PERGUNTA HUSI JOVEN SIRA
Oinsá haʼu bele aumenta matenek atu konversa ho ema seluk?
Iha informasaun neʼe
Tanbasá presiza koʼalia oin ba oin?
Ema balu dehan katak konversa oin ba oin mak susar loos no lori estrese, sira sente katak haruka mensajen mak fasil liu.
“Bainhira koʼalia oin ba oin, ita sente presaun liu tanba ita labele hadiʼa ka apaga buat neʼebé ita koʼalia ona.”—Anna.
“Mensajen mak hanesan programa neʼebé grava ona, maibé konversa oin ba oin mak hanesan programa neʼebé live. Bainhira koʼalia ho ema, haʼu sempre fó-hanoin haʼu-nia an rasik atu kuidadu no la koʼalia arbiru!”—Jean.
Maski nuneʼe, ita hotu presiza hatene oinsá atu bele konversa ho ema seluk. Porezemplu, Ita sei presiza abilidade neʼe kuandu Ita hakarak habelun ho ema foun, buka no kontinua Ita-nia serbisu, ka atu komesa namora.
Maibé, Ita la presiza sente taʼuk atu konversa oin ba oin. Ita bele aprende oinsá atu konversa ho ema seluk maski Ita mak ema neʼebé moedór.
“Dala ruma, ita bele koʼalia sala no sente moe. Ita labele espera katak buat neʼebé ita koʼalia sempre perfeitu.”—Neal.
Oinsá atu komesa konversa ho ema seluk?
Husu pergunta. Hanoin kona-ba tópiku neʼebé karik ema neʼe gosta, no uza ida-neʼe atu komesa konversa. Porezemplu:
“Ita iha maun-alin naʼin-hira?”
“Ita serbisu saida?”
“Ita rona ona kona-ba . . . ?”
Ita mós bele husu pergunta espesífiku seluk hodi hanoin kona-ba buat neʼebé hanesan entre Ita no ema neʼe. Porezemplu, karik Ita eskola ka serbisu iha fatin neʼebé hanesan. Entaun uza buat sira hanesan neʼe atu husu pergunta.
“Hanoin kona-ba pergunta sira neʼebé Ita interese no hakarak atu rona sira-nia resposta.”—Maritza.
Atensaun: Keta husu pergunta barak hanesan halo interrogasaun. No mós keta husu pergunta neʼebé hamoe ema neʼe. Porezemplu, pergunta hanesan “Foin lalais Ita hasoru susar boot saida?” ka “Tanbasá Ita sempre uza kór azúl?” Pergunta segundu rona hanesan ita kritika ema neʼe.
Ita mós lakohi haree hanesan polísia ida, diʼak atu fahe buat neʼebé Ita hanoin ka sente antes ka depois ema neʼe hatán. Hodi halo nuneʼe Ita bele konversa ho ema seluk laʼós atu halo entrevista ho sira.
Pergunta sira neʼebé Ita husu rona hanesan Ita mak polísia ida ka lae?
Bíblia nia prinsípiu: “Ema nia hanoin iha ninia laran mak hanesan bee-posu neʼebé kleʼan, maibé ema neʼebé matenek mak bele kuru sai ida-neʼe.”—Provérbios 20:5.
Sai rona-naʼin neʼebé diʼak. Ita-nia konversa bele laʼo ho diʼak se Ita sai rona-naʼin neʼebé diʼak duké koʼalia mak barak.
“Bainhira konversa ho ema, haʼu koko atu aprende buat foun kona-ba ema neʼe. Tuirmai, haʼu koko atu hanoin-hetan buat neʼebé ema neʼe hatete, hodi nuneʼe haʼu bele husu pergunta seluk bainhira ami konversa fali.”—Tamara.
Atensaun: Keta hanoin barak kona-ba buat neʼebé Ita sei koʼalia tuirmai. Se Ita rona didiʼak, Ita bele hatán saida mak ema neʼe hatete.
Bíblia nia prinsípiu: “Tenke lalais atu rona, la ansi atu koʼalia.”—Tiago 1:19.
Hatudu interese husi laran. Ita sei sente kontente atu konversa se Ita iha interese ba ema neʼe.
“Bainhira Ita halo ema sente katak Ita interese ho buat neʼebé sira hatete, konversa neʼe sei laʼo ho diʼak maski karik dala ruma Ita la hatene atu koʼalia saida.”—Marie.
Atensaun: Keta husu pergunta neʼebé la hatudu respeitu. Porezemplu pergunta hanesan “Faru neʼe jeitu. Sé mak hola?”
Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
Oinsá Ita bele remata konversa neʼe? Joven ida naran Jordan hatete: “Remata konversa neʼe hodi koʼalia buat neʼebé pozitivu, hanesan ‘Haʼu kontente bele koʼalia ho Ita’ ka ‘Hein katak Ita-nia loron laʼo ho diʼak’. Hodi halo nuneʼe bele loke dalan ba Ita atu konversa ho ema neʼe tempu seluk.”