Saida mak haʼu bele halo atu la sente moe?

Buat neʼebé la diʼak: Se Ita mak moedór, neʼe bele hanetik Ita atu hetan belun sira no esperiénsia neʼebé furak.

Buat neʼebé diʼak: Dala ruma hahalok moedór mós bele lori benefísiu. Neʼe bele ajuda Ita atu hanoin uluk antes koʼalia, ajuda Ita haree didiʼak situasaun ruma no mós sai rona-naʼin neʼebé diʼak.

Buat neʼebé diʼak liu: Ita bele duni halakon hahalok moedór. Ita bele kontrola Ita-nia sentimentu moe atu la afeta Ita-nia moris. Informasaun neʼe sei esplika liután.

• Buka-hatene tanbasá Ita sente moe

• Haʼu-nia planu

• Ita-nia kolega hanoin saida

Buka-hatene tanbasá Ita sente moe

Se Ita mak moedór, karik Ita taʼuk tebes atu koʼalia oin ba oin ho ema seluk. Maibé se Ita buka-hatene saida mak halo Ita taʼuk, karik Ita sei komprende katak Ita la presiza sente taʼuk. Hanoin toʼok buat tolu neʼebé karik halo Ita taʼuk.

• Taʼuk #1: “Haʼu la hatene atu koʼalia kona-ba saida.”

  Faktu: Ema hanoin-hetan liu buat neʼebé sira sente bainhira hamutuk ho Ita duké hanoin-hetan buat neʼebé Ita koʼalia ba sira. Ita bele kontrola Ita-nia sentimentu taʼuk hodi aumenta liután Ita-nia skill atu sai rona-naʼin neʼebé diʼak, no hatudu interese ho laran bainhira ema seluk koʼalia.

  Hanoin toʼok: Ita rasik gosta liu kolega neʼebé gosta atu koʼalia barak ka kolega neʼebé rona didiʼak bainhira Ita koʼalia?

• Taʼuk #2: “Ema sei la interese ho buat neʼebé haʼu koʼalia.”

  Faktu: Ema iha opiniaun rasik kona-ba Ita maski Ita mak moedór ka lae. Ita bele kontrola Ita-nia taʼuk no ajuda ema atu iha opiniaun neʼebé diʼak kona-ba Ita se Ita koʼalia ba sira hodi sira bele koñese Ita.

  Hanoin toʼok: Se Ita hanoin katak ema seluk tesi-lia no la gosta Ita, karik Ita mak tesi lia makaʼas ba sira hodi halo konkluzaun katak sira la gosta Ita.

• Taʼuk #3: “Karik haʼu sei koʼalia sala no halo moe haʼu-nia an rasik.”

  Faktu: Dala ruma, ema seluk mós koʼalia sala. Ita bele kontrola Ita-nia sentimentu taʼuk hodi haree sala sira hanesan neʼe nuʼudar oportunidade atu hatudu ba ema seluk katak Ita la hanoin katak Ita mak perfeitu.

  Hanoin toʼok: Ita rasik sente oinsá se Ita-nia kolega rekoñese katak sira mós halo sala no la perfeitu?

Hatene ka lae? Ema balu hanoin katak sira laʼós moedór tanba sira haruka mensajen barak ba ema seluk. Maibé fasil liu atu forma relasaun diʼak nuʼudar belun ho ema ida bainhira koʼalia ba malu oin ba oin. Psikólogu ida no matenek-naʼin kona-ba teknolojia naran Sherry Turkle hakerek: “Ita bele koñese didiʼak duni ema seluk kuandu ita haree sira-nia oin no rona sira-nia lian.”a

Haʼu-nia planu

• Keta kompara Ita-nia an ho ema seluk. Ita la presiza sai ema neʼebé gosta tebes atu ransu. Maibé koko toʼok atu hamenus Ita-nia hahalok moedór neineik-neineik. Hodi halo nuneʼe, Ita bele iha oportunidade atu hetan belun no esperiénsia furak.

  “Bainhira konversa, keta hanoin katak ita mak presiza koʼalia barak. Ita mós la presiza sai ema neʼebé dada atensaun. Ita presiza deʼit fó koñese ita-nia an ba ema seluk no husu pergunta balu ba ema neʼe.”—Alicia.

  Bíblia nia prinsípiu: “Maibé ema ida-idak tenke buka-hatene ninia hahalok rasik, no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.”—Galásia 6:4.

• Aprende husi ema seluk. Haree ba ema neʼebé matenek atu ransu no haree didiʼak oinsá sira konversa ho ema seluk. Buka-hatene tópiku saida mak baibain ema gosta atu koʼalia no tópiku saida mak ema ladún gosta atu koʼalia. Saida mak Ita bele aprende husi sira?

  “Haree no aprende husi ema seluk neʼebé fasil deʼit atu buka kolega. Haree oinsá sira koʼalia no saida mak sira hatete bainhira foin koñese ema.”—Aaron.

  Bíblia nia prinsípiu: “Besi kadi ho besi bele sai kroʼat, nuneʼe mós ema ida bele halo kroʼat ninia belun.”—Provérbios 27:17.

• Husu pergunta. Baibain ema gosta atu fó sai sira-nia opiniaun kona-ba tópiku ruma, entaun dalan diʼak liu atu komesa konversa mak hodi husu pergunta ba sira. Neʼe mós dalan diʼak atu la dada ema nia atensaun ba Ita.

  “Se ita prepara nanis, neʼe bele ajuda hamenus ita-nia laran-taridu. Hanoin toʼok tópiku balu ka pergunta balu antes ita ransu ho ema seluk hodi nuneʼe ita ladún sente estrese bainhira hasoru ema foun.”—Alana.

  Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.