Tratamentu médiku—Saida mak Maromak nia Ukun sei halo

“Pandemia COVID-19 laʼós tan situasaun emerjénsia iha mundu. Maski nuneʼe, COVID-19 nafatin lori perigu ba ema hotu. . . . Ita bele fiar katak sei iha tan pandemia seluk iha futuru, no ita tenke prontu hasoru ida-neʼe.”—Dr. Tedros Adhanom Ghebreyesus, diretór jerál ba Organizasaun Mundiál Saúde, 22 Maiu 2023.

Ema barak kontinua iha problema ho sira-nia saúde mentál no fíziku tanba pandemia COVID-19. Governu sira no organizasaun saúde nian prepara an ona ba pandemia tuirmai ka lae? No sira bele rezolve problema saúde nian neʼebé ita hasoru agora ka lae?

Bíblia esplika katak sei iha governu ida neʼebé bele rezolve problema saúde iha mundu. Bíblia hatete katak “Maromak iha lalehan sei harii ukun ida”, ka governu. (Daniel 2:44) Iha governu neʼe nia ukun okos, “la iha ema ida iha rai mak sei dehan: ‘Haʼu moras.’” (Isaias 33:24) Ema hotu sei iha saúde diʼak no forsa hanesan joven.—Job 33:25.