Sé mak bá infernu?

Bíblia nia resposta

Liafuan “infernu” neʼebé temi iha tradusaun Bíblia balu tradús husi lian orijinál “Siol” no “Hades”, no neʼe refere ba rate, laʼós fatin neʼebé ema hetan kastigu ho ahi neʼebé lakan makaʼas. Sé mak bá “infernu”? Ema diʼak no ema aat. (Job 14:13; Salmo 9:​17) Bíblia dehan katak rate mak “uma neʼebé ema hotu sei bá”.​—Job 30:23.

Jesus mós bá “infernu” ka Hades kuandu nia mate. Maibé, Maromak “la husik nia iha rate laran [Hades]”, tanba Maromak fó moris-hiʼas ba nia.​—Apóstolu 2:​31, 32.

“Infernu” sei iha ba nafatin ka lae?

Ema hotu neʼebé bá “infernu” sei moris fali, sira sei hetan moris-hiʼas liuhusi Jesus ho Maromak nia kbiit. (João 5:​28, 29; Apóstolu 24:15) Kona-ba tempu moris-hiʼas nian, Apokalipse 20:13 fó-hatene nanis katak “mate no rate entrega ema mate sira neʼebé iha laran”. Kuandu ema hotu hetan moris-hiʼas, fatin neʼe sai mamuk no sei la iha tan, no ema sei nunka bá fali tanba “mate sei la iha tan”.​—Apokalipse 21:​3, 4; 20:14.

Maibé, laʼós ema hotu neʼebé mate bá “infernu” ka Hades. Bíblia hatudu katak iha ema balu neʼebé aat tebetebes no la arrepende sira-nia sala. (Ebreu 10:26, 27) Kuandu ema hanesan neʼe mate, sira bá Gehena, neʼebé signifika lakon ba nafatin. (Mateus 5:​29, 30) Porezemplu, Jesus fó sai katak ulun-naʼin relijiaun balu neʼebé laran-makerek sei bá Gehena.​—Mateus 23:27-​33.