Pergunta husi lee-naʼin
Ema neʼebé hakerek Provérbios 30:18, 19 hatete katak “dalan neʼebé mane ida halo feto-klosan ida laran-monu” mak buat neʼebé halo nia “la komprende”. Liafuan sira-neʼe katak sá?
Ema barak sente konfuzaun kona-ba liafuan sira-neʼe, inklui matenek-naʼin balu kona-ba Bíblia. Iha Bíblia Tradusaun Mundu Foun, versíkulu rua neʼe hatete: “Iha buat tolu neʼebé halo haʼu hakfodak duni [ka, “neʼebé diʼak liu”, nota], no buat haat neʼebé haʼu la komprende. Haʼu la komprende dalan neʼebé manu-makikit semo iha lalehan, dalan neʼebé samea dolar iha fatuk leten, dalan neʼebé ró halai iha tasi luan, no dalan neʼebé mane ida halo feto-klosan ida laran-monu.”—Prov 30:18, 19.
Uluk, ita komprende katak fraze “dalan neʼebé mane ida halo feto-klosan ida laran-monu” mak buat neʼebé negativu. Tanbasá? Versíkulu antes neʼe temi kona-ba buat negativu balu neʼebé nunka dehan “toʼo ona”. (Prov 30:15, 16) No versíkulu 20 koʼalia kona-ba “feen neʼebé halo sala seksuál” neʼebé hatete katak nia la halo buat neʼebé sala. No versíkulu 19 temi kona-ba dalan neʼebé manu-makikit semo, samea dolar iha fatuk leten, ró halai iha tasi, no mane ida halo feto-klosan laran-monu. Buat neʼebé hanesan entre pontu haat neʼe mak la iha evidénsia neʼebé ajuda ema atu hatene ninia dalan. Tan neʼe, ita hanoin katak fraze “dalan neʼebé mane ida halo feto-klosan ida laran-monu” mak refere ba buat negativu tanba mane neʼe lohi feto-klosan neʼebé la iha esperiénsia atu halo relasaun seksuál.
Maibé, iha razaun diʼak atu fiar katak versíkulu sira-neʼe koʼalia kona-ba buat pozitivu. Hakerek-naʼin ba versíkulu neʼe fó sai deʼit kona-ba buat neʼebé halo nia admira.
Língua Ebraiku orijinál mós hatudu katak versíkulu sira-neʼe temi kona-ba buat pozitivu. Disionáriu ida neʼebé esplika kona-ba Eskritura Lian Ebraiku hatete katak liafuan neʼebé tradús nuʼudar “haʼu hakfodak duni” iha Provérbios 30:18 “refere ba buat neʼebé halo ema admira, sente imposivel, ka furak tebes”.
Profesór Crawford H. Toy husi Universidade Harvard iha Estadus Unidus mós hatete katak versíkulu neʼe laʼós koʼalia kona-ba buat negativu. Nia hatete: “Hakerek-naʼin ba versíkulu neʼe hakarak atu fó sai katak buat sira-neʼe mak furak tebes.”
Tan neʼe, ita bele fiar katak Provérbios 30:18, 19 koʼalia kona-ba buat neʼebé furak tebes toʼo susar atu komprende. Hanesan hakerek-naʼin ba Provérbios, ita mós admira ho dalan neʼebé manu-makikit semo aas, samea dolar iha fatuk leten maski la iha ain, ró halai iha tasi maski todan, no dalan neʼebé mane joven no feto joven laran-monu ba malu no ikusmai halaʼo moris kontente nuʼudar feen-laʼen.