Tahan hasoru kole tanba pandemia

Ita sai kole ona tanba COVID-19 ka lae? Se neʼe mak loos, Ita la mesak. Ba fulan barak ona, ema iha mundu tomak tenke adapta sira-nia moris tanba pandemia neʼe. Doutór Hans Kluge, husi Organizasaun Saúde Mundiál iha Europa hatete: “Ema barak halo ona sakrifísiu oioin atu hapara COVID-19 hodi labele hadaʼet. Maibé, ema barak agora komesa lakon forsa no baruk ona, tanba haree situasaun mós nafatin hanesan deʼit. Sira sai kole tanba pandemia neʼe.”

Se Ita sente kole ona tanba pandemia neʼe, keta rende an. Bíblia ajuda ona ema barak iha situasaun susar neʼe. Bíblia mós bele ajuda Ita.

Situasaun pandemia neʼe halo ema sente oinsá?

Tanba pandemia neʼe troka ona ema nia moris no sira la hatene bainhira mak ida-neʼe sei remata, neʼe halo sira sente kole tebes. Pandemia neʼe kona ema ida-idak nia sentimentu iha dalan neʼebé la hanesan. Tuirmai mak buat balu neʼebé ema sente tanba pandemia neʼebé halo sira kole:

Baruk no la kontente
Toman atu han no toba mós troka
Lalais atu hirus
Sai estrese kuandu halo serbisu neʼebé uluk bele halo ho diʼak
Susar atu tau fokus
Sente rende an

Tanbasá kole tanba pandemia mak buat neʼebé sériu?

Se ita sente kole ona tanba pandemia COVID-19, neʼe bele lori perigu ba ita no mós ema seluk. Se ita la kuidadu, neʼe bele halo ita sente baruk no la halo tuir tan matadalan atu proteje an husi virus neʼe. Neineik-neineik, karik ita la preokupa tan ho perigu husi virus corona, maski virus neʼe kontinua habelar no hamate ema barak. No tanba la gosta lei oioin kona-ba buat neʼebé ita bele halo no labele halo, karik ita sei buka atu livre liu, maski neʼe bele lori perigu ba ita-nia an no ema seluk.

Durante tempu susar neʼe, ema barak sente katak liafuan sira iha Bíblia tuirmai neʼe mak loos: “Se ó sai laran-triste iha tempu susar, ó-nia forsa sei menus”. (Provérbios 24:10) Iha Bíblia, iha matadalan sira neʼebé bele ajuda ita atu hasoru situasaun neʼebé susar, inklui pandemia neʼe.

Bíblia nia matadalan saida mak bele ajuda Ita tahan hasoru kole tanba pandemia?

Mantein distánsia fíziku maibé nafatin kontaktu malu

Saida mak Bíblia hatete: “Belun neʼebé loos . . . sai hanesan maun ka alin ida iha tempu susar.”—Provérbios 17:17.

Tanbasá importante: Belun neʼebé loos hametin malu. (1 Tesalónika 5:11) Maibé se ita mesak deʼit ba tempu naruk, neʼe bele lori perigu ba ita-nia saúde.—Provérbios 18:1.

Koko toʼok: Nafatin kontaktu ho Ita-nia belun sira liuhusi vídeo call, telefone, e-mail ka mensajen. Kontaktu Ita-nia belun kuandu Ita sente triste, ka husu kona-ba ninia situasaun. Ita bele fahe sujestaun ba malu kona-ba oinsá atu tahan hasoru pandemia neʼe. Koko halo buat diʼak ida ba Ita-nia belun, tanba neʼe sei halo imi rua sente kontente.

Ema balu dehan

“Haʼu koko halo planu atu vídeo call ho belun sira. Dala ruma haʼu vídeo call ba belun ida deʼit. Maibé, haʼu mós gosta atu vídeo call ho ema barak atu halimar game ka ransu hamutuk. Neʼe la hanesan duni ho hasoru malu oin ba oin, maibé neʼe mós bele lori kontente. Ita-nia moris susar tanba pandemia neʼe, tan neʼe ita presiza komunika nafatin ho ita-nia belun sira no koʼalia sai ita-nia sentimentu. Klaru neʼe la fasil, maibé ita hotu presiza ajuda.”—Megan, Kanadá.

“Ami saudades ho ami-nia família no belun sira. Maibé, ami hatene ona dalan oinsá atu hatudu ba sira katak ami hadomi sira. Ami-nia família hotu gosta hakerek karta no fó prezente ba kolega sira. Ami mós hakerek ho eskritura atu nuneʼe sira mós hatene katak ami hanoin sira. Neʼe halo ami kontente tebes. Se ita halo buat sira hanesan neʼe, neʼe sei ajuda ita atu la hanoin barak kona-ba buat neʼebé halo ita laran-taridu.”—Emma ho ninia laʼen, Nathan, no ninia oan sira, Eli no Hope, Estadus Unidus.

Aproveita Ita-nia situasaun agora nian

Saida mak Bíblia hatete: “Uza didiʼak imi-nia tempu.”—Éfeso 5:16.

Tanbasá importante: Uza Ita-nia tempu ho matenek bele ajuda Ita atu hanoin pozitivu no la hanoin barak demais.—Lucas 12:25.

Koko toʼok: Duké fokus kona-ba buat neʼebé Ita labele halo, hanoin toʼok kona-ba buat neʼebé Ita bele halo iha situasaun neʼe. Porezemplu, agora Ita iha tempu barak atu halo buat neʼebé Ita gosta ka atividade seluk. Ita mós iha tempu barak hamutuk ho família.

Ema balu dehan

“Ami uza tempu atu halo buat oioin iha uma, hanesan kuda modo oioin no ai-horis sira, halo arte, no halo dekorasaun.”—Evan ho ninia feen, Samantha, no ninia oan sira, Eli no Adam, Áfrika Súl.

“Haʼu no haʼu-nia feen kaben ona ba tinan 30. Maibé ami nunka iha tempu barak hamutuk hanesan agora. Ami hadomi malu liután, no ami bele komprende liután ami ida-idak nia fraku no abilidade sira. Agora, ami prontu atu apoia malu kuandu problema seluk mosu.”—Ivan ho ninia feen, Eve, Itália.

Nafatin tuir oráriu

Saida mak Bíblia hatete: “Halo buat hotu iha dalan neʼebé loloos no tuir arranju.”—1 Korinto 14:40.

Tanbasá importante: Ema barak sente kalma no kontente kuandu halo buat neʼebé sira baibain halo loroloron.

Koko toʼok: Halo oráriu neʼebé diʼak ba Ita-nia situasaun agora. Hili tempu atu bele halo Ita-nia serbisu, TPC, hamoos uma, no mós oras atu halaʼo atividade espirituál nian. Halo mós buat sira neʼebé lori benefísiu, hanesan uza tempu hamutuk ho família, laʼo uitoan iha liʼur, no ezersísiu. No mós haree didiʼak fali Ita-nia oráriu no halo mudansa se presiza.

Ema balu dehan

“Haʼu nafatin halo tuir haʼu-nia oráriu sira antes pandemia neʼe. Haʼu nafatin hadeer iha dadeer iha oras neʼebé hanesan, maibé atividade balu mak haʼu troka hodi halo fali ezersísiu. Neʼe ajuda haʼu atu la hanoin demais kona-ba pandemia neʼe no bele hanoin kona-ba haʼu-nia belun sira no família.”—Kgaogelo, Áfrika Súl.

“Baibain haʼu hadeer halo matabixu no kafé. Depois neʼe, haʼu prepara an hanesan kuandu haʼu atu sai ba fatin ruma. Neʼe halo haʼu sente diʼak kona-ba haʼu nia an no prontu atu halo atividade iha loron tomak.”—Carmel, Fransa.

Adapta ho klima

Saida mak Bíblia hatete: “Ema neʼebé matenek haree perigu no subar nia an.”—Provérbios 22:3.

Tanbasá importante: Iha fatin balu, klima troka no karik susar ba Ita atu hetan anin fresku no loro-matan neʼebé diʼak ba Ita-nia saúde fíziku no mentál.

Koko toʼok: Se tempu malirin besik ona, koko atu muda didiʼak sasán iha sala vizita ka fatin serbisu nian atu nuneʼe ita bele hetan loro-matan nia naroman barak. Halo planu kona-ba atividade neʼebé ita bele halo iha uma nia liʼur maski klima malirin. Se bele, uza roupa neʼebé mahar atu ita bele kleur iha liʼur.

Kuandu besik ona tempu manas, ema barak gosta atu iha liʼur. Tan neʼe, kuidadu tebes. Halo planu kona-ba iha neʼebé mak Ita sei bá, no hili oras neʼebé baibain ema la barak.

Ema balu dehan

“Haʼu hela iha fatin neʼebé sempre udan, entaun haʼu-nia oráriu sempre troka depende ba klima. Se iha liʼur la udan, haʼu sei ba liʼur, karik laʼo iha liʼur ka saʼe bisikleta atu nuneʼe haʼu bele kona loro-matan. Neʼe halo haʼu kontente.”—Sameena, Fransa.

“Se klima diʼak, iha buat barak liután mak haʼu bele halo iha liʼur. Maibé iha tempu malirin, haʼu halo lista kona-ba saida mak haʼu sei halo ka serbisu iha uma laran.”—Tiffany, Kanadá.

Nafatin tuir matadalan husi autoridade saúde nian

Saida mak Bíblia hatete: “Ema beik la kuidadu no fiar an demais.”—Provérbios 14:16.

Tanbasá importante: Virus corona bele hamate ema, no ita mós bele kona virus neʼe se ita la kuidadu.

Koko toʼok: Buka hatene beibeik matadalan husi saúde nian neʼebé aplika iha Ita-nia área, no haree katak ita nafatin tuir matadalan neʼe ho didiʼak. Hanoin kona-ba rezultadu husi Ita-nia hahalok bele kona Ita-nia an rasik, Ita-nia família no ema seluk.

Ema balu dehan

“Haʼu hakaʼas an atu halo buat neʼebé haʼu bele atu la hadaʼet moras neʼe. Maski ema la rona ba avizu, haʼu fokus deʼit ba buat neʼebé haʼu bele halo atu proteje haʼu-nia an no haʼu-nia família.”—Daryn, Áfrika Súl.

Hametin Ita-nia relasaun ho Maromak

Saida mak Bíblia hatete: “Hakbesik ba Maromak, no nia sei hakbesik ba imi.”—Tiago 4:8.

Tanbasá importante: Maromak bele ajuda ita atu tahan hasoru susar naran deʼit.—Isaias 41:13.

Koko toʼok: Lee Maromak nia Liafuan Bíblia, loroloron. Programa atu lee Bíblia neʼe bele ajuda Ita.

Koko kontaktu Testemuña ba Jeová atu hatene oinsá mak sira bele halaʼo nafatin sira-nia adorasaun durante pandemia neʼe no mós oinsá Ita bele partisipa. Porezemplu iha mundu tomak sira uza vídeo konferénsia atu halaʼo reuniaun kongregasaun nian, komemora Jesus nia loron mate, no reuniaun boot sira.

Eskritura sira iha Bíblia neʼebé bele ajuda

Isaias 30:15: “Imi sei iha forsa se imi kalma nafatin no tau fiar ba haʼu.”

Neʼe katak sá: Tau fiar ba Maromak nia matadalan bele ajuda ita nafatin sente kalma durante tempu susar.

Provérbios 15:15: “Ema neʼebé iha susar laran, ninia loron hotu mak aat, maibé ema neʼebé laran-kontente, nia moris ho ksolok loron ba loron.”

Neʼe katak sá: Fokus ba buat neʼebé pozitivu bele ajuda ita sente kontente durante tempu susar.

Provérbios 14:15: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”

Neʼe katak sá: Halo tuir matadalan husi saúde nian, no keta hanoin katak matadalan sira-neʼe la importante mai ita.

Isaias 33:24: “La iha ema ida iha rai mak sei dehan: ‘Haʼu moras.’”

Neʼe katak sá: Maromak promete katak nia sei halakon moras hotu.