesik ba Maromak?
12 Se Ita batizmu ona, Ita halo ona buat barak atu hakbesik ba Jeová. Ita aprende lia-loos barak kona-ba Maromak Jeová no Jesus Kristu, arrepende Ita-nia sala, hatudu fiar metin ba Maromak, no hakaʼas an atu moris tuir Ninia hakarak. Maibé atu hakbesik liután ba Maromak, ita tenke kontinua halo buat sira-neʼe.—Kol 2:6.
13. Buat tolu saida mak bele ajuda ita atu nafatin hakbesik liután ba Jeová?
13 Saida mak sei ajuda ita atu nafatin hakbesik liután ba Jeová? (1) Ita tenke kontinua lee no estuda Bíblia. Ita-nia objetivu atu lee no estuda Bíblia mak laʼós deʼit atu aprende buat báziku kona-ba Maromak. Maibé, ita presiza koko komprende Maromak nia hakarak no moris tuir ninia prinsípiu sira iha Bíblia. (Éf 5:15-17) (2) Ita tenke hametin ita-nia fiar hodi hanoin kleʼan kona-ba evidénsia neʼebé hatudu katak nia hadomi ita. (3) Ita presiza kontinua odi buat neʼebé Jeová odi no la habelun ho ema neʼebé halo buat neʼebé Jeová la gosta.—Sal 1:1; 101:3.
14. Tuir 1 Korinto 10:31, saida tan mak ita bele halo iha ita-nia moris atu halo Jeová kontente? (Haree mós foto.)
14 Lee 1 Korinto 10:31. Importante ba ita atu kontinua buka dalan atu halo Jeová kontente. La toʼo atu haklaken no tuir reuniaun deʼit. Buat neʼebé ita halo loroloron tenke lori kontente ba Jeová. Porezemplu, bainhira ita hatudu laran-moos iha buat hotu no fahe buat neʼebé ita iha ba ema seluk, ita halo Jeová kontente. (2 Kor 8:21; 9:7) Nia mós hakarak ita atu hafolin moris neʼebé nia fó mai ita. Tan neʼe, ita sei kuidadu kona-ba buat neʼebé ita han no hemu, no halo buat neʼebé lori diʼak ba ita-nia saúde. Bainhira Jeová haree ita koko atu halo nia kontente iha buat hotu, nia sei hadomi ita liután.—Lc 16:10.
Lori karreta ho seguru, tau matan ita-nia an hodi halo ezersísiu no han ai-han neʼebé saudavel, no hatudu laran-luak ba ema seluk bele halo Jeová kontente (Haree parágrafu 14)
15. Jeová hakarak ita atu hatudu hahalok saida ba ema seluk?
15 Jeová hatudu laran-diʼak ba ema neʼebé serbí nia no la serbí nia. (Mt 5:45) Nia mós hakarak ita atu hatudu laran-diʼak ba ema seluk. Porezemplu, ita “la koʼalia aat kona-ba ema ida, la istori malu, la ulun-toos, no hatudu laran-maus ba ema hotu”. (Tito 3:2) Tan neʼe, ita lakohi hanoin katak ita mak diʼak liu fali ema neʼebé la fiar ba Jeová. (2 Tim 2:23-25) Hodi sempre hatudu laran-diʼak ba ema seluk sei ajuda ita atu hakbesik liután ba Jeová.
ITA BELE “HAKBESIK BA MAROMAK” MASKI SENTE LARAN-KRAIK
16. Hakerek-naʼin ba Salmo 73 komesa sente oinsá?
16 Maibé, oinsá se Ita komesa sente dook husi Jeová no la merese simu Jeová nia domin? Hanoin-hetan ezemplu husi ema neʼebé hakerek Salmo 73. Nia hatete: “Haʼu-nia ain besik atu laʼo sala dalan; haʼu-nia hakat sira besik atu sidi.” (Sal 73:2) Nia sai “laran-triste loos” no “la iha neon” “hanesan animál neʼebé la iha neon” iha Jeová nia oin. (Sal 73:21, 22) Ninia sentimentu negativu neʼe halo nia hanoin katak nia la merese simu Jeová nia domin ka lae?
17. (a) Saida mak hakerek-naʼin ba salmo neʼe halo bainhira nia laran-kraik tebes? (b) Lisaun saida mak ita bele aprende husi ninia esperiénsia? (Haree mós foto.)
17 Se hakerek-naʼin ba salmo neʼe sente katak Jeová husik ona nia, ninia sentimentu neʼe mak ba temporáriu deʼit. Loloos maski nia laran-kraik tebes, nia hatene katak nia presiza hakbesik ba Jeová. Nia dehan: “Maibé agora haʼu kontinua hamutuk ho Ita [Jeová]; Ita kaer metin haʼu-nia liman-loos. Ita dirije haʼu ho Ita-nia konsellu, no depois neʼe, Ita sei lori haʼu ba glória.” (Sal 73:23, 24) Ita mós presiza husu Jeová atu hametin ita bainhira ita-nia fiar komesa fraku ka sente laran-kraik. (Sal 73:26; 94:18) Maski ita halo sala neʼebé sériu, ita bele fila fali ba Jeová no fiar katak nia “prontu atu fó perdua”. (Sal 86:5) Liuliu bainhira ita sente laran-kraik tebes, importante atu hakbesik liután ba Jeová.—Sal 103:13, 14.
Bainhira ita sente fraku iha dalan espirituál, ita presiza hakbesik ba Jeová hodi hola parte liután iha adorasaun ba nia (Haree parágrafu 17)
“HAKBESIK BA MAROMAK” BA NAFATIN
18. Tanbasá mak ita bele kontinua hakbesik ba Jeová ba nafatin?
18 Ita bele kontinua hakbesik ba Jeová ba nafatin no ita sei nunka para atu aprende kona-ba nia. Bíblia hatete katak ita ‘labele hatene hotu’ kona-ba Jeová nia dalan no ninia matenek. (Rom 11:33) Tan neʼe, ita presiza kontinua aprende liután kona-ba Jeová.
19. Saida mak livru Salmo hatete kona-ba ita-nia futuru?
19 Salmo 79:13 hatete: “Ami nuʼudar Ita-nia povu no bibi-lubun neʼebé Ita tau matan, sei fó agradese ba Ita ba nafatin; no ami sei fó sai Ita-nia glória husi jerasaun ba jerasaun.” Nuʼudar Ita kontinua hakbesik ba Jeová, Ita bele fiar katak Ita sei simu bensaun ba nafatin no hatete: “[Maromak] mak haʼu-nia fatuk boot no haʼu-nia parte ba nafatin.”—Sal 73:26.
KNANANUK 32 Apoia Maromak Jeová!
a Ema balu neʼebé kontinua sente laran-taridu ka triste ba tempu naruk karik presiza hetan ajuda husi doutór. Atu hetan informasaun liután, haree Livru Haklaken No. 1 2023.