Diabu iha duni ka lae?

Bíblia nia resposta

Sin, Diabu iha duni. Nia mak “ukun-naʼin mundu neʼe nian”. Nia mak kriatura espíritu neʼebé sai aat no kontra Maromak. (João 14:30; Éfeso 6:11, 12) Bíblia fó sai Diabu nia hahalok liuhusi naran no liafuan sira tuirmai:

• Satanás neʼebé signifika “Kontradór”.—Job 1:6.

• Diabu neʼebé signifika “Ida neʼebé hafoʼer ema seluk nia naran”.—Apokalipse 12:9.

• Samea, neʼebé temi iha Bíblia dala ruma signifika “Lohidór”.—2 Korinto 11:3.

• Tentadór.—Mateus 4:3, nota-rodapé.

• Bosok-teen.—João 8:44.

Laʼós hahalok aat ruma

Ema balu hanoin katak Diabu mak hahalok aat ruma iha ema nia laran. Maibé iha Bíblia, ita bele lee kona-ba tempu neʼebé Maromak no Satanás koʼalia ba malu. Maromak mak perfeitu, tan neʼe nia la iha hahalok aat no la koʼalia ho parte aat iha ninia laran. (Deuteronómio 32:4; Job 2:1-6) Satanás mós tenta Jesus no Jesus mak sala-laek. (Mateus 4:8-10; 1 João 3:5) Entaun Bíblia hatudu katak Diabu laʼós hahalok aat ruma, maibé nia iha duni.

Ita la hakfodak bainhira ema barak la fiar katak Diabu mak iha duni. Bíblia hatete katak Satanás lohi ema atu bele kumpre ninia planu sira. (2 Tesalónika 2:9, 10) Lasu boot liu neʼebé nia uza atu lohi ema mak halo ema fiar katak nia la iha.—2 Korinto 4:4.

Hanoin neʼebé sala kona-ba Diabu

Hanoin neʼebé sala: Lúcifer mak Diabu nia naran seluk.

Hanoin neʼebé loos: Liafuan Ebraiku neʼebé Bíblia balu tradús nuʼudar “Lúcifer” signifika “ida neʼebé nabilan”. (Isaias 14:12) Kontestu hatudu katak neʼe refere ba liurai sira husi Babilónia neʼebé Maromak hamoe tanba sira foti an. (Isaias 14:4, 13-20) Bíblia uza fraze “ida neʼebé nabilan” atu goza Babilónia nia liurai sira kuandu sira lakon tiha.

Hanoin neʼebé sala: Maromak uza Satanás atu tesi-lia ba ema.

Hanoin neʼebé loos: Diabu mak Maromak nia inimigu, laʼós ninia atan. Diabu Satanás kontra no duun matak ema neʼebé serbí Maromak.​—1 Pedro 5:8; Apokalipse 12:10.