Uza didiʼak Ita-nia tempu hamutuk

Feen-laʼen barak sente susar atu komunika ba malu, maski sira hamutuk iha fatin ida. Tanbasá?

• Tanbasá feen-laʼen balu la sente besik malu maski gasta tempu hamutuk?

• Buat neʼebé Ita bele halo

• Buat neʼebé kaben-naʼin sira hatete

• Oinsá atu koʼalia hamutuk

Tanbasá feen-laʼen balu la sente besik malu maski gasta tempu hamutuk?

• Kole tebes

  “Bainhira ami gasta tempu hamutuk, baibain haʼu-nia laʼen kole tebes ka haʼu mak kole tebes. Bainhira haʼu kole, haʼu lalais atu sai hirus. Entaun diʼak liu ami nonton deʼit televizaun.”—Anna.

• Internét dada Ita-nia atensaun

  “Média sosiál no buat oioin iha internét bele han ita-nia tempu barak. Karik ita gasta oras barak hodi uza internét no ita la konversa ho ita-nia pár. Neʼe hanesan ita iha fatin ketak, maski loloos ita tuur daudaun iha kuartu neʼebé hanesan.”—Katherine.

• Gosta buat neʼebé la hanesan

  “Bainhira haʼu-nia laʼen fila husi serbisu, baibain nia uza tempu barak atu halo ninia hobi. Nia serbisu makaʼas, entaun nia merese atu gasta tempu hodi halo buat neʼebé nia gosta. Maibé haʼu hakarak tebes atu gasta tempu barak liután hamutuk ho nia.”—Jane.

• Serbisu

  “Teknolojia ohin loron bele halo ita kontinua serbisu, maski fila ona ba uma no hamutuk ho ita-nia família. Haʼu hatán beibeik e-mail no mensajen kona-ba serbisu, maibé loloos haʼu tenke uza tempu neʼe hamutuk ho haʼu-nia feen.”—Mark.

Buat neʼebé Ita bele halo

• Rekoñese katak importante tebes atu gasta tempu ho Ita-nia pár, no halo ida-neʼe beibeik.

  Bíblia nia prinsípiu: “Buka-hatene loloos buat sira neʼebé importante liu.”—Filipe 1:10.

  Hanoin toʼok: Ita-nia hahalok hatudu katak Ita-nia moris kaben nian mak importante liu fali Ita-nia serbisu ka hobi ka lae? Ita gasta tempu no tau atensaun ba Ita-nia pár só deʼit kuandu Ita la iha buat seluk atu halo ka lae?

  Sujestaun: Halo planu beibeik atu gasta tempu mesamesak ho Ita-nia pár no la husik buat seluk dada Ita-nia atensaun.

  “Haʼu gosta tebes bainhira haʼu-nia laʼen halo planu atu ami rua gasta tempu hamutuk. Neʼe halo sente katak nia hadomi haʼu no gosta atu gasta tempu hamutuk ho haʼu. Neʼe book haʼu atu hadomi liután nia.”—Anna.

• Aprende atu husik Ita-nia sasán eletróniku.

  Bíblia nia prinsípiu: “Iha tempu neʼebé loos ba buat hotu.”—Eclesiastes 3:1.

  Hanoin toʼok: Dala hira mak Ita la tau atensaun ba Ita-nia pár neʼebé hamutuk daudaun ho Ita tanba deʼit mensajen neʼebé tama ka avizu mosu iha Ita-nia telemovel?

  Sujestaun: Loroloron, koko atu han hamutuk dala ida no tau dook imi-nia telemovel. Han hamutuk mak oportunidade diʼak atu koʼalia hamutuk kona-ba buat neʼebé imi halo durante loron neʼe.

• Bainhira situasaun permite, halo serbisu uma nian no bá kompras hamutuk.

  Bíblia nia prinsípiu: “Ema naʼin-rua diʼak liu fali naʼin-ida tanba sira simu kolen neʼebé boot liu ba sira-nia serbisu makaʼas.”—Eclesiastes 4:9, nota-rodapé.

  Hanoin toʼok: Dala hira mak Ita no Ita-nia pár halo serbisu uma nian ka bá kompras ketaketak?

  Sujestaun: Serbisu nuʼudar ekipa ida no ajuda malu, maski karik Ita hanoin katak Ita bele halo serbisu neʼe mesak.

  “Duké hanoin katak fase bikan, hikar roupa, bá kompras no hamoos jardín mak serbisu deʼit, haree neʼe nuʼudar oportunidade atu gasta tempu hamutuk.”—Nina.

• Keta ulun-toos.

  Bíblia nia prinsípiu: “Halo ema hotu haree katak imi la ulun-toos.”—Filipe 4:5.

  Hanoin toʼok: Oinsá Ita bele hatudu katak Ita la ulun-toos kona-ba buat neʼebé Ita hakarak Ita-nia pár atu halo?

  Sujestaun: Koʼalia hamutuk atu bele komprende buat neʼebé Ita presiza husi Ita-nia pár. Deside hamutuk kona-ba oinsá atu bele gasta tempu hamutuk atu Ita no Ita-nia pár kontente.

  “Haʼu-nia laʼen iha enerjia barak, maibé haʼu iha enerjia uitoan deʼit tanba problema saúde. Dala barak haʼu anima nia atu ba liʼur no halo buat neʼebé halo nia kontente, no haʼu hela deʼit iha uma toʼo nia fila. Haʼu hela iha uma atu bele deskansa no nia bá halo ezersísiu neʼebé nia presiza. No ami rua sente diʼak tanba ami halo buat neʼebé ami presiza halo.”—Daniela.

Oinsá atu koʼalia hamutuk

Primeiru, Ita no Ita-nia kaben bele hanoin kona-ba pergunta sira tuirmai neʼe ketaketak. Tuirmai koʼalia hamutuk kona-ba imi-nia resposta.

• Tuir Ita-nia hanoin, tempu neʼebé Ita no Ita-nia pár gasta hamutuk mak natoon ona ka lae?

• Ita bele gaba Ita-nia pár kona-ba saida tanba gasta tempu hamutuk ho Ita?

• Ita hakarak Ita-nia pár atu halo saida ho diʼak liután?

• Dala hira mak teknolojia dada Ita-nia atensaun no hanetik Ita atu rona didiʼak bainhira Ita-nia pár koʼalia daudaun?

• Oinsá mak Ita no Ita-nia pár bele hatudu katak imi la ulun-toos kona-ba buat neʼebé imi hakarak atu halo ba malu?

• Mudansa saida mak Ita no Ita-nia pár bele halo durante semana neʼe atu bele gasta didiʼak tempu hamutuk?