Jesus mate iha krús ka lae?
Bíblia nia resposta
Ema barak haree krús nuʼudar símbolu neʼebé reprezenta relijiaun Kristaun. Maibé Bíblia la esplika ho loloos kona-ba buat neʼebé ema uza atu fó kastigu-mate ba Jesus, tan neʼe ita la hatene ho loloos buat neʼe mak haree oinsá. Maski nuneʼe, Bíblia fó evidénsia neʼebé hatudu katak Jesus mate iha ai-lolon, laʼós iha krús.
Baibain Bíblia uza liafuan Gregu staurós bainhira koʼalia kona-ba buat neʼebé ema uza atu fó kastigu-mate ba Jesus. (Mateus 27:40; João 19:17) Maski tradusaun Bíblia barak tradús liafuan neʼe nuʼudar “krús”, maibé matenek-naʼin barak konkorda malu katak liafuan staurós signifika “ai-lolon neʼebé hamriik loos”.a Tuir livru ida neʼebé esplika kona-ba liafuan Gregu iha Bíblia (A Critical Lexicon and Concordance to the English and Greek New Testament), liafuan staurós “nunka signifika ai-lolon rua neʼebé tula hamutuk”.
Bíblia mós uza liafuan Gregu ksilon bainhira koʼalia kona-ba buat neʼebé ema uza atu fó kastigu-mate ba Jesus. (Apóstolu 5:30; 1 Pedro 2:24) Liafuan neʼe signifika “ai”, “ai-lolon”, ka “ai-hun”.b The Companion Bible hatete: “Lian Gregu [iha Testamentu Foun] la hatudu kona-ba ai pedasuk rua.”
Maromak simu ka lae se ita uza krús nuʼudar parte ba ita-nia adorasaun?
Crux simplex mak fraze Latina neʼebé refere ba ai-lolon ida deʼit neʼebé uza atu kastigu kriminozu sira
Maski Jesus mate iha krús ka lae, faktu no eskritura sira tuirmai hatudu katak ita labele uza krús nuʼudar parte ba ita-nia adorasaun.
Maromak la simu adorasaun neʼebé uza imajen ka estátua sira, inklui krús. Maromak bandu ema Izraél atu uza “estátua tuir modelu naran deʼit” nuʼudar parte ba sira-nia adorasaun, no Maromak mós haruka ema Kristaun atu “halai sees husi adora estátua”.—Deuteronómio 4:15-19; 1 Korinto 10:14.
Ema Kristaun iha apóstolu sira-nia tempu la uza krús nuʼudar parte ba sira-nia adorasaun.c Ema Kristaun hotu presiza halo tuir hanorin no ezemplu husi apóstolu sira.—2 Tesalónika 2:15.
Ema jentiu sira uza krús iha sira-nia adorasaun.d Tinan atus ba atus depois Jesus, bainhira igreja sira husik ona Jesus nia hanorin, igreja nia membru foun sira “bele kontinua uza sira-nia símbolu no estátua husi sira-nia adorasaun jentiu”, inklui mós krús. (The Expanded Vineʼs Expository Dictionary of New Testament Words) Maibé Bíblia la fó lisensa ba ema atu adora ema jentiu nia estátua, maski neʼe ajuda ema atu simu hanorin Kristaun.—2 Korinto 6:17.
a Haree New Bible Dictionary, Edisaun Terseiru husi D. R. W. Wood, pájina 245; Theological Dictionary of the New Testament, Volume VII, pájina 572; The International Standard Bible Encyclopedia, Edisaun Revizaun, Volume 1, pájina 825; no The Imperial Bible-Dictionary, Volume II, pájina 84.
b Haree The Expanded Vineʼs Expository Dictionary of New Testament Words, pájina 1165; A Greek-English Lexicon husi Liddell no Scott, Edisaun Sia, pájina 1191-1192; no Theological Dictionary of the New Testament, Volume V, pájina 37.
c Haree Encyclopædia Britannica, 2003, tópiku “Cross”; The Cross—Its History and Symbolism, pájina 40; no The Companion Bible, Oxford University Press, apéndise 162, pájina 186.
d Haree The Encyclopedia of Religion, Volume 4, pájina 165; The Encyclopedia Americana, Volume 8, pájina 246; no Symbols Around Us, pájina 205-207.