Iha mundu tomak Testemuña ba Jeová hamutuk naʼin-hira?

Oinsá imi sura imi-nia membru sira?

Só sira neʼebé fulan-fulan hola parte iha serbisu atu haklaken Maromak nia Ukun mak ami sura nuʼudar Testemuña ba Jeová. (Mateus 24:14) Neʼe inklui sira neʼebé hetan ona batizmu no mós sira neʼebé kumpre kritéria atu haklaken maibé seidauk hetan batizmu.

Ema ida neʼebé hakarak sai Testemuña ida presiza fó osan ka lae?

Lae. Atu sai Testemuña ba Jeová, hetan knaar ka priviléjiu ruma iha ami-nia organizasaun, neʼe la depende ba osan neʼebé ita fó ka la fó. (Apóstolu 8:18-20) Tuir loloos, dala barak, ema seluk la hatene sé mak fó kontribuisaun. Testemuña ida-idak uza sira-nia tempu, enerjia no buat neʼebé sira iha atu apoia serbisu haklaken tuir sira-nia kbiit no situasaun.​—2 Korinto 9:7.

Oinsá imi bele hatene ema naʼin-hira mak hola parte daudaun iha serbisu haklaken?

Kada fulan, haklaken-naʼin ida-idak hatama sira-nia relatóriu haklaken nian ba sira-nia kongregasaun ida-idak. Atu hatama relatóriu, neʼe laʼós obrigasaun.

Totál relatóriu husi kongregasaun ida-idak sei tau hamutuk, no sei haruka ba rai ida-idak nia sukursál. Depois, sukursál ida-idak sei haruka fali totál sira-neʼe ba ami-nia sede-jerál.

Kada tinan serbisu niana remata, ami sei haree Testemuña naʼin-hira mak iha rai ida-idak no foti númeru neʼebé aas liu husi rai ida-idak. Númeru sira-neʼe sei tau hamutuk atu bele hatene totál husi Testemuña ba Jeová iha mundu tomak. Relatóriu husi rai ida-idak sei fó sai iha ami-nia website ofisiál iha parte “Mundu Tomak”. Relatóriu sira-neʼe fó laran-manas ba ami, hanesan buat neʼebé akontese ba ema Kristaun sira iha tempu antigu.​—Apóstolu 2:41; 4:4; 15:3.

Imi mós sura sira neʼebé la hola parte iha serbisu haklaken ka lae?

Lae. Maibé ami nafatin simu sira iha ami-nia kongregasaun. Sira barak tinan-tinan tuir reuniaun atu komemora Kristu nia mate, tan neʼe atu hatene ema sira-neʼe maizumenus naʼin-hira, bele kompara totál husi ema neʼebé tuir Memoriál ho Testemuña naʼin-hira iha mundu tomak. Iha tinan 2024, ema neʼebé tuir Memoriál hamutuk naʼin-21.119.442.

Sira barak neʼebé la tuir ami-nia reuniaun mós hetan benefísiu husi ami-nia programa estudu Bíblia neʼebé gratuitu. Iha tinan 2024, ami halaʼo estudu Bíblia ho ema hamutuk naʼin-7.480.146 fulan-fulan. No maski ami estuda ho ema naʼin-rua ka liu iha tempu ida deʼit, maibé ami sura nuʼudar estudu ida deʼit.

Tanbasá sensus neʼebé governu fó sai kona-ba Testemuña ba Jeová barak liu fali númeru neʼebé Testemuña sira fó sai?

Bainhira governu halaʼo sensus, baibain sira husu ema ida-idak kona-ba sira-nia relijiaun mak saida atu hatene ema naʼin-hira mak tuir relijiaun ruma. Porezemplu, organizasaun neʼebé halaʼo sensus iha Estadus Unidus hatete katak sira-nia objetivu mak atu buka-hatene se ema neʼebé tuir sensus neʼe iha relijiaun ruma ka lae, tan neʼe rezultadu husi sensus neʼe tuir deʼit ema ida-idak nia hanoin. Maibé, ami nuʼudar organizasaun sura deʼit Testemuña ba Jeová neʼebé haklaken no hatama relatóriu, no la sura ema neʼebé temi deʼit sira-nia an nuʼudar Testemuña.