Prepara Ita-nia laran

Bainhira ita estuda Bíblia, ita hakarak Jeová nia hanoin sira kona ita-nia laran, ka ita rasik nia moris. Ezras hatudu ezemplu diʼak kona-ba neʼe bainhira nia “prepara . . . ninia laran atu estuda Jeová nia Ukun-Fuan”. (Ezras 7:10) Oinsá ita bele prepara ita-nia laran?

Orasaun. Halo orasaun antes hahú estuda. Husu Jeová atu ajuda Ita komprende no aplika buat neʼebé Ita aprende.—Sal 119:​18, 34.

Haburas haraik an. Maromak subar lia-loos husi ema neʼebé foti an no sadere ba sira-nia matenek rasik. (Lc 10:21) Ita lakohi estuda tan deʼit atu hatudu ba ema seluk katak ita hatene buat barak. Haraik an hodi troka Ita-nia hanoin bainhira neʼe la tuir Maromak nia hakarak.

Rona ba knananuk reuniaun nian. Múzika iha kbiit atu book ita-nia laran, no prepara ita atu halaʼo adorasaun. Karik hodi rona uluk ba knananuk reuniaun nian antes estuda, bele ajuda Ita atu prepara Ita-nia laran.