Oinsá mak haʼu bele kontrola haʼu-nia hirus?

Pergunta ba Ita-nia an

• Dala hira mak Ita hirus?

  • nunka

  • dala ruma

  • loron-loron

• Ita hatudu reasaun oinsá kuandu hirus?

  • muramura

  • laran-nakali

  • rabenta

• Sé mak lalais atu halo Ita sai hirus?

  • inan-aman

  • maun-alin

  • kolega

Se Ita hanoin katak Ita presiza kontrola Ita-nia hirus, informasaun neʼe sei ajuda Ita. Primeiru, hanoin kona-ba razaun balu tanbasá importante atu nafatin kalma maski ema provoka Ita.

Tanbasá neʼe sériu

Ita-nia saúde. Provérbios 14:30 hatete: “Laran neʼebé kalma fó moris ba isin.” Maibé, livru Journal of Medicine and Life hatete katak “hirus bele fó impaktu kedas ba moras-fuan oioin”.

Ita-nia belun sira. Bíblia hatete: “Keta habelun ho ema neʼebé hirusdór ka ransu ho ema neʼebé sempre sai hirus lalais.” (Provérbios 22:24) Entaun se Ita iha problema kona-ba hirus, keta hakfodak kuandu ema lakohi ransu ho Ita. Feto joven ida naran Jasmine hatete: “Se Ita la aprende atu kontrola Ita-nia hirus, Ita sei lakon relasaun diʼak ho Ita-nia belun sira.”

Ita-nia reputasaun. Ethan neʼebé tinan 17 hatete: “Se Ita hirus lalais, ema sei koñese Ita nuʼudar ema neʼebé hirusdór no sei afeta ema nia hanoin kona-ba Ita.” Husu Ita-nia an: ‘Haʼu hakarak ema koñese haʼu nuʼudar ema neʼebé kalma no buka dame ka hanesan bomba neʼebé prontu atu rabenta?’ Bíblia hatete: “Ema neʼebé la hirus lalais hatene duni atu tetu didiʼak, maibé ema neʼebé la iha pasiénsia hatudu katak nia beik loos.”​—Provérbios 14:29.

Buat neʼebé Ita bele halo

Haree toʼok eskritura tuirmai no komentáriu sira, no husu Ita-nia an pergunta sira-neʼe.

• Provérbios 29:22: “Ema neʼebé hirusdór hamosu istori malu; ema neʼebé sempre sai hirus lalais sei halo sala barak.”

  “Kuandu haʼu sei joven, susar tebes atu kontrola haʼu-nia emosaun. Família husi parte apá nian mós iha problema hanesan. Ami halo komik hodi dehan katak neʼe mak família nia jenétiku.”​—Kerri.

  Haʼu lalais atu hirus ka lae? Lójiku ka lae atu hanoin katak haʼu-nia hahalok diʼak mak rezultadu husi haʼu-nia hakaʼas an, maibé haʼu-nia hahalok aat mak tanba haʼu-nia jenétiku?

• Provérbios 15:1: “Hatán ho liafuan mamar sei hatún hirus, maibé liafuan neʼebé makaʼas halo ema hirus liután.”

  “Xave mak Ita aprende atu kontrola Ita-nia emosaun. Se Ita haburas hahalok laran-maus no fokus ba buat neʼebé pozitivu, Ita sei la husik sentimentu hirus atu kontrola Ita.”​—Daryl.

  Bainhira situasaun ruma provoka haʼu atu hirus, tanbasá haʼu-nia reasaun primeiru mak importante tebes?

• Provérbios 26:20: “Ahi sei mate kuandu la iha ai.”

  “Bainhira haʼu hatán ho laran-diʼak, baibain neʼe halo ema seluk sai kalma no ami bele kontrola emosaun no koʼalia ba malu ho diʼak.”​—Jasmine.

  Oinsá mak haʼu-nia liafuan ka hahalok bele hanesan ho gazolina neʼebé fakar ba ahi?

• Provérbios 22:3: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”

  “Dala ruma haʼu presiza deʼit atu laʼo sees husi fatin neʼe no fó tempu ba haʼu-nia an atu hanoin kona-ba buat neʼebé akontese, no tuirmai haʼu bele rezolve bainhira haʼu kalma.”​—Gary.

  Bainhira mak tempu neʼebé diʼak liu atu laʼo sees husi situasaun manas ida, hodi la fó impresaun katak ema neʼe la importante?

• Tiago 3:2: “Ita hotu halo sala dala barak.”

  “Ita presiza arrepende husi ita-nia sala sira, maibé ita mós presiza aprende husi sala sira-neʼe. Ita presiza hamriik fali bainhira ita monu no hakaʼas an atu sai diʼak liután iha tempu tuirmai.”​—Kerri.

Sujestaun: Halo planu. Deside metin atu nafatin kalma ba tempu balu, karik ba fulan ida. Hakerek no cek beibeik Ita-nia progresu.