Oinsá se haʼu iha problema saúde? (Parte 1)

Ita koñese joven ida neʼebé iha problema ho ninia saúde ka lae? Ita iha moras ruma ka defisiente ruma neʼebé hanetik Ita atu hola parte iha atividade ruma ka lae?

Se nuneʼe, karik dala ruma Ita sente laran-kraik. No la sala atu sente hanesan neʼe. Maibé Ita bele hetan lia-loos rua husi Bíblia neʼebé bele fó kmaan ba Ita.

• Ita-nia Kriadór, Maromak Jeová hatene Ita-nia situasaun. Nia mós ‘hanoin Ita’.—1 Pedro 5:7.

• Maromak Jeová hakarak atu kura moras hotu! Ita bele lee kona-ba neʼe iha Bíblia, iha Isaias 33:24 no Apokalipse 21:1-4.

Joven barak neʼebé iha problema saúde tau fiar ba Maromak nia promesa neʼe no sira hetan ksolok. Hanoin toʼok kona-ba joven naʼin-haat nia ezemplu.

• YEIMY

• MATTEO

• BRUNA

• ANDRÉ

YEIMY

Kuandu haʼu tinan 11, haʼu presiza uza kadeira-roda atu bele bá fatin ruma. Susar mai haʼu atu halo atividade neʼebé simples, hanesan hiʼit sasán ruma neʼebé kmaan.

Bainhira haʼu tinan lima, doutór hatete katak haʼu iha moras neʼebé afeta haʼu-nia uat sira, no neʼe halo haʼu-nia forsa limitadu tebes. Dala ruma, haʼu sai laran-kraik tanba haʼu labele halo buat neʼebé labarik seluk bele halo. Maibé haʼu-nia inan-aman no maluk sira iha kongregasaun apoia haʼu iha dalan fíziku, emosaun no mós espirituál. Agora haʼu uza haʼu-nia tempu-tomak atu serbí Jeová, no maluk Kristaun sira akompaña haʼu beibeik kuandu haʼu dirije estuda Bíblia ho ema neʼebé interese.

Jesus hatete katak loron ida-idak iha ninia problema rasik. (Mateus 6:34) Tan neʼe haʼu koko atu hanoin deʼit kona-ba loron ohin no la hanoin barak kona-ba loron aban. Haʼu mós halo planu neʼebé haʼu bele kumpre. Haʼu hein namanas ba Maromak nia mundu foun bainhira haʼu bele iha “moris neʼebé loloos”, livre husi moras.—1 Timóteo 6:19.

Hanoin toʼok: Yeimy aprende katak halo planu neʼebé nia rasik bele kumpre bele ajuda nia. Oinsá Ita mós bele halo buat neʼebé hanesan?—1 Korinto 9:26.

MATTEO

Haʼu-nia kotuk laran komesa moras kuandu haʼu tinan neen, no foufoun doutór hatete katak ida-neʼe akontese tanba haʼu aumenta sai boot. Maibé liutiha tinan ida, sira deskobre katak iha tumór iha haʼu-nia ruin kotuk.

Haʼu hetan operasaun ida, maibé doutór neʼebé opera haʼu bele hasai deʼit porsentu 40 husi tumór neʼe. No liutiha fulan rua, tumór neʼe nia medida fila fali hanesan uluk. Husi tempu neʼebá, haʼu halaʼo teste oioin, tratamentu barak, no laran-triste ba dala barak.

Dala ruma, tumór neʼe hamosu moras hanesan ema sona haʼu-nia isin-lolon tomak ho surik, dala barak liu moras neʼe iha haʼu-nia kotuk laran no hirus-matan deʼit. Maibé haʼu koko atu la sai laran-taridu demais. Haʼu fó-hanoin ba haʼu-nia an katak ema seluk mós hasoru susar no sira nafatin hanoin pozitivu. Buat neʼebé ajuda tebes haʼu atu nafatin iha hanoin pozitivu mak haʼu fiar katak loron ida Maromak Jeová sei kumpre ninia promesa no halakon terus hotu.—Apokalipse 21:4.

Hanoin toʼok: Oinsá mak hanoin kona-ba Maromak nia promesa kona-ba halakon terus bele ajuda Ita tahan, hanesan buat neʼebé Matteo sente?—Isaias 65:17.

BRUNA

Tanba ema labele nota katak haʼu moras, sira hanoin katak haʼu mak ema baruk-teen. Maibé tuir loloos, susar tebes mai haʼu atu halo buat ruma, hanesan serbisu uma-laran nian, estuda ka hadeer husi kama.

Bainhira haʼu tinan 16, doutór hatete katak haʼu iha moras iha haʼu-nia ruin kotuk, moras neʼe sai aat ba daudaun. Neʼe afeta haʼu-nia atividade loroloron no mós haʼu-nia atividade espirituál. Haʼu lee fila-fila 1 Pedro 5:7 neʼebé hatete: “Entrega imi-nia laran-susar hotu ba [Maromak], tanba nia hanoin imi.” Haʼu hetan kbiit bainhira haʼu hanoin kona-ba Jeová tau matan ba ninia atan ida-idak. Ida-neʼe kontinua hametin haʼu toʼo ohin loron.

Hanoin toʼok: Oinsá Ita bele hetan benefísiu kuandu Ita entrega Ita-nia laran-susar ba Jeová, hanesan buat neʼebé Bruna halo?—Salmo 55:22.

ANDRÉ

Ema balu trata haʼu hanesan labarik tinan 10. Neʼe laʼós sira-nia sala, haʼu-nia isin mak haree hanesan labarik tinan 10 duni.

Kuandu haʼu tinan rua, doutór hatete katak iha kankru iha haʼu-nia ruin kotuk no habelar toʼo iha haʼu-nia kakutak. Doutór konsege kontrola kankru neʼe atu la daʼet liután, maibé tratamentu neʼebé haʼu halaʼo afeta haʼu-nia isin-lolon. Ohin loron, haʼu-nia aas mak metru 1,37 deʼit. Ema barak la fiar bainhira haʼu hatete katak haʼu mak tinan 18!

Iha kongregasaun laran, ema hatudu respeitu mai haʼu. Sira la trata haʼu hanesan labarik tinan 10, neʼe la hanesan duni ho buat neʼebé haʼu-nia kolega eskola halo. Haʼu hakaʼas an atu hanoin pozitivu kona-ba haʼu-nia situasaun. Buat furak liu neʼebé bele akontese iha ema ida nia moris mak koñese Maromak Jeová. No neʼe akontese ona mai haʼu. Haʼu koñese ona Jeová. Maski haʼu presiza tahan situasaun susar oioin, maibé haʼu hatene Jeová sei tau matan mai haʼu. Bainhira haʼu hanoin kona-ba mundu foun neʼebé Maromak Jeová promete, neʼe ajuda haʼu atu nafatin iha hanoin neʼebé pozitivu.—Isaias 33:24.

Hanoin toʼok: Tanbasá André hatete katak koñese Jeová mak “buat furak liu neʼebé bele akontese iha ema ida nia moris”?—João 17:3.