Diabu haree hanesan saida?

Bíblia nia resposta

Ita labele haree Diabu tanba nia mak espíritu ida. Neʼe katak Diabu la iha isin hanesan ema nian.—Éfeso 6:11, 12.

Dala barak dezeñu sira hatudu katak Diabu mak kriatura ida neʼebé iha dikur no ikun hanesan bibi-timur no nia mós kaer garfu boot. Ema balu fiar katak karik pintór sira neʼebé primeiru halo dezeñu hanesan neʼe moris tinan 1.000 liubá. Karik pintór sira-neʼe hetan influénsia husi relijiaun falsu nia hanorin.

Bíblia esplika saida kona-ba Diabu?

Bíblia esplika kona-ba Diabu hodi uza dalan oioin. Eskritura sira ajuda ita atu hatene Diabu nia hahalok, laʼós Diabu haree hanesan saida. Dalan balu neʼebé Bíblia uza atu esplika kona-ba Diabu inklui buat tuirmai:

Anju naroman nian. Nia finje fó buat neʼebé diʼak hodi lohi ema atu tuir ninia hanorin duké Maromak nia hanorin.—2 Korinto 11:14.
Leaun ida neʼebé hasai lian makaʼas. Nia kontra makaʼas sira neʼebé adora Maromak.—1 Pedro 5:8.
Samea boot ida. Nia iha kbiit boot, halo ema taʼuk, no bele estraga buat barak.—Apokalipse 12:9.

Eskritura sira kona-ba Diabu

2 Korinto 11:14: “Satanás rasik kontinua finje sai hanesan anju naroman nian.”

Signifikadu: Satanás finje katak nia diʼak hodi bele lohi ema atu tuir ninia hanorin duké Maromak nia hanorin.
Éfeso 6:11: “Uza kompletu ekipamentu funu nian husi Maromak atu nuneʼe imi bele hamriik metin hodi kontra Diabu nia lasu sira.”

Signifikadu: Diabu uza lasu oioin hodi book ema atu la halo tuir Maromak.
Tiago 4:7: “Hakruʼuk ba Maromak; maibé kontra hasoru Diabu, no nia sei halai husi imi.”

Signifikadu: Ema ida bele manán hasoru Satanás se nia halo tuir Maromak duké Diabu.
1 Pedro 5:8: “Imi-nia inimigu, Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.”

Signifikadu: Diabu odi ema sira neʼebé halo tuir Maromak no hakarak estraga sira-nia relasaun diʼak no Maromak.