Maromak mak kria Diabu ka lae?

Bíblia nia resposta

Bíblia fó sai katak laʼós Maromak mak kria Diabu. Maibé, Maromak nia kriatura ida mak hili rasik atu sai Diabu. Kona-ba Maromak, Bíblia dehan: “Ninia serbisu mak perfeitu, tanba ninia dalan sira hotu mak loos. Maromak laran-metin, nia sempre hatudu justisa, nia iha hahalok loos no laran-loos.” (Deuteronómio 32:3-5) Husi liafuan neʼe, ita bele hatene katak foufoun Diabu Satanás mak anju ida neʼebé perfeitu no iha hahalok loos nuʼudar Maromak nia oan.

Iha João 8:44, Jesus dehan katak Diabu “la kaer metin ba lia-loos”, neʼe katak foufoun Satanás iha hahalok loos no moos.

Maibé, hanesan ho Jeová nia kriatura seluk hotu, anju neʼebé ikusmai sai Satanás mós iha liberdade atu hili kona-ba buat neʼebé loos ka sala. Nia uza liberdade neʼe atu kontra hasoru Maromak no book Adão no Eva atu la halo tuir Maromak. Tan neʼe, anju neʼe sai Satanás, neʼebé signifika “Kontradór”.—Génesis 3:1-5; Apokalipse 12:9.