Oinsá atu hadiʼa liután ita-nia orasaun

1-2. (a) Saida deʼit mak bele halo susar ba ita atu koʼalia nakloke ba Jeová? (b) Oinsá mak ita hatene katak Jeová see tilun ba ita-nia orasaun?

DALA ruma Ita sente katak Ita-nia orasaun mak repete deʼit ka tuir toman deʼit ka lae? Neʼe bele akontese ba ita hotu. Tanba ita okupadu tebes, dala ruma ita halo orasaun badak deʼit. Ka karik ita sente susar atu koʼalia nakloke ba Jeová tanba sente la merese atu hakbesik ba nia.

² Bíblia hatete katak bainhira halo orasaun, buat neʼebé importante ba Jeová mak laʼós liafuan neʼebé aas, maibé orasaun neʼebé ita hatoʼo ho haraik an no ho laran. Jeová rona “ema laran-maus sira-nia harohan”. (Sal 10:17) Nia see tilun ba ita-nia liafuan hotu tanba nia hanoin tebes ita.—Sal 139:​1-3.

3. Iha lisaun neʼe, ita sei buka resposta ba pergunta saida deʼit?

³ Iha lisaun neʼe, ita sei buka-hatene resposta ba pergunta tuirmai: Tanbasá ita labele dada an atu halo orasaun? Orasaun hanesan saida mak bele halo ita besik liután ba Jeová? Oinsá mak hodi aprende husi Jeová nia atan sira-nia orasaun bele ajuda ita atu hadiʼa liután ita-nia orasaun? No saida mak ita bele halo se ita estrese tebes toʼo susar atu fó sai ita-nia sentimentu ba Jeová?

LABELE DADA AN ATU HALO ORASAUN BA JEOVÁ

4. Saida mak bele ajuda ita atu la dada an halo orasaun ba Jeová? (Salmo 119:145)

⁴ Bainhira ita komprende katak Jeová mak belun neʼebé laran-metin no hakarak ita hetan susesu, neʼe sei ajuda ita atu la dada an halo orasaun. Hakerek-naʼin ba Salmo 119 koko atu haree Jeová nuʼudar ninia belun bainhira halo orasaun. Nia hasoru problema oioin. Ema balu duun matak nia. (Sal 119:​23, 69, 78) Nia mós presiza luta hasoru ninia fraku. (Sal 119:67) Maski nuneʼe, nia la dada an atu fakar sai ninia sentimentu ba Jeová.—Lee Salmo 119:145.

5. Tanbasá ita labele husik sentimentu negativu halo ita dada an atu halo orasaun? Fó toʼok ilustrasaun.

⁵ Jeová hakarak ema hotu halo orasaun ba nia, inklui mós ema neʼebé halo ona sala boot. (Isa 55:​6, 7) Tan neʼe, ita labele husik sentimentu negativu halo ita dada an atu halo orasaun. Hanoin toʼok kona-ba ilustrasaun tuirmai. Ema ida laʼo sala dalan iha rai-fuik maran no haree ema neʼebé bele ajuda nia. Nia sei dada an atu husu ajuda husi ema neʼe tanba moe ka lae? Lae. Nuneʼe mós, kuandu ita laʼo sala dalan ka halo sala, ita labele dada an atu halo orasaun ba Jeová.—Sal 119:​25, 176.

OINSÁ ATU HADIʼA LIUTÁN ITA-NIA ORASAUN

6-7. Saida mak bele ajuda ita atu fakar sai ita-nia hanoin no sentimentu ba Jeová? Fó toʼok ezemplu. (Haree mós nota-rodapé.)

⁶ Bainhira ita koʼalia nakloke ba Jeová hodi fakar sai ita-nia hanoin no sentimentu neʼebé kleʼan, neʼe sei halo ita hakbesik liután ba nia. Entaun, saida mak ita bele halo atu hadiʼa liután ita-nia orasaun?

⁷ Hanoin didiʼak kona-ba Jeová nia hahalok sira.a Neʼe sei halo fasil liu atu fakar sai ita-nia hanoin no sentimentu. (Sal 145:​8, 9, 18) Hanoin toʼok kona-ba irmán Kristine neʼebé sai vítima ba hahalok violénsia husi ninia apá. Nia hatete: “Susar ba haʼu atu koʼalia ba Jeová nuʼudar Aman. Haʼu sente la merese atu simu Jeová nia domin no Jeová sei la tau matan haʼu.” Jeová nia hahalok saida mak ajuda Kristine? Nia hatutan tan: “Jeová nia domin neʼebé laran-metin halo haʼu sente seguru. Haʼu hatene katak nia sempre tau matan haʼu. Maski haʼu halo sala ruma, nia sei nafatin hadomi no ajuda haʼu. Hodi hanoin hanesan neʼe halo fasil mai haʼu atu fakar sai haʼu-nia sentimentu hotu ba Jeová.”

8-9. Tanbasá diʼak atu hanoin uluk ita-nia liafuan antes halo orasaun? Fó toʼok ezemplu.

⁸ Hanoin uluk ita-nia liafuan. Antes halo orasaun, husu pergunta balu ba Ita-nia an. Porezemplu: ‘Haʼu hasoru daudaun problema espesífiku saida? Haʼu presiza fó perdua ba ema ruma ka lae? Iha mudansa ruma no haʼu presiza Jeová nia ajuda ka lae?’ (2 Reis 19:​15-19) Ita mós bele halo tuir Jesus nia ezemplu hodi hanoin oinsá atu halo orasaun kona-ba Jeová nia naran, Ninia Ukun, no Ninia hakarak.—Mt 6:​9, 10.

⁹ Bainhira irmán ida naran Aliska hatene katak ninia laʼen hetan kankru iha kakutak no besik atu mate, neʼe halo susar ba Aliska atu halo orasaun. Nia hatete: “Tanba haʼu estrese tebes, haʼu la hatene atu koʼalia saida loos iha haʼu-nia orasaun.” Saida mak ajuda Aliska? Nia hatutan tan: “Antes halo orasaun, haʼu hanoin uluk kona-ba liafuan saida mak haʼu atu koʼalia, no neʼe ajuda haʼu atu la fokus deʼit kona-ba haʼu-nia an. Hodi halo nuneʼe, haʼu bele sente kalma no kmaan kuandu halo orasaun.”

10. Tanbasá ita labele ansi kuandu halo orasaun? (Haree mós foto.)

¹⁰ Labele ansi kuandu halo orasaun. Klaru katak orasaun badak mós bele ajuda ita, maibé bainhira ita uza tempu liután hodi halo orasaun, neʼe bele ajuda ita atu fakar sai ita-nia hanoin no sentimentu hotu.b Aliska nia laʼen Elijah hatete: “Haʼu halo orasaun dala barak iha loron ida nia laran, no kuandu haʼu uza tempu naruk liu hodi halo orasaun, neʼe halo haʼu sente besik liután ba Jeová. Jeová rona ba haʼu ho pasiénsia, tan neʼe haʼu la presiza ansi bainhira halo orasaun.” Koko toʼok: Buka tempu no fatin hakmatek atu halo orasaun, karik ita mós bele koko halo orasaun ho lian. Ita bele halo ida-neʼe nuʼudar ita-nia toman.

HANOIN KLEʼAN KONA-BA ORASAUN NEʼEBÉ HAKEREK IHA BÍBLIA

11. Oinsá mak ita bele hetan benefísiu hodi hanoin kleʼan kona-ba Jeová nia atan sira-nia orasaun? (Haree mós kaixa “Ita mós sente hanesan sira?”)

¹¹ Ita mós bele hetan benefísiu hodi hanoin kleʼan kona-ba Jeová nia atan sira-nia orasaun neʼebé hakerek iha Bíblia no sira-nia knananuk atu fó hahiʼi ba Jeová. Nuʼudar ita aprende kona-ba oinsá sira fakar sai sira-nia sentimentu ba Jeová, neʼe bele book ita atu halo tuir sira-nia ezemplu. Karik ita bele hetan liafuan oioin neʼebé ita bele uza iha orasaun atu hahiʼi Jeová. No ita mós bele hetan orasaun neʼebé liga ho ita-nia situasaun.

12. Bainhira lee orasaun sira neʼebé hakerek iha Bíblia, Ita bele husu pergunta saida deʼit?

¹² Bainhira lee orasaun sira neʼebé hakerek iha Bíblia, husu Ita-nia an: ‘Sé mak koʼalia liafuan sira-neʼe, no iha situasaun saida? Haʼu komprende ninia hanoin no sentimentu ka lae? Lisaun saida deʼit mak haʼu aprende?’ Karik Ita presiza halo peskiza atu hatán ba pergunta sira-neʼe, maibé neʼe sei lori benefísiu. Hanoin toʼok kona-ba ezemplu haat.

13. Saida mak ita bele aprende husi Ana nia orasaun? (1 Samuel 1:​10, 11) (Haree mós dezeñu.)

¹³ Lee 1 Samuel 1:​10, 11. Bainhira Ana halo orasaun neʼe, nia hasoru daudaun problema boot rua. Nia labele iha oan, no ninia laʼen nia feen-kiʼik lori susar ba ninia moris. (1 Sam 1:​4-7) Se Ita kontinua hasoru problema no neʼe lori susar ba Ita, saida mak Ita bele aprende husi Ana nia orasaun? Ana hetan kmaan bainhira nia uza tempu atu fakar sai ninia sentimentu hotu ba Jeová. (1 Sam 1:​12, 18) Ita mós bele sente kmaan bainhira ita ‘entrega ita-nia laran-susar’ hodi fó sai ba Jeová kona-ba problema espesífiku neʼebé ita hasoru.—Sal 55:22.

14. (a) Ita aprende saida tan husi Ana nia ezemplu? (b) Oinsá mak ita bele hadiʼa liután ita-nia orasaun hodi hanoin kleʼan eskritura sira? (Haree nota-rodapé.)

¹⁴ Tinan balu liu tiha depois Samuel moris, Ana entrega nia ba Amlulik Boot Eli. (1 Sam 1:​24-28) Ana hatoʼo orasaun agradese nian tanba nia fiar metin katak Jeová tau matan no proteje Ninia atan sira neʼebé laran-metin.c (1 Sam 2:​1, 8, 9) Ana nia problema iha uma-laran karik la lakon, maibé nia fokus ba oinsá Jeová fó ona bensaun ba nia. Ita aprende saida? Ita bele tahan susar sira se ita tau fokus ba oinsá Jeová ajuda ona ita toʼo ohin loron.

15. Bainhira ita hasoru situasaun la justisa, saida mak ita bele aprende husi Jeremias nia orasaun? (Jeremias 12:1)

¹⁵ Lee Jeremias 12:1. Bainhira profeta Jeremias haree katak ema aat sira moris ho susesu no ninia maluk Izraél mós goza nia, neʼe halo nia sente laran-kraik. (Jer 20:​7, 8) Ita komprende ninia sentimentu tanba ita mós haree ema neʼebé halo buat neʼebé la justu hetan susesu ka ema mós goza ita. Maski Jeremias fó sai ninia sentimentu laran-kraik, nia la duvida kona-ba Maromak nia justisa. Nuʼudar Jeremias haree oinsá Jeová fó dixiplina ba ema neʼebé kontra Nia, neʼe aumenta liután ninia fiar ba Jeová nia justisa. (Jer 32:19) Ita mós bele koʼalia nakloke ba Jeová bainhira ita laran-kraik, no fiar katak Jeová sei lori justisa iha tempu neʼebé loos.

16. Saida mak ita bele aprende husi ema Levi nia orasaun? (Salmo 42:​1-4) (Haree mós dezeñu.)

¹⁶ Lee Salmo 42:​1-4. Ema Levi ida neʼebé labele bá templu atu halo adorasaun hamutuk ho ninia maluk Izraél mak hakerek salmo neʼe hodi fó sai ninia sentimentu. Ita bele komprende ninia situasaun liuliu se ita labele sai husi uma tanba razaun ruma ka tama komarka tanba ita-nia fiar. Karik ita-nia emosaun tun-saʼe, maibé ita bele fakar sai sentimentu hotu ba Jeová. Neʼe bele ajuda ita atu komprende ita-nia sentimentu no iha hanoin neʼebé loos. Porezemplu, ema Levi neʼe rekoñese katak nia sei hetan oportunidade foun atu hahiʼi Jeová. (Sal 42:5) Nia mós hanoin kleʼan kona-ba oinsá Jeová tau matan ba nia. (Sal 42:8) Hodi harohan ba Maromak bele ajuda ita komprende ita-nia sentimentu, hetan dame, no mós kbiit atu tahan.

17. (a) Saida mak ita bele aprende husi profeta Jonas nia orasaun? (Jonas 2:​1, 2) (b) Bainhira hasoru susar, tanbasá diʼak atu hanoin-hetan liafuan balu husi livru Salmo? (Haree nota-rodapé.)

¹⁷ Lee Jonas 2:​1, 2. Profeta Jonas halo orasaun neʼe bainhira nia iha ikan boot nia kabun laran. Maski nia la halo tuir Jeová, nia fiar katak Jeová sei rona ba ninia orasaun. Iha orasaun neʼe, Jonas uza liafuan barak husi livru Salmo.d Nia hatene didiʼak liafuan sira iha Salmo. Hodi hanoin kona-ba liafuan sira-neʼe, halo nia fiar katak Jeová sei ajuda nia. Nuneʼe mós, se ita koko atu dekór eskritura balu, karik iha tempu susar ita sei hanoin-hetan no neʼe sei fó kmaan mai ita bainhira ita halo orasaun ba Jeová.

KONTINUA HAKBESIK BA JEOVÁ LIUHUSI ORASAUN

18-19. Se ita sente susar atu fó sai ita-nia sentimentu ba Jeová, oinsá mak Roma 8:​26, 27 bele ajuda ita? Fó toʼok ezemplu.

¹⁸ Lee Roma 8:​26, 27. Dala ruma ita laran-susar tebes toʼo la hatene oinsá atu esplika ita-nia sentimentu ba Jeová. Maibé iha situasaun hanesan neʼe, “espíritu santu sei ajuda ita hodi husu ba Maromak”. Oinsá? Jeová uza ninia espíritu santu atu book ninia atan sira hakerek orasaun barak iha Bíblia. Bainhira ita labele fó sai ita-nia sentimentu, Jeová bele haree liafuan husi orasaun sira-neʼe nuʼudar ita-nia orasaun, no nia sei hatán ba ida-neʼe.

¹⁹ Pontu neʼe ajuda irmán ida husi Rúsia naran Yelena. Polísia kaer nia tanba nia lee Bíblia no halo orasaun. Yelena estrese tebes toʼo susar ba nia atu halo orasaun. Nia hatete: “Haʼu hanoin-hetan katak bainhira haʼu estrese no la hatene atu halo orasaun kona-ba saida, Jeová sei haree orasaun husi fiar-naʼin sira iha tempu uluk nuʼudar haʼu-nia orasaun rasik. Neʼe fó kmaan tebes mai haʼu durante tempu susar neʼe.”

20. Bainhira estrese, oinsá ita bele prepara ita-nia neon antes halo orasaun?

²⁰ Bainhira estrese, neʼe bele halo susar mai ita atu fokus kuandu halo orasaun. Atu prepara ita-nia neon, ita bele rona ba áudio husi livru Salmo. Ita mós bele koko hakerek ita-nia sentimentu, hanesan buat neʼebé Liurai David halo. (Sal 18, 34, 142; introdusaun.) Klaru katak la iha lei kona-ba oinsá atu prepara ita-nia neon antes halo orasaun. (Sal 141:2) Ita bele halo buat neʼebé Ita sente diʼak liu ba Ita.

21. Tanbasá ita bele halo orasaun ho laran tomak?

²¹ Ita sente kmaan hodi hatene katak Jeová komprende ita-nia sentimentu maski ita seidauk koʼalia sai ida-neʼe. (Sal 139:4) Maibé nia kontente kuandu Ita fó sai Ita-nia sentimentu hodi hatudu katak Ita tau fiar ba nia. Tan neʼe, keta dada an atu halo orasaun ba Ita-nia Aman iha lalehan. Aprende husi orasaun sira neʼebé hakerek iha Bíblia. Halo orasaun ho laran tomak. Fó sai Ita-nia sentimentu kontente no triste ba nia. Nuʼudar Ita-nia Belun, Jeová sempre iha ba Ita!