Husi liafuan tuirmai, ida-neʼebé mak ita konkorda?
Haʼu nunka kontente ho haʼu-nia isin.
Haʼu dala ruma sente kontente ho haʼu-nia isin.
Haʼu sempre kontente ho haʼu-nia isin.
Saida mak ita hakarak troka husi ita-nia isin?
Aas
Todan
Modelu
Fuuk
Kulit
Brasu
Buat seluk
Halo kompletu fraze tuirmai.
Haʼu sente la kontente kona-ba haʼu-nia isin . . .
bainhira haʼu tetu isin nia todan.
bainhira haʼu fihir an iha espellu.
bainhira haʼu kompara haʼu-nia an ho ema seluk (kolega, model, artista).
Halo kompletu fraze tuirmai.
Haʼu tetu haʼu-nia todan . . .
loroloron.
kada semana.
dala ruma deʼit.
Liafuan ida-neʼebé mak Ita konkorda?
La gosta ita-nia isin. (Porezemplu: “Kuandu haʼu fihir an iha espellu, Haʼu sente hanesan isin bokur no oin aat. Haʼu mós la han hodi bele hatún isin.”—Serena.)
Hanoin neʼebé loos kona-ba ita-nia isin. (Porezemplu: “Sempre iha buat ruma neʼebé ita la gosta husi ita-nia isin, maibé ita presiza simu deʼit. La loos atu estrese kona-ba buat neʼebé ita labele troka.”—Natanya.)
Bíblia fó hanoin ita atu la hanoin ita-nia an “diʼak liu fali buat neʼebé loos”. (Roma 12:3) Tuir loloos, ita presiza tau matan didiʼak ba ita-nia an. Porezemplu, ita kose nehan atu bele moos nafatin.
Maibé, oinsá se Ita sempre sente laran-kraik kona-ba Ita-nia isin, karik toʼo Ita hanoin demais kona-ba neʼe? Se ida-neʼe mak akontese, karik Ita mós hanoin . . .
‘Tanbasá haʼu la gosta haʼu-nia isin?’
Karik tanba razaun balu. Neʼe inklui:
Influénsia husi promosaun média. “Joven sira haree foto barak neʼebé halo sira sente katak sira tenke sai krekas loos no sempre haree jeitu. Rezultadu mak, se ami sente katak ami falta buat ida, ami sente depresaun!”—Kellie.
Influénsia husi inan-aman. “Haʼu nota katak se inan ida mak hanoin demais kona-ba nia isin, nia oan feto mós sei halo hanesan. Neʼe mós bele akontese ba aman ida no nia oan-mane.”—Rita.
Sente la iha folin. “Ema neʼebé hanoin demais kona-ba sira-nia isin, baibain sira sempre gosta ema seluk atu gaba sira. Haʼu sente baruk atu besik ho ema hanesan neʼe!”—Jeanne.
Maski iha razaun balu, karik ita hanoin . . .
‘Haʼu tenke troka buat ruma kona-ba haʼu-nia isin ka lae?’
Komentáriu husi joven balu.
“Dala ruma ita labele troka buat neʼebé ita la gosta husi ita-nia isin, tan neʼe simu deʼit. Se ita simu deʼit, ema seluk mós sei la nota.”—Rori.
“Koko atu iha saúde neʼebé diʼak. Se ita iha saúde neʼebé diʼak, ita-nia isin nafatin haree kapás. No se ema ruma la hafolin ita tanba sira fokus liu ba ita-nia isin, karik nia laʼós belun diʼak.”—Olivia.
Pontu importante: Tau matan ba ita-nia isin. Maibé keta estrese kona-ba buat seluk. Hanoin demais kona-ba ita-nia isin bele lori perigu. (Haree “Júlia nia istória”.)
Maibé, se ita iha hanoin neʼebé balansu neʼe sei ajuda ita atu haree ita-nia an iha dalan neʼebé loos. Joven feto naran Erin dehan: “Sin, dala ruma haʼu la gosta buat ruma kona-ba haʼu-nia isin, maibé haʼu nota katak sentimentu neʼe mosu kuandu haʼu tau fokus liu ba buat neʼebé negativu. Agora haʼu badinas halo ezersísiu no han buat neʼebé diʼak ba saúde. Buat seluk mós sai diʼak ona.”
Dalan diʼak liu atu haree bonita ka bonitu!
Se ita iha hanoin neʼebé loos kona-ba ita-nia isin, ita sei sente diʼak liu. Bíblia bele ajuda. Neʼe sei anima ita atu halo buat sira tuirmai neʼe:
Sente kontente ho buat neʼebé ita iha. “Diʼak liu haksolok ho buat neʼebé ita iha tiha ona duké hakarak buka buat seluk, tanba neʼe hanesan duni tuir anin.”—Eclesiastes 6:9, Contemporary English Version.
Hanoin neʼebé loos kona-ba ezersísiu. “Tanba treinu ita-nia isin lori buat diʼak uitoan.”—1 Timóteo 4:8.
Bonita iha laran. “Ema haree deʼit buat neʼebé iha liʼur, maibé Jeová haree ema nia laran.”—1 Samuel 16:7.
“Ita nia oin hatudu sai ita-nia sentimentu kona-ba ita-nia an. Se ita mak kontente ho buat neʼebé ita iha, ema seluk sei nota no sira sei kontente ransu ho ita.”—Sarah.
“Bonita ka bonitu bele dada lalais ema nia atensaun. Maibé buat neʼebé ema sei hanoin hetan liu mak ita-nia hahalok diʼak.”—Phylicia.
