Kontinua aprende husi Bíblia nia hanorin báziku

1. Kuandu ita foin aprende lia-loos husi Bíblia, oinsá neʼe afeta ita?

HANORIN báziku husi Bíblia troka ona ita-nia moris. Porezemplu, bainhira ita aprende katak Maromak nia naran mak Jeová, ita komesa hakbesik ba nia. (Isa 42:8) Kuandu ita aprende kona-ba ema mate nia kondisaun, ita la taʼuk tan ba ema neʼebé mate ona. (Ecle 9:10) No bainhira ita aprende Maromak nia promesa kona-ba mundu foun, ita la hanoin barak tan kona-ba ita-nia futuru. No ita iha konfiansa katak ita bele moris ba nafatin, laʼós ba tinan 70 ka 80 deʼit.—Sal 37:29; 90:10.

2. Oinsá mak 2 Pedro 1:​12, 13 hatudu katak ema Kristaun maduru mós bele hetan benefísiu husi hanorin báziku?

² Ita labele hanoin katak hanorin báziku husi Bíblia mak buat neʼebé baibain deʼit. Iha apóstolu Pedro nia karta segundu, nia hakerek ba ema Kristaun neʼebé “metin ona iha lia-loos”. (Lee 2 Pedro 1:​12, 13.) Maski nuneʼe, sira hasoru perigu iha kongregasaun laran, inklui husi mestre falsu sira. (2 Ped 2:​1-3) Pedro hakarak ajuda irmaun-irmán sira atu proteje an husi lia-bosok oioin. Nia halo nuneʼe hodi fó-hanoin sira kona-ba hanorin báziku neʼebé sira hatene ona. Hanorin sira-neʼe sei ajuda sira atu kontinua laran-metin ba Jeová.

3. Tanbasá ema Kristaun hotu presiza kontinua hanoin kleʼan kona-ba Bíblia nia hanorin báziku sira? Fó toʼok ezemplu.

³ Maski ita kleur ona iha lia-loos, ita nafatin bele aprende buat foun husi Bíblia nia hanorin báziku sira. Porezemplu, ema neʼebé matenek teʼin no ema neʼebé foin aprende teʼin uza ingrediente neʼebé hanesan atu prepara hahán. Maibé, ema neʼebé matenek teʼin hatene oinsá atu uza didiʼak ingrediente sira-neʼe atu halo hahán foun no gostu. Nuneʼe mós ho Jeová nia atan neʼebé kleur ona iha lia-loos, karik sira-nia haree kona-ba hanorin báziku mak la hanesan ho no ema neʼebé foin aprende Bíblia. Ita-nia situasaun ka knaar bele troka depois ita hetan tiha batizmu. Bainhira ita hanoin kleʼan kona-ba Bíblia nia hanorin neʼebé ita aprende ona, ita bele haree dalan foun oinsá atu aplika hanorin neʼe iha ita-nia situasaun agora. Mai ita haree Bíblia nia hanorin báziku tolu no oinsá neʼe bele ajuda ita neʼebé kleur ona iha lia-loos.

JEOVÁ MAK KRIADÓR

4. Kuandu ita aprende katak Jeová mak Kriadór, oinsá mak neʼe afeta ita?

⁴ Bíblia hatete: “Maromak mak harii buat hotu.” (Ebr 3:4) Ita hatene katak Jeová mak Kriadór neʼebé matenek no kbiit boot. Nia kria planeta mundu no buat hotu neʼebé moris. Nia mós kria ita, tan neʼe nia hatene didiʼak ita. Laʼós neʼe deʼit, nia mós hanoin ita no hatene buat neʼebé diʼak liu ba ita. Hodi hatene lia-loos báziku katak Jeová mak Kriadór, neʼe troka ona ita-nia moris no halo ita-nia moris iha objetivu.

5. Saida mak ajuda ita atu haburas haraik an? (Isaias 45:​9-12)

⁵ Kuandu ita hatene katak Jeová mak Kriadór neʼe ajuda ita atu haburas haraik an. Bainhira Job fokus demais ba ninia an no ema seluk, Jeová fó-hanoin Job katak Nia mak Kriadór neʼebé kbiit boot liu hotu. (Job 38:​1-4) Neʼe ajuda Job atu rekoñese katak Maromak nia hanoin mak aas liu fali ema nia hanoin. Liutiha tempu balu, profeta Isaias hakerek: “Rai-mean bele ka lae atu dehan ba Badaen Rai-Mean: ‘Ó halo saida?’”—Lee Isaias 45:​9-12.

6. Iha situasaun saida mak ita presiza hanoin kleʼan kona-ba ita-nia Kriadór? (Haree mós foto.)

⁶ Kuandu ema ida serbí Jeová ba tinan barak ona, nia bele deʼit komesa sadere ba ninia an rasik duké tau fiar ba Jeová no Bíblia. (Job 37:​23, 24) Maibé, oinsá se ema neʼe hanoin kleʼan kona-ba Kriadór neʼebé matenek no kbiit boot? (Isa 40:22; 55:​8, 9) Neʼe sei ajuda nia atu haraik an no rekoñese katak Jeová nia hanoin mak importante liu fali ninia hanoin.

7. Saida mak Rahela halo atu simu mudansa iha Jeová nia organizasaun?

⁷ Irmán Rahela neʼebé hela iha Eslovénia hatete katak hodi hanoin didiʼak kona-ba Kriadór ajuda nia atu simu mudansa iha Jeová nia organizasaun. Nia hatete: “Dala ruma susar ba haʼu atu halo tuir desizaun husi irmaun sira neʼebé dirije. Porezemplu, maski haʼu haree ona Notísias husi Grupu Administradór #8 iha tinan 2023, maibé foufoun bainhira haree irmaun neʼebé iha hasarahun mak hatoʼo diskursu, haʼu sente la diʼak. Tan neʼe, haʼu halo orasaun ba Jeová atu ajuda haʼu simu mudansa neʼe.” Rahela rekoñese katak tanba Jeová mak Kriadór, nia sempre hatene oinsá atu dirije ninia organizasaun iha dalan neʼebé diʼak liu. Se Ita sente susar atu simu esplikasaun foun kona-ba eskritura ka matadalan foun, diʼak atu buka tempu hodi hanoin kleʼan kona-ba Kriadór nia kbiit no matenek.—Rom 11:​33-36.

TANBASÁ MAROMAK HUSIK TERUS AKONTESE

8. Hodi aprende tanbasá Maromak husik terus akontese, neʼe lori benefísiu saida mai ita?

⁸ Tanbasá mak Maromak husik terus akontese? Ema balu neʼebé la hatene resposta ba pergunta neʼe sai hirus ba Maromak ka hanoin katak Maromak la iha! (Prov 19:3) Maibé ita aprende ona katak ema hetan terus no mate tanba ita mak sala-naʼin, laʼós tanba Jeová mak halo ema hetan terus. Ita mós aprende ona katak Jeová nia pasiénsia loke dalan ba ema millaun ba millaun atu koñese nia no aprende kona-ba oinsá nia sei halakon ema nia susar hotu. (2 Ped 3:​9, 15) Lia-loos sira-neʼe halo ita sente kmaan no hakbesik liután ba Jeová.

9. Iha situasaun saida deʼit mak ita presiza hanoin didiʼak kona-ba tanbasá Jeová husik terus akontese?

⁹ Ita komprende katak presiza hatudu pasiénsia nuʼudar ita hein ba Jeová atu halakon susar hotu. Maski nuneʼe, kuandu ita ka ita-nia família mak hasoru situasaun susar, la justisa, ka ema neʼebé Ita hadomi mate, neʼe bele halo Ita hanoin tanbasá Jeová la halakon lalais susar sira-neʼe. (Hab 1:​2, 3) Iha situasaun hanesan neʼe, diʼak atu hanoin fali razaun tanbasá Jeová husik ema laran-loos hasoru susar.a (Sal 34:19) Ita mós bele hanoin kona-ba Jeová nia hakarak atu halakon susar ba nafatin.

10. Saida mak ajuda Anne tahan bainhira ninia amá mate?

¹⁰ Kuandu ita hatene tanbasá Jeová husik terus akontese, neʼe bele ajuda ita atu tahan. Irmán Anne neʼebé hela iha illa Maiote iha Oseanu Indianu hatete: “Tinan balu liubá, bainhira haʼu-nia amá mate, haʼu triste tebes. Maibé, haʼu sempre fó-hanoin ba haʼu-nia an katak neʼe laʼós Jeová nia sala. Jeová hakarak tebes atu halakon susar hotu no fó moris-hiʼas ba ema mate. Kuandu hanoin kleʼan kona-ba lia-loos sira-neʼe, neʼe halo haʼu sente dame iha laran.”

11. Kuandu ita hatene tanbasá Jeová husik terus akontese, oinsá neʼe ajuda ita atu kontinua haklaken?

¹¹ Kuandu ita hatene tanbasá Jeová husik terus akontese, neʼe motiva ita atu kontinua haklaken. Bainhira Pedro esplika katak Jeová nia pasiénsia loke dalan ba ema atu arrepende an no hetan salvasaun, nia hakerek: “Hanoin didiʼak bá imi tenke sai ema hanesan saida. Imi tenke hatudu hahalok santu no laran-metin ba Maromak.” (2 Ped 3:11) Dalan ida atu hatudu “laran-metin ba Maromak” mak liuhusi serbisu haklaken. Hanesan Aman Jeová, ita mós hadomi ema. Ita hakarak sira atu moris iha mundu foun. Jeová hatudu pasiénsia hodi fó oportunidade ba ema iha ita-nia área atu bele serbí nia. Ita iha priviléjiu furak atu serbisu hamutuk ho Jeová no ajuda ema barak liután atu aprende kona-ba nia antes mundu nia rohan toʼo mai!—1 Kor 3:9.

ITA MORIS IHA “LORON IKUS SIRA”

12. Tanba hatene katak ita moris iha loron ikus sira, oinsá mak neʼe lori benefísiu mai ita?

¹² Bíblia fó-hatene nanis kona-ba ema nia hahalok iha “loron ikus sira”. (2 Tim 3:​1-5) Kuandu ita haree ema neʼebé haleʼu ita, ita bele hatene ho klaru oinsá mak profesia neʼe sai loos daudaun. Nuʼudar ita haree ema nia hahalok sai aat ba beibeik, neʼe halo ita fiar metin liután katak Maromak nia Liafuan sempre sai loos.—2 Tim 3:​13-15.

13. Oinsá mak Jesus nia ai-knanoik iha Lucas 12:​15-21 bele ajuda ita?

¹³ Tanba hatene katak ita moris iha loron ikus sira, neʼe mós bele ajuda ita atu uza tempu ho didiʼak. Ita bele aprende tanbasá importante atu halo nuneʼe liuhusi Jesus nia ai-knanoik iha Lucas 12:​15-21. (Lee.) Tanbasá ema riku neʼe mak “beik-teen”? Laʼós tanba nia riku, maibé tanba ninia prioridade mak sala. Nia “halibur deʼit rikusoin ba ninia an maibé la sai riku ba Maromak”. Nia uza ninia tempu iha dalan neʼebé sala, tan neʼe Maromak hatete ba nia: “Iha kalan neʼe kedas ó sei lakon ó-nia moris.” Nuʼudar mundu aat neʼe besik atu remata, ita bele husu ba ita-nia an: ‘Haʼu-nia planu hatudu katak haʼu uza tempu ho didiʼak ka lae? Haʼu ajuda haʼu-nia oan atu halo planu hanesan saida? Haʼu uza haʼu-nia forsa, tempu, no osan atu halibur rikusoin iha mundu, ka iha lalehan?’

14. Tuir Miki nia esperiénsia, tanbasá ita presiza hanoin kona-ba ita moris iha loron ikus sira?

¹⁴ Bainhira ita hanoin kona-ba evidénsia neʼebé hatudu katak ita moris iha loron ikus sira, neʼe bele ajuda ita atu halo desizaun neʼebé matenek. Irmán ida naran Miki konta: “Bainhira haʼu remata eskola sekundária, haʼu hakarak tebes tama universidade atu estuda kona-ba animál sira. Haʼu mós hakarak sai pioneiru regulár no serbí iha fatin neʼebé presiza liután haklaken-naʼin. Belun sira neʼebé maduru anima haʼu atu hanoin didiʼak kona-ba bele ka lae haʼu tama universidade maibé iha tempu hanesan kumpre haʼu-nia planu espirituál. Sira fó-hanoin haʼu katak lakleur tan mundu nia rohan sei mai, no iha mundu foun haʼu bele estuda kona-ba animál hotu ba nafatin. Entaun, haʼu hili atu tuir deʼit kursu ba tempu balu hodi aumenta haʼu-nia skill. Neʼe ajuda haʼu atu hetan serbisu neʼebé apoia haʼu-nia pioneiru no tuirmai muda ba Ekuadór, fatin neʼebé presiza liután haklaken-naʼin.” Agora Miki no ninia laʼen serbí nuʼudar katuas área iha Ekuadór.

15. Tanbasá ita labele rende an atu haklaken ba ema neʼebé seidauk hatudu interese? Fó toʼok ezemplu. (Haree mós foto.)

¹⁵ Ita la presiza laran-kraik bainhira ema lakohi simu liafuan diʼak. Ema nia hanoin bele troka. Porezemplu Jesus nia alin Tiago, nia haree Jesus sai boot, sai Mesias, no hanorin ema iha dalan neʼebé matenek tebes. Maibé, ba tinan barak Tiago lakohi laʼo tuir Jesus. Kuandu Jesus hetan tiha moris-hiʼas mak nia foin sai dixípulu ida, no nia laran-manas tebes!b (João 7:5; Gal 2:9) Tan neʼe, importante atu la rende an kona-ba Ita-nia família neʼebé seidauk hatudu interese, no kontinua haklaken ba sira neʼebé uluk lakohi rona. Hanoin-hetan, ita moris iha loron ikus sira, no serbisu haklaken mak urjente. Karik buat neʼebé Ita hatete ba sira agora bele book sira iha aban-bainrua, karik bainhira terus boot komesa.c

HATUDU AGRADESE BA HANORIN BÁZIKU HUSI JEOVÁ

16. Oinsá mak Ita hetan benefísiu husi hanorin báziku neʼebé ita simu? (Haree mós kaixa “Uza hanorin báziku atu ajuda ema seluk”.)

¹⁶ Ai-han espirituál balu neʼebé ita simu mak prepara ba ema neʼebé nunka rona ba lia-loos báziku husi Bíblia. Porezemplu, diskursu públiku, informasaun no vídeo balu husi jw.org, no revista sira ba públiku mak liuliu ba ema neʼebé laʼós Testemuña. Maski nuneʼe, ita mós hetan benefísiu tanba informasaun sira-neʼe bele haburas ita-nia domin ba Jeová, hametin ita-nia fiar ba Bíblia, no ajuda ita atu fahe lia-loos báziku ba ema iha dalan neʼebé matenek liután.—Sal 19:7.

17. Iha situasaun saida deʼit mak Ita bele hanoin fali kona-ba Bíblia nia hanorin báziku sira?

¹⁷ Nuʼudar Jeová nia povu, ita kontente tebes bainhira simu esplikasaun foun kona-ba lia-loos husi Bíblia. Maibé, ita mós agradese tebes kona-ba hanorin báziku neʼebé ajuda ona ita hakbesik ba Jeová. Se ita sente katak ita-nia hanoin mak diʼak liu fali matadalan neʼebé ita simu husi organizasaun, ita presiza hanoin-hetan katak Jeová, Kriadór neʼebé kbiit boot no matenek mak dirije organizasaun. Bainhira ita ka ema neʼebé ita hadomi hasoru susar, ita bele hatudu pasiénsia no hanoin kona-ba tanbasá Jeová husik susar akontese. No bainhira ita halo desizaun kona-ba oinsá atu uza ita-nia tempu no forsa, hanoin-hetan katak ita moris iha loron ikus sira no agora mak tempu neʼebé urjente. Tan neʼe, husik Jeová nia hanorin báziku sira kontinua hametin ita, motiva ita, no halo ita matenek.