Testemuña ba Jeová hetan osan husi neʼebé atu halaʼo sira-nia serbisu?

Osan neʼebé ami presiza atu halaʼo ami-nia serbisu iha mundu tomak, barak liu mai husi kontribuisaun neʼebé Testemuña ba Jeová fó husi laran.a Ami-nia reuniaun-fatin hotu iha kaixa kontribuisaun neʼebé ema bele tau osan, no iha ami-nia website ita bele hetan dalan seluk atu fó kontribuisaun. Iha opsaun balu atu Ita bele hili hodi fó kontribuisaun ba serbisu iha mundu tomak, ka ba kongregasaun lokál.

Testemuña ba Jeová la iha obrigasaun atu fó porsentu ruma husi sira-nia osan. (2 Korinto 9:7) Ami nunka husu ezmola iha ami-nia reuniaun sira, no ami la husu osan bainhira halaʼo batizmu, funerál, kazamentu ka buat seluk. Ami la hetan osan liuhusi loke kursu ka loke eskola, no ami mós la husu ema atu fó kontribuisaun. Ami nunka fó sai informasaun kona-ba sé mak fó kontribuisaun no osan hira mak sira fó. (Mateus 6:2-4) Ami-nia website no publikasaun sira nunka tau iklan sira atu hetan osan.

Fulan-fulan iha reuniaun sira neʼebé loke ba públiku, kongregasaun ida-idak fó sai relatóriu kona-ba osan. Ami haree didiʼak katak osan neʼebé ema fó nuʼudar kontribuisaun, uza ho didiʼak.​—2 Korinto 8:20, 21.

Dalan atu fó kontribuisaun

• Kaixa kontribuisaun: Ita bele tau kontribuisaun osan ka xeke iha kaixa kontribuisaun iha Reuniaun-Fatin ka reuniaun boot sira.

• Kontribuisaun online: Iha rai barak, ita bele uza pájina “Fó kontribuisaun ba Testemuña ba Jeová” atu fó kontribuisaun liuhusi kartaun kréditu ka débitu, transfere osan, no dalan seluk tan.b Testemuña balu hili atu “tau ketak buat ruma” fulan-fulan hodi marka loron neʼebé sira sei fó kontribuisaun.​—1 Korinto 16:2.

  

• Planu karidade: Dalan balu atu fó kontribuisaun presiza halo uluk planu ka tenke kumpre lei. Se ita halo planu nanis hanesan neʼe, karik ita bele simu benefísiu tanba hetan fali osan balu neʼebé ita selu nuʼudar taxa, depende ba lei sira iha ita-nia rai. Ema barak hetan ona benefísiu tanba buka-hatene informasaun kona-ba doasaun karidade nian neʼebé ema bele fó durante sira-nia moris, ka bainhira sira mate ona. Favór kontaktu Testemuña ba Jeová nia sukursál iha Ita-nia área atu hetan informasaun liután se ita hakarak fó kontribuisaun neʼebé liga ho:

  • konta banku

  • asuransi

  • uma ka rai

  • saham no obligasi

  • testamentu

Atu hetan informasaun liután kona-ba oinsá atu fó kontribuisaun, haree “Fó kontribuisaun ba Testemuña ba Jeová”.