Oinsá mak inan-aman bele esplika ba oan sira kona-ba buat seksuál?

Bíblia nia resposta

Sé mak bele esplika ba oan sira kona-ba buat seksuál? Bíblia fó responsabilidade ba inan-aman atu esplika ba oan, no inan-aman barak sente katak sujestaun sira tuirmai neʼe ajuda duni sira:

• Keta moe. Bíblia koʼalia nakloke kona-ba buat seksuál no parte isin nian neʼebé privadu, no Maromak hatete ba nasaun Izraél katak inan-aman tenke esplika ba “labarik” sira kona-ba buat sira-neʼe. (Deuteronómio 31:12; Levítico 15:2, 16-19) Atu la sente moe, Ita bele uza liafuan neʼebé respeitu bainhira esplika kona-ba buat seksuál nian no mós parte isin nian neʼebé privadu.

• Esplika tuir oan nia idade. Duké esplika buat hotu dala ida deʼit bainhira Ita-nia oan joven ona, diʼak liu atu esplika informasaun tuir buat neʼebé nia bele komprende.​—1 Korinto 13:11.

• Hanorin oan sira kona-ba morál. Karik eskola esplika ba oan sira kona-ba buat seksuál nian. Maibé, Bíblia anima inan-aman atu esplika ba sira-nia oan kona-ba buat seksuál nian no mós kona-ba hanoin no hahalok neʼebé loos kona-ba buat seksuál.​—Provérbios 5:1-23.

• Rona ba Ita-nia oan. Keta sai hirus kedas ka hanoin sala se Ita-nia oan husu pergunta kona-ba buat seksuál nian. Diʼak liu “lalais atu rona, la ansi atu koʼalia”.​—Tiago 1:19.

Oinsá proteje Ita-nia oan husi ema neʼebé abuza labarik iha dalan seksuál

• Hanorin Ita-nia an. Buka-hatene dalan neʼebé ema uza atu lohi no abuza labarik iha dalan seksuál.​—Provérbios 18:15; haree kapítulu 32 husi livru Pertanyaan Kaum Muda—Jawaban yang Praktis, Jilid 1.

• Hatudu interese ba Ita-nia oan. Antes atu fó Ita-nia oan ba ema seluk atu tau matan, diʼak atu buka-hatene uluk se Ita bele tau fiar ba ema neʼe ka lae, no keta husik Ita-nia oan livre deʼit.​—Provérbios 29:15.

• Hanorin oan atu iha hanoin neʼebé loos kona-ba halo tuir ema. Oan sira presiza aprende atu halo tuir inan-aman. (Koloso 3:20) Maibé, se Ita hanorin Ita-nia oan katak nia tenke halo tuir ema boot hotu, karik neʼe sei halo fasil ba ema neʼebé abuza labarik atu aproveita nia. Inan-aman Kristaun bele hatete ba sira-nia oan: “Se ema ruma haruka ó atu halo buat neʼebé Maromak dehan mak sala, keta halo tuir.”​—Apóstolu 5:29.

• Treinu oan sira atu proteje an. Hanorin Ita-nia oan kona-ba saida mak sira tenke halo se ema ruma koko atu aproveita sira bainhira Ita la hamutuk sira. Hodi treinu nanis kona-ba situasaun ruma, neʼe sei fó duni konfiansa ba Ita-nia oan atu dehan: “Labele! Haʼu sei kesar ó!” no halai sees kedas. Karik Ita presiza “repete fali” ba Ita-nia oan kona-ba neʼe tanba fasil ba sira atu haluha.​—Deuteronómio 6:7, nota.