Jeová bele ajuda ita hetan ksolok neʼebé loos

1-2. (a) Ohin loron ema barak sente oinsá? (b) Iha lisaun neʼe, ita sei aprende kona-ba saida?

OHIN loron ema barak hakaʼas an atu iha moris neʼebé kontente, maibé sira nafatin labele sente kontente. Ema barak sente katak sira-nia moris mak mamuk deʼit no nakonu ho triste. Jeová nia povu mós bele sente hanesan neʼe. Tanba ita moris iha “loron ikus sira”, ita bele deʼit hasoru situasaun no sentimentu neʼebé “susar atu tahan”.—2 Tim 3:1.

² Iha lisaun neʼe, ita sei aprende kona-ba saida mak bele halakon ita-nia ksolok no saida mak ita bele halo atu sente haksolok fali. Maibé ulukliu, mai ita buka-hatene sé mak Hun ba ksolok neʼebé loos.

HUN BA KSOLOK NO KONTENTE NEʼEBÉ LOOS

3. Saida mak ita aprende kona-ba Jeová liuhusi kriasaun sira? (Haree mós foto.)

³ Husi uluk kedas Jeová sempre kontente. No nia hakarak ita atu sente kontente. Tan neʼe mak nia kria mundu neʼebé furak, kór oioin, animál sira neʼebé komik, no hahán oioin neʼebé gostu. Sin, Maromak hadomi tebes ita no nia hakarak ita atu moris haksolok!

Elefante oan: Image © Romi Gamit/Shutterstock; pinguín oan: Vladimir Seliverstov/500px via Getty Images; bibi-oan: Rita Kochmarjova/stock.adobe.com; golfiñu rua: georgeclerk/E+ via Getty Images

4. (a) Tanbasá mak Jeová nafatin sente kontente maski nia haree terus no susar akontese iha mundu? (b) Oinsá mak Jeová ajuda ita? (Salmo 16:11)

⁴ Jeová mak “Maromak neʼebé kontente”, maski nuneʼe nia sente triste bainhira haree terus no susar neʼebé akontese iha mundu. (1 Tim 1:11) Maibé nia la husik ida-neʼe atu halakon ninia ksolok. Nia hatene katak susar hotu mak temporáriu deʼit, no nia hein ho pasiénsia ba tempu neʼebé nia deside ona atu halakon susar hotu ba nafatin. Maibé antes tempu neʼe, ita bele fiar katak Jeová komprende kona-ba susar neʼebé ita hasoru no nia hakarak ajuda ita. Oinsá mak Jeová halo ida-neʼe? Dalan ida mak hodi ajuda ita atu sente haksolok. (Lee Salmo 16:11.) Mai ita haree oinsá mak Jesus bele sente haksolok tanba koñese didiʼak Jeová.

5-6. Tanbasá Jesus kontente?

⁵ Husi Jeová nia kriasaun hotu, Jesus mak ida neʼebé kontente liu. Tanbasá? Hanoin toʼok kona-ba razaun rua. (1) “Nia mak ilas husi Maromak neʼebé matan labele haree” no nia haleno ninia Aman nia hahalok iha dalan neʼebé perfeitu. (Kol 1:15; 1 Tim 6:15) (2) Jesus mak ida neʼebé gasta tempu barak liu ho ninia Aman, neʼebé mak Hun ba ksolok.

⁶ Jesus sempre kontente tanba nia halo tuir buat neʼebé ninia Aman haruka. (Prov 8:​30, 31; João 8:29) Tan neʼe Jeová sente orgullu tebes ho nia.—Mt 3:17.

7. Oinsá mak ita bele hetan ksolok neʼebé loos?

⁷ Ita mós bele hetan ksolok neʼebé loos hodi hakbesik ba Jeová, neʼebé mak Hun ba ksolok. Bainhira ita gasta tempu barak atu aprende kona-ba Jeová no banati-tuir nia, ita sei sente kontente liután. Ita mós bele sente kontente hodi halo tuir Maromak nia hakarak no hatene katak nia simu ita.a (Sal 33:12) Maibé oinsá se ita sente lakon ksolok, karik ba loron balu deʼit ka ba tempu naruk? Neʼe katak Jeová la simu ona ita ka lae? Lae! Jeová komprende katak ita la perfeitu no dala ruma ita sente triste tebes no laran-susar. (Sal 103:14) Mai ita haree saida deʼit mak bele halakon ksolok no oinsá ita bele sente haksolok fali.

KETA HUSIK BUAT IDA HALAKON ITA-NIA KSOLOK

8. Susar neʼebé ita hasoru halo ita sente oinsá?

⁸ Dezafiu primeiru: Bainhira hasoru susar. Karik agora daudaun ita hasoru susar tanba ema fó-terus, dezastre naturais, kiak, ka idade. Susar sira-neʼe bele halo ita lakon ita-nia ksolok, liuliu kuandu ita labele halo buat ida atu troka situasaun. Bíblia hatete ho klaru katak “laran-kanek halo ema sai triste”. (Prov 15:13) Katuas kongregasaun ida naran Charalambos sente nuneʼe. Iha tinan haat nia laran deʼit, nia lakon ninia maun, amá, no apá tanba mate. Nia hatete: “Haʼu sente mesamesak no la iha ida mak bele ajuda haʼu. Iha tempu neʼebá, haʼu sente triste tebes tanba labele gasta tempu barak ho sira antes sira mate.” Sin, susar neʼebé ita hasoru bele halo ita lakon forsa no ksolok.

9. Saida mak bele ajuda ita atu sente haksolok fali? (Jeremias 29:​4-7, 10)

⁹ Saida mak bele ajuda ita atu sente haksolok fali? Ita bele sente haksolok fali hodi simu realidade no agradese ba buat neʼebé ita iha. Mundu neʼe fó sai ideia katak ita presiza halaʼo moris perfeitu atu bele sente kontente. Maibé neʼe la loos. Porezemplu, Jeová hatete ba ninia povu neʼebé sai dadur iha Babilónia atu simu realidade no halo buat neʼebé sira bele atu sente haksolok maski iha situasaun susar. (Lee Jeremias 29:​4-7, 10.) Lisaun mak saida? Koko atu simu Ita-nia situasaun no agradese ba buat diʼak neʼebé Ita iha. Hanoin-hetan katak Jeová sempre ajuda Ita. (Sal 63:7; 146:5) Irmán Effie neʼebé hetan asidente no labele laʼo, hatete: “Haʼu hetan ajuda boot husi Jeová, haʼu-nia família, no kongregasaun. Haʼu hakarak hatudu katak haʼu agradese ba sira-nia apoiu. Tan neʼe, haʼu lakohi rende an no koko halo buat neʼebé haʼu bele atu kontinua haksolok.”

10. Tanbasá ita bele sente haksolok maski hasoru susar?

¹⁰ Maski hasoru susar ka buat aat akontese ba ita ka ita-nia família, ita bele nafatin sente haksolok. (Sal 126:5) Tanbasá? Tanba ita-nia ksolok la depende ba ita-nia situasaun. Pioneiru ida naran Maria, hatete: “Bainhira hasoru susar, ita bele nafatin haksolok tanba hanoin kona-ba buat neʼebé Jeová promete ona. Neʼe la dehan katak ita sei nunka tanis ka hatudu sai ita-nia sentimentu. Ita-nia Aman bele ajuda ita atu nafatin haksolok iha situasaun naran deʼit.” Hanoin-hetan katak maski ita hasoru daudaun situasaun neʼebé susar tebes, maibé neʼe temporáriu deʼit. Hanesan ain-fatin iha tasi-ibun neʼebé laloran sei halakon tiha, lakleur tan Jeová sei halakon buat hotu neʼebé lori susar no triste.

11. Oinsá mak apóstolu Paulo nia ezemplu fó korajen ba Ita?

¹¹ Karik ita komesa hanoin katak ita hasoru susar tanba Jeová la kontente ho ita. Se ita sente hanesan neʼe, hanoin toʼok kona-ba Jeová nia atan sira neʼebé hasoru situasaun neʼebé susar tebes. Porezemplu, hanoin toʼok kona-ba apóstolu Paulo. Jesus rasik mak hili nia atu haklaken liafuan diʼak “ba nasaun sira, liurai sira, no mós ba Izraél nia oan sira”. (Após 9:15) Neʼe mak priviléjiu duni! Maibé, Paulo hasoru susar barak. (2 Kor 11:​23-27) Maski nuneʼe, Jeová nafatin kontente ho nia. Tuir loloos, Paulo bele tahan susar sira tanba Jeová mak ajuda nia. (Rom 5:​3-5) Agora, hanoin toʼok kona-ba Ita-nia situasaun. Ita mós kontinua serbí Jeová ho laran-metin maski hasoru susar. Tan neʼe, Ita bele fiar katak Jeová nafatin ajuda Ita no nia kontente ho Ita.

12. Bainhira ita-nia hakarak la sai loos, oinsá mak neʼe bele halakon ita-nia ksolok?

¹² Dezafiu segundu: Bainhira ita-nia hakarak la sai loos. (Prov 13:12) Tanba ita hadomi Jeová no agradese ba buat hotu neʼebé nia halo ba ita, neʼe book ita atu hakarak serbí nia iha dalan neʼebé diʼak liután. Maibé, se ita labele kumpre ita-nia hakarak tanba ita-nia situasaun, neʼe bele halo ita triste. (Prov 17:22) Irmán pioneiru ida naran Holly hatete: “Haʼu hakarak tuir Eskola ba Haklaken-Naʼin Tempu-Tomak, serbí iha rai seluk, ka ajuda iha serbisu konstrusaun iha Ramapo. Maibé haʼu-nia situasaun troka, no haʼu labele kumpre haʼu-nia planu sira-neʼe. Neʼe halo haʼu estrese.” Jeová nia atan barak mak sente hanesan neʼe.

13. Se ita-nia situasaun la permite atu halo buat barak ba Jeová, saida mak ita bele halo?

¹³ Saida mak bele ajuda ita atu sente haksolok fali? Hanoin-hetan katak Jeová la husu ita atu halo buat neʼebé liu fali ita-nia kbiit. Jeová hafolin ita hodi la kompara ita ho ema seluk. Nia hakarak ita atu hatudu haraik an no laran-metin. (Miq 6:8; 1 Kor 4:2) Jeová interese liu kona-ba buat neʼebé iha ita-nia laran duké buat neʼebé ita halo. Tan neʼe, ita la presiza obriga an atu halo buat neʼebé liu fali ita-nia kbiit.b Duké hanoin kona-ba buat neʼebé Ita labele halo ba Jeová, diʼak atu fokus ba buat neʼebé Ita bele halo. Karik Ita bele treinu joven sira ka anima ferik-katuas sira. Karik Ita bele koko vizita ema ruma, telefone ema neʼe, ka haruka mensajen hodi bele anima nia. Jeová kontente bainhira haree Ita halo buat neʼebé Ita bele, no nia sei ajuda Ita atu sente haksolok! No hanoin-hetan katak lakleur tan iha mundu foun ita sei iha oportunidade atu serbí Jeová ba nafatin iha dalan neʼebé ita labele imajina! Irmán Holly neʼebé temi ona, hatete: “Kuandu haʼu sente triste, haʼu para no hanoin: ‘Haʼu iha esperansa atu moris ba nafatin.’ No iha mundu foun, Jeová sei ajuda haʼu atu halo buat barak liután atu serbí nia.”

14. Saida tan mak bele halakon ita-nia ksolok?

¹⁴ Dezafiu terseiru: Bainhira hakarak halo kontente an deʼit. Média sosiál sempre hatudu kona-ba ema neʼebé haree hanesan kontente loos tanba sira goza buat diʼak barak. Karik neʼe halo ita hanoin katak se ita halo buat neʼebé ita gosta, sosa buat neʼebé ita hakarak, no halo viajen ba fatin oioin, neʼe sei halo ita kontente. La sala atu halo buat neʼebé lori kontente. Jeová kria ita atu bele goza buat furak oioin. Maibé ema barak neʼebé koko atu halo kontente an deʼit, ikusmai rekoñese katak buat sira-neʼe halakon deʼit sira-nia ksolok. Irmán pioneiru ida naran Eva hatete: “Bainhira ita hakarak atu halo kontente an deʼit, ita sei nunka satisfás ho buat neʼebé ita iha.” Se ita hakarak deʼit atu buka kontente ba ita-nia an, ikusmai ita sei sente mamuk no triste.

15. Saida mak ita aprende husi Liurai Salomão nia esperiénsia?

¹⁵ Ita bele aprende husi Liurai Salomão nia esperiénsia. Nia koko halo kontente ninia an hodi halo buat neʼebé nia hakarak, hanesan han hahán gostu, rona múzika furak, no sosa buat diʼak hotu neʼebé nia hakarak. Maibé buat sira-neʼe la lori kontente neʼebé loos. Nia hatete: “Ema nia matan la kontente bainhira haree ida-neʼe; no ema nia tilun sai baruk ona atu rona ida-neʼe.” (Ecle 1:8; 2:​1-11) Mundu nia hanoin kona-ba buat neʼebé bele lori kontente mak hanesan deʼit ho osan falsu. Maski haree hanesan iha folin, maibé labele uza atu sosa buat ida.

16. Oinsá mak hodi ajuda ema seluk bele halo ita sente haksolok fali? (Haree mós foto.)

¹⁶ Saida mak bele ajuda ita atu sente haksolok fali? Jesus hanorin katak “kontente liu atu fó duké simu”. (Após 20:35) Irmaun katuas ida naran Alekos hatete: “Haʼu koko halo buat kiʼik atu ajuda ema seluk. Bainhira haʼu ajuda sira, neʼe halo haʼu hanoin liu kona-ba sira duké haʼu-nia an, no neʼe halo haʼu kontente.” Saida mak Ita bele halo atu ajuda ema seluk? Se Ita haree ema ida hasoru susar, koko atu anima nia. Karik Ita labele rezolve ninia problema, maibé Ita bele rona ba nia ho laran-diʼak, hanoin kona-ba ninia sentimentu, no anima nia atu entrega ninia laran-susar ba Jeová. (Sal 55:22; 68:19) Ita bele fó-hanoin nia katak Jeová sei nunka husik hela nia. (Sal 37:28; Isa 59:1) Ita mós bele halo buat ruma ba nia, porezemplu teʼin ba nia, ka lori nia laʼo pasiar. Konvida nia atu haklaken hamutuk, tanba neʼe sei halo nia sente kontente fali. Husik Jeová uza Ita atu ajuda ema seluk. Kuandu ita fokus atu ajuda ema seluk, neʼe sei halo ita sente ksolok neʼebé loos!—Prov 11:25.

17. Saida mak ita presiza halo atu hetan ksolok neʼebé loos? (Salmo 43:4)

¹⁷ Ita bele haksolok duni se ita kontinua hakbesik ba ita-nia Aman iha lalehan. Bíblia hatete katak ita sei ‘haksolok tebes tanba ita-nia Maromak’. (Lee Salmo 43:4.) Entaun, maski hasoru susar naran deʼit, ita bele sente seguru. Se Jeová mak ita-nia belun diʼak, nia bele ajuda ita atu hetan ksolok neʼebé ba nafatin!—Sal 144:15.