LISAUN ESTUDU 43
KNANANUK 41 Rona mai haʼu-nia orasaun
Keta haluha atu halo orasaun kona-ba ema seluk
“Halo orasaun ba malu . . . Ema laran-loos nia harohan iha forsa boot tebes.”—TGO 5:16.
OBJETIVU
Aprende tanbasá importante atu halo orasaun ba ema seluk, no sujestaun sira oinsá atu halo ida-neʼe.
1. Oinsá ita hatene katak ita-nia orasaun mak importante ba Jeová?
ORASAUN mak prezente neʼebé furak tebes. Hanoin toʼok: Jeová fó ona knaar balu ba anju sira. (Sal 91:11) Nia mós fó responsabilidade importante oioin ba ninia Oan. (Mt 28:18) Maibé, oinsá kona-ba atu rona ba ema nia orasaun? Jeová rasik hakarak halo ida-neʼe. Sin, Jeová mak “Maromak neʼebé rona ba orasaun”.—Sal 65:2.
2. Apóstolu Paulo hatudu ezemplu saida kona-ba halo orasaun ba ema seluk?
2 Maski ita bele halo orasaun ba Jeová kona-ba ita rasik nia situasaun, ita mós presiza halo orasaun ba ema seluk. Neʼe mak buat neʼebé apóstolu Paulo halo. Porezemplu, nia hakerek ba kongregasaun iha Éfeso: “Haʼu nafatin temi imi iha haʼu-nia orasaun.” (Éf 1:16) Paulo mós halo orasaun ba ema ida-idak. Porezemplu, nia hatete ba Timóteo: “Haʼu fó agradese ba Maromak, . . . no loron-kalan haʼu la para atu hanoin-hetan ó iha haʼu-nia orasaun.” (2 Tim 1:3) Loloos Paulo iha ninia problema rasik, maski nuneʼe nia nafatin uza tempu atu halo orasaun kona-ba ema seluk.—2 Kor 11:23; 12:7, 8.
3. Tanbasá dala ruma ita haluha halo orasaun ba ema seluk?
3 Dala ruma ita haluha atu halo orasaun ba ema seluk. Tanbasá? Irmán ida naran Sabrinaa fó razaun ida. Nia dehan: “Ita-nia moris mak okupadu tebes. Dala ruma ita fokus liu ba ita-nia problema sira no ita halo orasaun kona-ba ita-nia an deʼit.” Neʼe mós akontese ba Ita ka lae? Se nuneʼe, lisaun neʼe bele ajuda Ita. Ita sei haree (1) tanbasá importante atu halo orasaun kona-ba ema seluk no (2) oinsá ita bele halo ida-neʼe.
TANBASÁ HALO ORASAUN KONA-BA EMA SELUK?
4-5. Tanbasá ita-nia orasaun kona-ba ema seluk mak “iha forsa boot tebes”? (Tiago 5:16)
4 Ita-nia orasaun kona-ba ema seluk “iha forsa boot tebes”. (Lee Tiago 5:16.) Ita-nia orasaun bele ajuda ema seluk ka lae? Sin, bele duni. Porezemplu, Jesus hatene katak lakleur tan apóstolu Pedro sei nega nia. Nia dehan ba Pedro: “Haʼu harohan ona ba Maromak kona-ba ó, atu nuneʼe ó-nia fiar labele sai fraku.” (Lc 22:32) Paulo mós hatene katak orasaun neʼebé ema seluk halo ba nia bele ajuda atu lori mudansa ba ninia situasaun. Bainhira Paulo sai dadur iha Roma, nia hakerek ba Filemon: “Haʼu hein katak liuhusi imi-nia orasaun sira haʼu sei fila fali ba imi.” (Flm 22) No ida-neʼe mak akontese duni. Lakleur deʼit Paulo sai livre no kontinua ninia serbisu haklaken.
5 Klaru katak Jeová la iha obrigasaun atu halo buat neʼebé ita husu. Maibé nia kontente bainhira haree ita hatudu domin ba ema seluk, no dala ruma nia deside atu halo tuir duni buat neʼebé ita husu. Hodi hatene kona-ba neʼe bele ajuda ita atu halo orasaun ho laran kona-ba situasaun ruma, no husik ida-neʼe iha Jeová nia liman.—Sal 37:5; 2 Korinto 1:11.
6. Se ita halo orasaun kona-ba ema seluk, neʼe halo ita sente oinsá kona-ba ema neʼe? (1 Pedro 3:8)
6 Halo orasaun kona-ba ema seluk ajuda ita atu “hanoin malu”. (Lee 1 Pedro 3:8.) Ema neʼebé “hanoin” ema seluk, haree ema seluk nia terus no iha hakarak atu ajuda ema neʼe. (Mc 1:40, 41) Katuas kongregasaun naran Michael hatete: “Bainhira haʼu halo orasaun kona-ba ema seluk nia presiza, haʼu bele komprende liután sira-nia susar no neʼe halo haʼu hadomi sira liután. Haʼu sente besik liu ba sira, maski sira rasik la hatene ida-neʼe.” Katuas kongregasaun seluk naran Richard koʼalia kona-ba benefísiu ida tan. Nia dehan: “Bainhira ita halo orasaun ba ema seluk, neʼe book ita atu halo buat ruma hodi ajuda ema neʼe. No kuandu ita ajuda nia, neʼe hanesan ita hola parte atu hatán ita rasik nia orasaun ba nia.”
7. Tanbasá halo orasaun kona-ba ema seluk bele ajuda ita iha hanoin neʼebé loos kona-ba ita rasik nia problema? (Filipe 2:3, 4) (Haree mós foto.)
7 Halo orasaun kona-ba ema seluk bele ajuda ita iha hanoin neʼebé loos kona-ba ita rasik nia problema. (Lee Filipe 2:3, 4.) Tanba ita moris iha Satanás nia mundu, ita ida-idak hasoru problema oioin. (1 João 5:19; Apok 12:12) Se ita iha toman atu halo orasaun kona-ba ema seluk, neʼe sei ajuda ita atu hanoin-hetan katak ‘ita-nia maluk fiar-naʼin iha mundu tomak mós tahan terus neʼebé hanesan ita-nian’. (1 Ped 5:9) Pioneiru ida naran Katherine hatete: “Hodi halo orasaun kona-ba ema seluk, ajuda haʼu hanoin-hetan katak sira mós hasoru susar, no haʼu la fokus demais ba haʼu-nia problema sira.”
Halo orasaun ba ema seluk ajuda ita atu la hanoin demais kona-ba ita rasik nia problema (Haree parágrafu 7)d
SIRA PRESIZA ITA-NIA ORASAUN
8. Ita bele halo orasaun kona-ba sé deʼit?
8 Ita bele halo orasaun kona-ba sé deʼit? Ita bele halo orasaun jerál kona-ba irmaun-irmán sira, porezemplu kona-ba sira neʼebé iha problema saúde, joven no labarik sira neʼebé hetan terus no hasoru tentasaun iha eskola, ka ferik-katuas sira neʼebé hasoru susar tanba idade. Ita-nia maluk barak hasoru terus husi família ka governu. (Mt 10:18, 36; Após 12:5) Sira balu tan tenke husik hela sira-nia uma tanba violénsia iha sira-nia área. Ema seluk sai vítima ba dezastre naturais. Karik ita rasik la koñese irmaun-irmán sira-neʼe, maibé bainhira ita halo orasaun ba sira, neʼe hatudu katak ita halo tuir Jesus nia mandamentu atu “hadomi malu”.—João 13:34.
9. Tanbasá ita presiza halo orasaun kona-ba sira neʼebé dirije iha Jeová nia organizasaun no sira-nia feen?
9 Ita mós bele halo orasaun kona-ba sira neʼebé dirije ita iha Jeová nia organizasaun. Neʼe inklui Grupu Administradór no sira-nia ajuda-naʼin, Komisaun ba Sukursál, irmaun sira neʼebé tau matan ba departamentu iha sukursál, katuas área, katuas kongregasaun, no atan ba kongregasaun. Irmaun sira-neʼe mós hasoru problema, maibé iha tempu hanesan sira mós hakaʼas an atu ajuda ita. (2 Kor 12:15) Porezemplu, katuas área ida naran Mark hatete: “Haʼu sempre hanoin barak kona-ba haʼu-nia inan-aman neʼebé hela dook. Sira-nia saúde la diʼak. Maski sira hetan ajuda husi haʼu-nia biin ho ninia laʼen, maibé haʼu sente triste tebes tanba labele ajuda liután sira.” Maski ita la hatene ho loloos susar neʼebé irmaun sira-neʼe hasoru, maibé ita hakarak kontinua halo orasaun ba sira. (1 Tes 5:12, 13) Ita mós bele halo orasaun kona-ba irmaun sira-neʼe nia feen tanba ho laran-metin apoia sira-nia laʼen atu kontinua halaʼo knaar.
10-11. Jeová kontente ho orasaun neʼebé jerál kona-ba irmaun-irmán sira ka lae? Esplika toʼok.
10 Hanesan ita koʼalia ona, dala barak ita halo orasaun jerál kona-ba irmaun-irmán sira. Porezemplu, maski ita la hanoin espesífiku kona-ba ema ida, karik ita husu Jeová atu ajuda sira neʼebé iha komarka ka sira neʼebé triste tanba ema neʼebé sira hadomi mate. Katuas kongregasaun naran Donald hatete: “Iha irmaun-irmán barak neʼebé hasoru susar oioin, tan neʼe dala ruma ita halo orasaun jerál kona-ba sira hotu neʼebé hasoru daudaun susar.”
11 Jeová kontente ho orasaun hanesan neʼe ka lae? Kontente duni! Tanba ita la hatene ho loloos situasaun neʼebé irmaun-irmán ida-idak hasoru, tan neʼe ita halo orasaun jerál kona-ba irmaun-irmán sira hodi temi kona-ba problema espesífiku ruma neʼebé sira hasoru. (João 17:20; Éf 6:18) Orasaun hanesan neʼe prova katak ita “hadomi maluk fiar-naʼin hotu”.—1 Ped 2:17.
KUANDU HALO ORASAUN BA EMA IDA-IDAK
12. Oinsá mak hodi observa didiʼak bele ajuda ita atu halo orasaun neʼebé espesífiku?
12 Observa didiʼak. Ita laʼós deʼit halo orasaun jerál, maibé ita mós presiza halo orasaun kona-ba ema ida-idak hodi temi sira-nia naran. Iha ka lae ema ruma iha kongregasaun neʼebé luta hasoru daudaun moras todan? Iha ka lae joven ida neʼebé laran-kraik tanba hasoru susar iha eskola? Iha ka lae inan ka aman ida neʼebé hakaʼas an atu haboot oan mesak “ho hanorin neʼebé tuir Jeová nia hakarak”? (Éf 6:4) Hodi observa didiʼak, bele ajuda Ita atu haburas domin ba ema seluk no neʼe motiva Ita atu halo orasaun kona-ba sira.b—Rom 12:15.
13. Oinsá mak ita bele halo orasaun kona-ba sira neʼebé ita nunka hasoru?
13 Halo orasaun hodi temi sira-nia naran. Ita mós bele halo nuneʼe ba sira neʼebé ita nunka hasoru. Porezemplu, hanoin toʼok kona-ba irmaun-irmán sira neʼebé tama komarka iha Eritreia, Krimeia, Rúsia, no Singapura. Ita bele hetan sira ida-idak nia naran iha jw.org.c Katuas área ida naran Brian hatete: “Haʼu sente katak hodi hakerek sira-nia naran no temi ho lian ajuda haʼu atu hanoin-hetan sira no temi sira iha haʼu-nia orasaun.”
14-15. Oinsá mak ita bele temi buat espesífiku iha ita-nia orasaun?
14 Temi buat espesífiku. Michael, neʼebé temi ona, hatete: “Bainhira haʼu lee esperiénsia iha jw.org kona-ba irmaun-irmán sira neʼebé tama komarka, haʼu koko atu imajina saida mak haʼu sente se haʼu iha sira-nia situasaun. Haʼu sei hanoin barak kona-ba haʼu-nia feen, no oinsá mak nia bele hetan buat neʼebé nia presiza. Neʼe bele ajuda haʼu atu hatene buat espesífiku neʼebé haʼu bele temi iha orasaun kona-ba irmaun neʼebé kaben ona no tama komarka.”—Ebr 13:3, nota.
15 Bainhira ita imajina moris loroloron nian iha komarka laran, neʼe bele ajuda ita atu hanoin buat espesífiku balu tan neʼebé ita bele temi iha orasaun. Porezemplu, ita bele halo orasaun atu guarda komarka hatudu laran-diʼak no autoridade sira bele husik livre irmaun-irmán sira atu halaʼo adorasaun iha komarka laran. (1 Tim 2:1, 2) Ita bele halo orasaun atu irmaun-irmán sira iha sira-nia kongregasaun bele nafatin aten-brani tanba sira-nia ezemplu kona-ba laran-metin, ka ema neʼebé laʼós Testemuña bele haree irmaun-irmán sira-neʼe nia hahalok diʼak no prontu atu rona ba liafuan diʼak. (1 Ped 2:12) Ita mós bele halo buat neʼebé hanesan bainhira halo orasaun kona-ba irmaun-irmán sira neʼebé hasoru susar seluk tan. Hodi observa didiʼak, halo orasaun hodi temi sira-nia naran, no temi buat espesífiku, ita bele hatudu katak ita ‘halo nakonu ita-nia domin ba malu’.—1 Tes 3:12.
HANOIN NEʼEBÉ LOOS KONA-BA ITA-NIA ORASAUN
16. Ita presiza hanoin-hetan saida kuandu ita halo orasaun? (Mateus 6:8)
16 Hanesan ita aprende ona, kuandu ita halo orasaun ba ema seluk, neʼe bele lori mudansa ba sira-nia situasaun. Maibé, ita presiza iha hanoin neʼebé loos. Ita tenke hanoin-hetan katak kuandu ita halo orasaun, ita laʼós fó-hatene ba Jeová kona-ba buat neʼebé nia seidauk hatene, no nia mós la presiza ita-nia matadalan. Jeová hatene ona buat neʼebé ninia atan sira presiza antes sira ka ita hatene. (Lee Mateus 6:8.) Se nuneʼe, tanbasá mak ita presiza halo orasaun ba ema seluk? Ita aprende ona razaun balu, maibé iha razaun ida tan. Halo orasaun ba ema seluk mak dalan ida atu hatudu domin ba malu. No Jeová kontente kuandu ninia atan sira haleno ninia domin.
17-18. Fó toʼok ilustrasaun oinsá mak ita-nia orasaun kona-ba maluk fiar-naʼin sira bele halo Jeová kontente?
17 Maski haree hanesan ita-nia orasaun ladún lori mudansa ba situasaun ruma, maibé hodi halo orasaun ita hatudu katak ita hadomi ita-nia irmaun-irmán sira no Jeová kontente ho ida-neʼe. Hanoin toʼok kona-ba ilustrasaun ida. Família ida iha oan naʼin-rua neʼebé sei kiʼik, oan-mane no oan-feto. Oan-mane neʼe moras no oan-feto husu ba apá: “Apá, ajuda lai nia. Nia moras!” Apá hatene ona ninia oan-mane nia kondisaun. Apá hadomi ninia oan-mane no tau matan didiʼak ba nia. Maibé, kuandu haree oan-feto hanoin tebes ninia maun no husu apá atu ajuda nia, neʼe halo apá kontente tebes.
18 Jeová mós hanesan ho aman neʼe. Nia hakarak ita atu hanoin malu hodi halo orasaun ba malu. Kuandu ita halo nuneʼe, hatudu katak ita la hanoin an deʼit, maibé ita hanoin ema seluk nia diʼak no Jeová kontente ho ida-neʼe. (2 Tes 1:3; Ebr 6:10) No hanesan ita aprende ona, dala ruma ita-nia orasaun bele lori mudansa ba situasaun neʼebé ita-nia maluk sira hasoru. Tan neʼe, mai ita hakaʼas an atu halo orasaun kona-ba ema seluk.
KNANANUK 101 Serbí hamutuk ho unidade
a Naran balu laʼós naran neʼebé loos.
b Haree vídeo Takeshi Shimizu: Jeová “rona ba orasaun” iha jw.org.
c Atu hetan irmaun-irmán sira neʼebé tama komarka nia naran, buka informasaun “Saksi-Saksi Yehuwa yang Dipenjarakan Karena Iman Mereka—Menurut Lokasi” husi jw.org.
d ESPLIKASAUN BA DEZEÑU: Irmaun-irmán sira neʼebé hasoru sira rasik nia problema halo orasaun kona-ba ema seluk neʼebé iha susar laran.