Iha governu ida neʼebé bele ukun didiʼak ita-nia planeta ka lae?—Saida mak Bíblia dehan?

Governu sira iha mundu tomak agora daudaun hasoru problema barak. Maski iha nasaun sira neʼebé haree estavel, maibé sira mós hasoru susar oioin husi notísias negativu kona-ba polítiku-naʼin sira, rezultadu husi eleisaun neʼebé besik malu, konflitu polítiku, no ema halo demonstrasaun ho violénsia.

Bíblia fó sai katak iha governu ida neʼebé estavel. Karik uluk ita rona ona kona-ba governu neʼe. Jesus temi kona-ba governu neʼe iha ninia orasaun bainhira nia hanorin ninia dixípulu sira.

• “Neʼe duni, imi tenke halo orasaun hanesan neʼe: ‘Ami Aman iha lalehan, halo Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.’”—Mateus 6:9, 10.

Saida mak Bíblia dehan kona-ba Ukun ka governu neʼe?

Ukun neʼe mak governu ida neʼebé estavel

Governu neʼe ukun husi lalehan.

• Jesus temi governu neʼe nuʼudar “Ukun lalehan nian”. (Mateus 4:17; 5:3, 10, 19, 20) Tanba razaun neʼe, Jesus hatete: “Haʼu-nia Ukun laʼós parte husi mundu neʼe.”—João 18:36.

Ukun neʼe sei troka ema nia governu hotu.

• Bíblia hatete: “Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.”—Daniel 2:44.

Jesus Kristu mak Liurai ba Ukun neʼe, no Ukun neʼe sei nunka lakon.

• Bíblia hatete: “Ninia ukun mak rohan-laek no ba nafatin, no ninia ukun sei nunka lakon.”—Daniel 7:13, 14.

Ukun neʼe sei halo mundu sai fatin neʼebé dame no seguru.

• Bíblia hatete: “Sira ida-idak sei tuur iha sira-nia uvas-hun okos no iha sira-nia ai-figeira hun okos, no sei la iha ema ida mak halo sira taʼuk.”—Miqueias 4:4.

Aprende liután kona-ba Ukun neʼe

Bainhira Jesus iha rai, nia uza ninia tempu barak atu “haklaken liafuan diʼak kona-ba Maromak nia Ukun”. (Mateus 9:35) Nia mós fó-hatene nanis:

• “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.”—Mateus 24:14.

Ohin loron, liafuan diʼak kona-ba Maromak nia Ukun haklaken ona iha rai 240 liu. Ami konvida Ita atu aprende liután kona-ba governu neʼe no oinsá Ita bele hetan benefísiu husi governu neʼe.

Favór haree vídeo Saida mak Maromak nia Ukun?