Testemuña ba Jeová fiar ba Bíblia Testamentu Tuan ka lae?
Sin. Ami Testemuña ba Jeová fiar katak “Eskritura hotu mai husi Maromak”. (2 Timóteo 3:16) Eskritura hotu neʼe dehan katak parte Testamentu Tuan hamutuk ho parte Testamentu Foun. Baibain Testemuña ba Jeová bolu Testamentu Tuan nuʼudar Eskritura Lian Ebraiku, no Testamentu Foun nuʼudar Eskritura Lian Gregu. Ami bolu hanesan neʼe tanba ami lakohi ema hanoin katak parte balu husi Bíblia mak tuan no la folin ona.
Tansá mak ema Kristaun presiza Testamentu Tuan ho Testamentu Foun hotu?
Hodi simu Maromak nia espíritu santu, apóstolu Paulo hakerek: “Buat hotu neʼebé hakerek ona horiuluk kedas, hakerek hodi hanorin ita.” (Roma 15:4) Tan neʼe, Eskritura Lian Ebraiku mós hatoʼo informasaun neʼebé folin-boot no lori diʼak mai ita. Liuhusi Eskritura Lian Ebraiku, ita bele hatene istória kona-ba tempu uluk no ita mós bele hetan matadalan oioin neʼebé diʼak tebes mai ita.
Istória. Eskritura Lian Ebraiku fó sai istória neʼebé esplika kona-ba Maromak kria buat oioin no mós kona-ba oinsá mak ema sai sala-naʼin. Se informasaun hirak-neʼe la iha karik, ita labele hetan resposta ba pergunta sira hanesan: Ita ema mai husi neʼebé? Tansá mak ita ema tenke mate? (Génesis 2:7, 17) Liután neʼe, liuhusi Eskritura Lian Ebraiku, ita mós bele hatene hahalok sira neʼebé Maromak hatudu ona ba ema iha tempu uluk, neʼebé moris haksolok no mós hasoru susar, hanesan deʼit ho ita ohin loron.—Tiago 5:17.
Matadalan. Eskritura Lian Ebraiku inklui livru Provérbios no Eclesiastes, no livru sira-neʼe fó sai matadalan oioin neʼebé iha folin-boot ba ema nia moris toʼo ohin loron. Matadalan sira-neʼe inklui kona-ba oinsá mak ita bele halaʼo moris família nian neʼebé kontente (Provérbios 15:17), oinsá mak ita bele tetu didiʼak kona-ba serbisu (Provérbios 10:4; Eclesiastes 4:6), no oinsá mak joven sira bele uza sira-nia tempu joven atu bele lori buat diʼak ba sira-nia moris (Eclesiastes 11:9–12:1).
Liután neʼe, hodi estuda kona-ba Moisés nia Ukun-Fuan, ita bele aprende buat barak. Maski ema Kristaun sira la presiza ona halo tuir Ukun-Fuan sira-neʼe, maibé matadalan sira neʼebé ita bele hetan iha Ukun-Fuan laran bele ajuda duni ita atu halaʼo moris kontente.—Levítico 19:18; Deuteronómio 6:5-7.