Irmaun joven sira, banati-tuir Marcos no Timóteo nia ezemplu

1-2. Karik susar saida deʼit mak bele hanetik Marcos no Timóteo atu halo buat barak liután ba Jeová?

IRMAUN joven sira, imi hakarak halo buat barak liután iha Jeová nia serbisu no ajuda ema seluk iha kongregasaun? Ami fiar katak imi hakarak. Ami kontente tebes atu haree irmaun joven barak neʼebé prontu atu serbí Jeová no ema seluk! (Sal 110:3) Maibé, karik la fasil ba Ita atu halo buat barak liután ba Jeová, tanba Ita la hatene Ita-nia moris sei sai oinsá no Jeová hakarak Ita atu serbí iha neʼebé. Ka karik Ita dada an atu simu knaar ruma tanba la fiar an. Se nuneʼe, laʼós Ita deʼit mak sente hanesan neʼe.

² Marcos no Timóteo mós sente buat neʼebé hanesan. Sira mós la hatene saida mak sei akontese ba sira-nia moris ka karik sente katak sira la kumpre kritéria, maibé sira nafatin hili atu halo buat barak liután ba Jeová. Bainhira apóstolu Paulo no Barnabé konvida Marcos atu laʼo hamutuk nuʼudar misionáriu, karik Marcos hela ho ninia inan iha uma neʼebé diʼak. (Após 12:​12, 13, 25) Maibé, Marcos husik hela ninia uma atu bele halo buat barak liután ba Jeová. Primeiru, nia muda ba Antiokia. Tuirmai, nia akompaña Paulo no Barnabé atu bá fatin neʼebé dook. (Após 13:​1-5) Nuneʼe mós ho Timóteo, karik nia hela ho ninia inan-aman bainhira Paulo konvida nia atu haklaken hamutuk. Timóteo sei joven no seidauk iha esperiénsia, tan neʼe nia bele deʼit hanoin katak nia la kumpre kritéria atu laʼo hamutuk ho Paulo. (Kompara ho 1 Korinto 16:​10, 11 no 1 Timóteo 4:12.) Maibé, nia simu Paulo nia konvite no hetan bensaun barak.—Após 16:​3-5.

3. (a) Oinsá ita hatene katak Paulo hafolin Marcos no Timóteo? (2 Timóteo 4:​6, 9, 11) (Haree mós dezeñu.) (b) Iha lisaun neʼe, ita sei koʼalia kona-ba pergunta saida deʼit?

³ Marcos no Timóteo hetan esperiénsia neʼebé folin-boot no aprende atu kaer responsabilidade neʼebé boot kuandu sei joven. Paulo hafolin tebes joven naʼin-rua neʼe, tan neʼe bainhira nia hatene katak tempu besik ona ba nia atu mate, nia hakarak sira atu hamutuk ho nia. (Lee 2 Timóteo 4:​6, 9, 11.) Tanbasá mak Paulo hafolin tebes Timóteo no Marcos? Oinsá mak irmaun joven sira bele banati-tuir sira-nia ezemplu? No oinsá mak irmaun joven sira bele hetan benefísiu husi Paulo nia matadalan?

BANATI-TUIR MARCOS KONA-BA PRONTU ATU SERBÍ

4-5. Oinsá mak Marcos hatudu katak nia prontu atu serbí ema seluk?

⁴ Serbí ema seluk bele signifika katak hakaʼas an atu ajuda sira ho badinas no kontinua ajuda maski susar. Marcos hatudu ezemplu neʼebé diʼak kona-ba neʼe. Bainhira Paulo lakohi atu lori nia hamutuk iha Paulo nia viajen nuʼudar misionáriu ba dala segundu, karik Marcos sente laran-kanek no triste. (Após 15:​37, 38) Maibé neʼe la hapara Marcos atu serbí irmaun-irmán sira.

⁵ Marcos simu knaar atu serbisu hamutuk ho ninia primu Barnabé. Maizumenus tinan 11 liu tiha, Marcos mós inklui sira neʼebé apoia apóstolu Paulo durante Paulo tama komarka ba dala primeiru iha Roma. (Flm 23, 24) Loloos, Paulo hafolin tebes Marcos nia apoiu, tan neʼe nia temi Marcos nuʼudar “ajuda-naʼin neʼebé fó kmaan” ba nia.—Kol 4:​10, 11.

6. Marcos hetan benefísiu saida tanba ransu ho ema Kristaun maduru? (Haree nota-rodapé.)

⁶ Marcos hetan benefísiu tanba ransu ho ema Kristaun neʼebé maduru. Depois gasta tiha tempu barak hamutuk ho Paulo iha Roma, Marcos serbisu hamutuk ho Pedro iha Babilónia. Sira-nia relasaun mak besik tebes, tan neʼe Pedro bolu nia “haʼu-nia oan Marcos”. (1 Ped 5:13) Nuʼudar sira serbisu hamutuk, karik Pedro konta buat furak barak kona-ba Jesus nia moris no serbisu haklaken neʼebé ikusmai hakerek iha Evanjellu Marcos.a

7. Oinsá mak Seung-Woo banati-tuir Marcos nia ezemplu? (Haree mós foto.)

⁷ Marcos kontinua okupadu atu serbí Jeová no nafatin besik ho irmaun sira neʼebé maduru. Oinsá Ita bele banati-tuir Marcos? Se Ita seidauk hetan knaar ka priviléjiu ruma neʼebé Ita hakarak, keta sai laran-kraik maibé kontinua buka dalan atu serbí Jeová no kongregasaun. Neʼe mak buat neʼebé akontese ba Seung-Woo, neʼebé agora serbí nuʼudar katuas kongregasaun. Bainhira joven, nia sempre kompara ninia an ho irmaun joven balu neʼebé hetan ona priviléjiu antes nia. Seung-Woo sente laran-kanek no triste no ikusmai nia fó sai ida-neʼe ba irmaun sira neʼebé maduru. Irmaun katuas ida anima nia atu halo buat neʼebé nia bele atu serbí ema seluk maski dala ruma ema la haree buat neʼebé nia halo. Sujestaun neʼe book Seung-Woo atu prontu ajuda irmaun-irmán sira neʼebé idade no sira neʼebé presiza transporte atu tuir reuniaun. Bainhira hanoin fali kona-ba neʼe, nia hatete: “Ikusmai haʼu komprende signifikadu husi serbí liután ema seluk. Haʼu hetan kontente tanba ajuda ema seluk.”

BANATI-TUIR TIMÓTEO KONA-BA HANOIN EMA SELUK

8. Tanbasá Paulo hili Timóteo atu laʼo hamutuk? (Filipe 2:​19-22)

⁸ Paulo presiza irmaun sira neʼebé aten-brani atu akompaña nia bainhira nia fila fali ba sidade sira neʼebé uluk ema kontra. Primeiru, nia hili mane Kristaun ida naran Silas neʼebé serbí Jeová ba tinan barak ona. (Após 15:​22, 40) Tuirmai, nia mós hili Timóteo atu laʼo ho sira. Tanbasá? Razaun ida mak Timóteo iha reputasaun diʼak. (Após 16:​1, 2) Timóteo mós hanoin tebes ema seluk.—Lee Filipe 2:​19-22.

9. Oinsá mak Timóteo hatudu katak nia hanoin tebes irmaun-irmán sira?

⁹ Husi tempu neʼebé Timóteo hahú ninia knaar ho Paulo, nia hatudu katak nia hanoin liu ema seluk duké ninia an rasik. Tan neʼe, bainhira Paulo husik hela Timóteo iha Bereia, nia hatene katak Timóteo sei tau matan didiʼak ba dixípulu foun. (Após 17:​13, 14) Iha tempu neʼebá, Silas mós iha Bereia, no klaru katak Timóteo aprende buat barak husi Silas nia ezemplu. Maibé, tuirmai Paulo haruka Timóteo bá Tesalónika mesak atu hametin ema Kristaun iha neʼebá. (1 Tes 3:2) Tuirmai maizumenus durante tinan 15 liu, Timóteo nia domin ba irmaun-irmán sira sai metin liután no nia aprende atu “tanis ho sira neʼebé tanis”. (Rom 12:15; 2 Tim 1:4) Oinsá mak irmaun joven sira bele banati-tuir Timóteo?

10. Oinsá mak Woo Jae aprende atu hatudu interese liután ba ema seluk?

¹⁰ Irmaun ida naran Woo Jae aprende atu hatudu interese liután ba ema seluk. Bainhira joven, Woo Jae sente susar atu dada lia ho irmaun-irmán sira neʼebé idade liu nia. Tan neʼe nia hasé liu deʼit sira iha Reuniaun-Fatin, no bá. Irmaun katuas ida anima Woo Jae atu hahú dada lia hodi fó-hatene irmaun-irmán sira kona-ba buat neʼebé nia gosta husi sira. Katuas neʼe mós anima nia atu hanoin kona-ba buat neʼebé ema seluk interese. Woo Jae aplika sujestaun neʼe no komesa dada lia ho ema seluk. Agora Woo Jae serbí nuʼudar katuas kongregasaun, no hatete: “Agora fasil mai haʼu atu koʼalia ho ema neʼebé idade la hanesan. Haʼu kontente tanba haʼu bele komprende ema seluk nia laran-susar. Neʼe ajuda tebes haʼu atu hatene irmaun-irmán sira-nia presiza no saida mak haʼu bele halo atu ajuda sira.”

11. Oinsá mak irmaun joven sira bele aprende atu hatudu interese ba ema seluk iha kongregasaun? (Haree mós foto.)

¹¹ Imi irmaun joven sira, imi mós bele aprende atu hatudu interese ba ema seluk. Bainhira tuir reuniaun, koʼalia ba ema oioin inklui sira neʼebé idade boot no kiʼik. Husu sira-nia novidade, no tuirmai rona ba sira. Hodi halo nuneʼe, Ita sei hatene oinsá atu ajuda sira. Karik Ita hatene kona-ba feen-laʼen idade neʼebé presiza ajuda atu uza aplikasaun JW Library^®. Ka karik Ita hatene katak sira seidauk iha planu atu haklaken ho sé. Se nuneʼe, Ita bele ajuda sira oinsá atu uza sira-nia sasán eletróniku ka halo planu atu haklaken ho sira. Hodi foti inisiativu atu ajuda ema seluk, Ita sei hatudu ezemplu neʼebé diʼak ba ema hotu.

HETAN BENEFÍSIU HUSI PAULO NIA MATADALAN

12. Oinsá mak irmaun joven sira bele hetan benefísiu husi Paulo nia matadalan ba Timóteo?

¹² Paulo fó matadalan ba Timóteo atu ajuda nia hetan susesu iha ninia moris no serbisu haklaken. (1 Tim 1:18; 2 Tim 4:5) Imi irmaun joven sira mós bele hetan benefísiu husi Paulo nia matadalan. Oinsá? Lee Paulo nia karta rua ba Timóteo no imajina katak neʼe ba Ita, no haree matadalan saida mak Ita bele aplika iha Ita-nia moris. Mai ita haree ezemplu balu.

13. Oinsá mak ita bele laran-metin liután ba Jeová?

¹³ “Treinu ó-nia an ho objetivu atu hatudu laran-metin ba Maromak.” (1 Tim 4:7b) Paulo hatete ba Timóteo atu laran-metin ba Jeová no halo buat neʼebé lori kontente ba Jeová. Tanba ita la moris mai ho hahalok neʼe, entaun ita presiza haburas ida-neʼe. Oinsá? Liafuan Gregu neʼebé tradús nuʼudar “treinu ó-nia an” baibain refere ba treinu neʼebé atleta sira halo antes tuir kompetisaun. Atleta sira presiza dixiplina sira-nia an. Ita mós presiza dixiplina an atu haburas toman sira neʼebé sei ajuda ita atu hakbesik ba Jeová.

14. Bainhira lee Bíblia, saida mak ita-nia objetivu? Fó toʼok ezemplu.

¹⁴ Nuʼudar Ita haburas Ita-nia toman atu lee Bíblia, hanoin-hetan katak Ita-nia objetivu mak atu hakbesik ba Jeová. Porezemplu, saida mak Ita bele aprende husi istória kona-ba bainhira Jesus hasoru ukun-naʼin joven ida neʼebé riku? (Mc 10:​17-22) Mane neʼe fiar katak Jesus mak Mesias, maibé nia ladún iha fiar atu laʼo tuir Jesus. Maski nuneʼe, Jesus “sente domin ba nia”. Dalan neʼebé Jesus koʼalia ba mane neʼe kona tebes Ita-nia laran, loos ka lae? Sin, Jesus hakarak mane neʼe atu halo desizaun matenek. Jesus mós haleno Jeová nia domin bainhira koʼalia ba mane neʼe. (João 14:9) Nuʼudar Ita hanoin kona-ba istória neʼe no Ita-nia situasaun, husu Ita-nia an: ‘Saida mak haʼu presiza halo atu hakbesik ba Jeová no serbí ema seluk iha dalan neʼebé diʼak liután?’

15. Tanbasá importante ba irmaun joven sira atu hatudu ezemplu diʼak ba ema seluk? Esplika toʼok. (1 Timóteo 4:​12, 13)

¹⁵ “Sai nuʼudar ezemplu ba ema laran-metin sira.” (Lee 1 Timóteo 4:​12, 13.) Paulo husu Timóteo laʼós deʼit atu aumenta matenek kona-ba lee no hanorin, maibé mós atu haburas hahalok sira hanesan domin, fiar, no hahalok moos. Tanbasá? Tanba ita-nia hahalok importante liu fali ita-nia liafuan. Porezemplu, Ita hetan knaar atu hatoʼo diskursu kona-ba haklaken ho laran-manas. Ita sei sente kmaan atu koʼalia kona-ba neʼe se Ita rasik badinas atu haklaken. Ita-nia rona-naʼin sira sei kontente atu aplika buat neʼebé ita hatete se Ita mós halo nuneʼe.—1 Tim 3:13.

16. (a) Iha dalan lima saida mak joven Kristaun bele sai nuʼudar ezemplu diʼak? (b) Oinsá mak irmaun joven bele sai ezemplu diʼak ‘liuhusi sira-nia koʼalia’?

¹⁶ Hanesan temi iha 1 Timóteo 4:​12, Paulo temi kona-ba dalan lima oinsá irmaun joven sira bele sai nuʼudar ezemplu diʼak. Nuʼudar Ita halaʼo estuda mesak, diʼak atu hanoin kona-ba dalan ida-idak. Porezemplu, Ita hakarak hatudu ezemplu diʼak ‘liuhusi Ita-nia koʼalia’. Hanoin kona-ba liafuan neʼebé Ita bele uza atu hametin ema seluk. Se Ita hela ho inan-aman, hatoʼo beibeik obrigadu ba sira kona-ba buat neʼebé sira halo ba Ita. Depois tuir tiha reuniaun, Ita bele hatete ba ema ida neʼebé fahe ona pontu neʼebé Ita gosta husi ninia parte. Ita mós bele koko atu fó komentáriu ho Ita-nia liafuan rasik iha reuniaun sira. Bainhira Ita hatudu ezemplu liuhusi Ita-nia liafuan, ema seluk sei haree katak Ita kontinua sai maduru.—1 Tim 4:15.

17. Saida mak sei ajuda irmaun joven atu kumpre planu espirituál? (2 Timóteo 2:22)

¹⁷ “Halai sees husi hakarak joven nian, maibé buka hahalok loos.” (Lee 2 Timóteo 2:22.) Paulo anima Timóteo atu kontra hasoru buat naran deʼit neʼebé bele estraga ninia planu espirituál no relasaun ho Jeová. Karik Ita mós rekoñese katak atividade balu neʼebé la sala, karik bele hanetik Ita atu iha tempu hodi bele halo buat barak liután ba Jeová. Porezemplu, hanoin kona-ba oinsá Ita gasta tempu iha desportu, uza internét, ka halimar game. Ita bele ka lae uza fali tempu balu atu halo buat barak liután ba Jeová no ema seluk? Karik Ita bele oferese ajuda atu tau matan ba Reuniaun-Fatin ka apoia haklaken ho karrosa. Se Ita hola parte iha atividade hanesan neʼe, karik Ita sei hetan belun foun neʼebé sei ajuda Ita atu kumpre Ita-nia planu espirituál.

SERBÍ EMA SELUK LORI BENSAUN

18. Bensaun saida deʼit mak Marcos no Timóteo hetan?

¹⁸ Marcos no Timóteo halo sakrifísiu oioin atu serbí ema seluk ho diʼak liután, no sira hetan bensaun barak no moris kontente. (Após 20:35) Atu serbí maluk Kristaun sira, Marcos halo viajen ba fatin oioin. Nia mós hakerek istória neʼebé kapás kona-ba Jesus nia moris no haklaken. Timóteo ajuda Paulo harii kongregasaun no hametin irmaun-irmán sira. Klaru katak Jeová kontente ho Marcos no Timóteo neʼebé halo sakrifísiu oioin.

19. Tanbasá irmaun joven sira presiza aplika Paulo nia matadalan ba Timóteo, no rezultadu mak saida?

¹⁹ Ita bele haree katak Paulo hadomi tebes Timóteo husi liafuan neʼebé nia hakerek ba Timóteo. Maibé, Jeová mak uza Paulo atu hakerek karta sira-neʼe, tan neʼe liafuan neʼebé ita lee hatudu oinsá Jeová sente kona-ba irmaun joven sira ohin loron. Nia hadomi Ita no nia hakarak Ita atu hetan susesu. Tan neʼe, hakaʼas an atu aplika Paulo nia matadalan, no haburas Ita-nia hakarak atu serbí ema seluk ho diʼak liután. Se Ita halo nuneʼe, Ita sei iha moris neʼebé kontente agora no Ita sei ‘kaer metin ba moris loloos’ neʼebé atu mai.—1 Tim 6:​18, 19.