PERGUNTA HUSI JOVEN SIRA
Oinsá mak Bíblia bele ajuda haʼu?—Parte 3: Hetan benefísiu barak liután kuandu lee Bíblia
Kuandu Ita loke Bíblia, iha laran Ita sei haree liafuan barak tebes. Maibé keta husik neʼe hanetik Ita atu lee. Ita bele kompara Bíblia hanesan meza neʼebé nakonu ho hahán kompletu. Ita labele han hotu kedas, maibé Ita bele han hahán neʼebé natoon mai Ita atu halo Ita satisfás.
Atu hetan benefísiu husi Bíblia Ita tenke tau fokus bainhira Ita lee. Informasaun neʼe sei ajuda Ita atu halo nuneʼe.
Iha informasaun neʼe
Tanbasá diʼak atu tau fokus bainhira Ita lee Bíblia?
Se Ita fokus didiʼak kuandu lee Bíblia, Ita mós sei hetan benefísiu barak liu. Hanoin toʼok komparasaun neʼe: Kuandu Ita hoban xá iha bee manas lalais deʼit Ita sei sente xá nia gostu uitoan deʼit. Maibé sei gostu liu kuandu hoban xá neʼe kleur uitoan.
Neʼe hanesan kuandu Ita lee Bíblia. Duké lee ho lalais deʼit, diʼak liu mak uza tempu uitoan atu hanoin no medita kona-ba buat neʼebé Ita lee. Ema neʼebé hakerek Salmo 119 halo hanesan neʼe. Kona-ba Maromak nia ukun-fuan, nia dehan: “Haʼu hanoin kleʼan kona-ba neʼe loron tomak.”—Salmo 119:97.
Klaru, neʼe la dehan katak Ita presiza uza Ita-nia loron tomak atu lee no hanoin kleʼan kona-ba Bíblia. Pontu importante mak: Ema neʼebé hakerek salmo neʼe hili tempu atu hanoin kona-ba Maromak nia Liafuan. No neʼe ajuda nia atu foti desizaun diʼak.—Salmo 119:98-100.
“Haʼu-nia amá hatete mai haʼu, ‘O iha loron hitu iha semana ida, no iha semana neʼe ó halo buat barak ba ó-nia an. Tanbasá la fó tempu balu ba Jeová?’”—Melanie.
Bainhira Ita uza tempu atu hanoin kona-ba Bíblia nia prinsípiu, neʼe sei ajuda Ita atu halo desizaun diʼak liu, porezemplu bainhira Ita hili kolega sira ka bainhira Ita hasoru tentasaun atu halo hahalok neʼebé la diʼak.
Oinsá mak Ita bele hetan benefísiu husi lee Bíblia?
Halo planu. Feto joven ida naran Julia dehan: “Diʼak atu halo oráriu lee Bíblia nian atu hatene saida mak Ita sei lee, bainhira mak Ita sei lee no iha neʼebé mak Ita sei lee.”
Buka situasaun neʼebé diʼak. Feto joven ida naran Gianna hatete: “Buka fatin neʼebé hakmatek. Fó-hatene Ita-nia família kona-ba Ita-nia oráriu lee Bíblia nian atu sira la inkomoda Ita.”
Se Ita mak uza sasán eletróniku, taka mate notifikasaun sira. Ita mós bele koko uza Bíblia neʼebé print sai ona. Tuir loloos, peskiza fó sai katak lee husi publikasaun neʼebé print sai ona bele aumenta liután Ita-nia komprensaun. Maibé, susar liu atu tau fokus kuandu Ita lee uza Ita-nia sasán eletróniku.
“Haʼu sente duni lee liuhusi telefone mak susar atu tau fokus. Haʼu simu notifikasaun ka bateria menus ka internét la diʼak. Maibé, ho publikasaun neʼebé mak print ona, buat neʼebé haʼu presiza deʼit mak naroman neʼebé diʼak.”—Elena
Halo orasaun antes hahú. Husu Maromak Jeová atu ajuda Ita komprende, hanoin-hetan, no simu benefísiu husi buat neʼebé Ita planu atu lee.—Tiago 1:5.
Halo tuir Ita-nia orasaun hodi keʼe kleʼan kona-ba buat neʼebé Ita lee iha Bíblia. Oinsá mak Ita bele halo neʼe? Se Ita uza aplikasaun JW Library ka lee Bíblia iha online, Ita bele klik iha versíkulu nia númeru atu mosu informasaun seluk kona-ba versíkulu neʼe.
Husu pergunta ba Ita-nia an. Porezemplu: ‘Saida mak eskritura neʼe hanorin haʼu kona-ba Jeová? Eskritura neʼe hatudu Jeová nia hahalok diʼak ruma neʼebé haʼu bele halo tuir ka lae?’ (Éfeso 5:1) ‘Haʼu aprende lisaun saida husi eskritura neʼe atu bele aplika iha haʼu-nia moris?’ (Salmo 119:105) ‘Haʼu bele uza eskritura neʼebé haʼu lee atu ajuda ema seluk ka lae?’—Roma 1:11.
Husu ba Ita-nia an, ‘Buat neʼebé haʼu lee, oinsá mak ida-neʼe kona Bíblia nia mensajen?’ Pergunta neʼe mak importante. Tanbasá? Tanba informasaun hotu iha Bíblia laran, husi Génesis toʼo Apokalipse liga malu no fó sai mensajen neʼebé importante liu, neʼe mak: Oinsá Jeová sei uza ninia Ukun iha lalehan atu halo santu ninia naran, no oinsá nia sei hatudu katak só nia deʼit mak iha direitu atu ukun, no dalan neʼebé nia ukun mak diʼak liu hotu.