PERGUNTA HUSI JOVEN SIRA
Oinsá mak haʼu bele sai laran-manas atu halo ezersísiu?
Tanbasá haʼu presiza halo ezersísiu?
Ohin loron, iha rai balu, joven sira uza tempu uitoan deʼit atu halo ezersísiu, no neʼe perigu ba sira-nia saúde. Bíblia hatete katak “treinu ita-nia isin lori buat diʼak”. (1 Timóteo 4:8) Hanoin toʼok benefísiu sira tuirmai neʼe:
Ezersísiu halo ita sente kontente. Bainhira ita halo ezersísiu, ita-nia kakutak prodús kímiku oin ida naran endorphin, kímiku neʼe halo ita sente kalma no kontente. Tuir loloos, ema balu bolu ezersísiu nuʼudar ai-moruk naturál atu halakon estrese.
“Se haʼu halai iha dadeer-saan, haʼu sei sente kontente no kumpre buat barak liu durante loron tomak. Halai halo haʼu sente kontente liu.”—Regina.
Ezersísiu bele ajuda halo ita-nia isin diʼak. Se ita halo ezersísiu iha dalan neʼebé loos, neʼe bele ajuda ita atu sai forte liu, iha isin diʼak liu no ajuda ita atu sai fiar an.
“Haʼu sente kontente tebes atu bele halo ezersísiu hodi tara an iha besi ba dala sanulu, tinan ida liubá halo dala ida deʼit mós labele. Haʼu hatene katak haʼu tau matan ba haʼu-nia isin-lolon.”—Olivia.
Ezersísiu bele ajuda ita moris ba tempu kleur. Se ita halo ezersísiu, neʼe lori benefísiu ba ita-nia fuan no pulmaun. Ezersísiu aeróbiku mós bele prevene atakasaun fuan. Neʼe mak moras neʼebé oho mane no feto barak liu.
“Kuandu ita iha toman atu halo ezersísiu, ita hatudu ba ita-nia Kriadór katak ita hafolin isin-lolon neʼebé nia fó ona ba ita.”—Jessica.
Lisaun importante: Ezersísiu bele lori benefísiu diʼak ba Ita-nia saúde iha futuru, no bele halo Ita sente kontente agora. Joven feto naran Tonya hatete: “Ita sei nunka hatete: ‘Haʼu arrepende an tanba saʼe foho ka halai.ʼ Kuandu haʼu la buka razaun oioin no halo ezersísiu, haʼu nunka arrepende an.”
Karreta neʼebé ema la tau matan, ikusmai sei sai aat, nuneʼe mós ho Ita-nia isin-lolon se Ita la tau matan didiʼak
Saida deʼit mak hanetik haʼu atu halo ezersísiu?
Tuirmai mak buat balu neʼebé bele hanetik ita:
La iha hakarak. “Bainhira joven, ema barak hanoin katak sira iha kbiit boot. Joven sira ladún hanoin kona-ba tempu neʼebé sira sei hetan moras. Karik ita hanoin katak só ferik-katuas deʼit mak hetan problema ho sira-nia saúde.”—Sophia.
La iha tempu. “Tanba haʼu okupadu tebes, haʼu tenke buka tempu atu han ai-han neʼebé diʼak no toba, maibé susar ba haʼu atu buka tempu atu halo ezersísiu.”—Clarissa.
La iha osan. “Atu iha saúde no isin diʼak la baratu, ita presiza selu se ita hakarak atu bá gym.”—Gina.
Hanoin toʼok:
Saida mak hanetik tebes Ita atu halo ezersísiu? Maski karik Ita presiza hakaʼas an atu hasoru buat neʼebé hanetik Ita, maibé Ita sei hetan rezultadu diʼak.
Oinsá haʼu bele hetan ezersísiu neʼebé haʼu presiza atu iha saúde neʼebé diʼak?
Tuirmai mak sujestaun balu:
Hanoin-hetan Ita presiza tau matan ba Ita-nia saúde rasik.—Galásia 6:5.
Keta buka razaun oioin. (Eclesiastes 11:4) Porezemplu, Ita la presiza sai membru ba gym atu bele komesa Ita-nia programa atu halo ezersísiu. Koko buka atividade ida neʼebé Ita gosta no halo ida-neʼe beibeik.
Atu hetan ideia, husu ba ema seluk kona-ba ezersísiu saida mak sira halo.—Provérbios 20:18.
Halo oráriu neʼebé klaru. Hakerek Ita-nia objetivu no buat neʼebé Ita kumpre ona, neʼe sei motiva Ita.—Provérbios 21:5.
Buka kolega atu halo ezersísiu hamutuk. Kolega neʼe sei apoia no ajuda Ita atu halo tuir Ita-nia oráriu.—Eclesiastes 4:9, 10.
Buka-hatene situasaun oioin neʼebé bele hanetik Ita no oinsá atu rezolve ida-neʼe, keta rende an.—Provérbios 24:10.
Iha hanoin neʼebé loos
Bíblia haruka feto no mane sira atu ‘kontrola sira-nia hahalok’. (1 Timóteo 3:2, 11) Tan neʼe ita mós presiza iha hanoin neʼebé loos kona-ba ezersísiu. Baibain se ema ida halo ezersísiu makaʼas, neʼe halo ema seluk hanoin ema neʼe mak foti an. Feto joven ida naran Julia hatete: “Se mane joven ida nia brasu boot liu fali ninia matenek, mane neʼe la jeitu ida.”
Kuidadu mós kona-ba dezeñu sira iha gym ho liafuan sira hanesan: “Se Ita sente hanesan atu besik mate, halo tan dala 10.” Loloos, sei ita halo tuir konsellu hanesan neʼe, Ita bele hakanek Ita-nia an no halo Ita la tau tan atensaun ba “buat sira neʼebé importante liu” iha moris.—Filipe 1:10.
Liután neʼe, liafuan sira hanesan neʼe bele halo ema laran-kraik. Feto joven ida naran Vera hatete: “Feto barak rai foto oioin husi feto sira neʼebé sira hakarak atu banati-tuir no sira sei haree foto sira-neʼe atu hetan motivasaun. Maibé ikusmai sira kompara sira-nia an ho ema sira-neʼe no sai laran-kraik. Diʼak liu halo planu atu hetan saúde neʼebé diʼak, laʼós deʼit isin mak diʼak.”