João Batista moris duni iha tempu uluk ka lae?
Iha Bíblia, Evanjellu sira temi kona-ba mane ida ho naran João Batista neʼebé haklaken iha rai-Judeia kona-ba Maromak nia Ukun. Istória kona-ba mane neʼe mak loos duni hanesan ho buat neʼebé Bíblia dehan ka lae? Hanoin toʼok kona-ba neʼe:
Bíblia dehan: “João Batista haklaken iha rai-fuik Judeia. Nia dehan: ‘Arrepende imi-nia sala bá, tanba Ukun lalehan nian besik ona.’” (Mateus 3:1, 2) Matenek-naʼin kona-ba istória apoia buat neʼebé Bíblia dehan ka lae? Resposta mak, sin.
Iha matenek-naʼin ida husi apóstolu sira-nia tempu ho naran Flávio Josefo. Nia hakerek kona-ba mane ida naran “João, neʼebé ho apelidu Batista”, neʼebé “anima ema Judeu atu sai ema laran-loos, halo adorasaun ba Maromak no hetan batizmu”.—Jewish Antiquities, Book XVIII.
Bíblia esplika katak João Batista korrije Herodes Antipas, neʼebé ukun iha área Galileia no Pereia. Herodes haree ninia an nuʼudar ema Judeu neʼebé moris tuir Moisés nia Ukun-Fuan. João korrije Herodes tanba tuir ukun-fuan, Herodes halo sala kuandu nia kaben ho nia maun nia feen Herodias. (Marcos 6:18) Bíblia nia informasaun neʼe mós hetan apoia husi Flávio Josefo.
Flávio Josefo konta katak Herodes Antipas “laran monu ba Herodias” no “nia la moe husu Herodias atu kaben”. Herodias mós simu no husik nia laʼen atu bele kaben ho Herodes Antipas.
Bíblia dehan katak “ema husi Jeruzalein, rai-Judeia tomak no mós rai hotu neʼebé besik Mota Jordaun bá hasoru [João], no nia fó batizmu ba sira iha Mota Jordaun”.—Mateus 3:5, 6.
Flávio Josefo mós apoia informasaun neʼe, nia hakerek katak iha “ema lubun” neʼebé mai hasoru João Batista no mós “buat neʼebé João Batista hanorin kona loos ema lubun neʼe nia laran”.
Ita bele haree ho klaru Flávio Josefo fiar metin katak João Batista mak ema neʼebé moris duni iha tempu uluk. Ita mós bele fiar ida-neʼe.