AJUDA BA FAMÍLIA
Bainhira oan halo sala no la konsege kumpre sira-nia planu
Dala ruma, Ita-nia oan sei halo sala ka la konsege kumpre sira-nia planu no sente laran-kraik. Iha dalan saida deʼit mak Ita bele ajuda sira sente diʼak fali?
Buat neʼebé Ita presiza hatene
Ema hotu halo sala ka la konsege atu kumpre planu ruma. Bíblia dehan “Ita hotu halo sala.” (Tiago 3:2) Oan sira mós halo sala. Maski nuneʼe, neʼe bele ajuda oan sira aprende oinsá atu tahan situasaun neʼebé susar. Oan sira la hetan kapasidade neʼe kuandu foin moris, maibé sira bele aprende oinsá atu tahan. Inan ida naran Laura dehan: “Haʼu-nia laʼen no haʼu haree katak diʼak liu se oan aprende oinsá atu tahan bainhira halo sala ka la konsege kumpre buat ruma, duké finje katak buat hotu diʼak. Sira bele aprende oinsá atu tahan maski buat ruma la akontese tuir sira-nia hakarak.”
Oan barak la hatene oinsá atu tahan bainhira la kumpre sira-nia planu. Oan balu nunka aprende oinsá atu tahan bainhira la kumpre sira-nia planu tanba sira-nia inan-aman sempre defende no taka sira-nia sala. Porezemplu, se oan hetan valór la diʼak, inan-aman sei duun kedas mestre. Se oan diskute ho belun ida, inan-aman duun kedas ninia belun.
Maibé, oinsá mak oan bele aprende atu simu konsekuénsia husi sira-nia sala se inan-aman sempre proteje sira husi sira-nia sala?
Saida mak Ita bele halo
Hanorin Ita-nia oan katak buat neʼebé sira halo sei hetan konsekuénsia.
Bíblia dehan: “Buat naran deʼit neʼebé ema kari, nia mós sei koʼa ida-neʼe.”—Galásia 6:7.
Buat neʼebé ita halo sempre iha ninia rezultadu. Se ita estraga buat ruma, ita presiza selu fali. Se ita halo sala, ita mós sei hasoru konsekuénsia. Oan sira presiza hatene katak buat neʼebé sira kari, sira sei koʼa, tan neʼe sira tenke simu responsabilidade se problema ida akontese. Keta duun ema seluk se Ita-nia oan halo sala. Tetu didiʼak atu sira hetan konsekuénsia neʼebé tuir sira-nia tinan. Tuir loloos, oan ida tenke komprende katak sira hetan konsekuénsia neʼe tanba buat neʼebé sira halo.
Ajuda Ita-nia oan hetan solusaun.
Bíblia dehan: “Maski karik ema laran-loos bele monu ba dala hitu, nia sei hamriik fali.”—Provérbios 24:16.
Se oan halo sala ka la konsege kumpre planu ruma, nia bele sente laran-kraik. Ajuda Ita-nia oan tau fokus hodi hetan solusaun ba problema duké halerik tanba la hetan justisa. Porezemplu, se Ita-nia oan-mane hetan valór la diʼak iha eskola, ajuda nia komprende oinsá atu hadiʼa situasaun no hakaʼas an atu estuda ho didiʼak. (Provérbios 20:4) Se Ita-nia oan-feto diskute malu ho ninia belun, ajuda nia komprende oinsá atu husu deskulpa no habelun fali, maski ninia belun mós halo sala.—Roma 12:18; 2 Timóteo 2:24.
Hanorin oan hahalok haraik an.
Bíblia nia prinsípiu: “Haʼu koʼalia ba ema hotu iha imi-nia leet atu la hanoin nia an diʼak liu fali buat neʼebé loos.”—Roma 12:3.
Se Ita gaba beibeik Ita-nia oan katak nia mak diʼak liu fali ema seluk, neʼe sei la ajuda. Tuir loloos, joven sira neʼebé matenek loos laʼós dehan katak sempre hetan valór neʼebé diʼak. No joven sira neʼebé halo desportu ho diʼak la dehan katak sempre manán. Fasil liu ba joven sira neʼebé hatudu hahalok haraik an atu aprende oinsá bele tahan kuandu halo sala ka la konsege kumpre planu ruma.
Bíblia dehan katak susar neʼebé ita hasoru bele ajuda ita aprende oinsá atu tahan, no sai forte liu. (Tiago 1:2-4) Maski sala bele halo oan sente laran-kraik, ita presiza treinu Ita-nia oan atu iha hanoin neʼebé loos.
Ita presiza hakaʼas an no gasta tempu atu treinu Ita-nia oan atu tahan situasaun neʼebé susar. Ita-nia oan sei hetan rezultadu diʼak se sira simu treinu agora. Livru Letting Go With Love and Confidence dehan: “Joven sira neʼebé hatene oinsá atu tahan situasaun susar sei la sente estrese demais no halo buat ruma neʼebé beik. Sira bele halo buat neʼebé diʼak liu fali kuandu hasoru situasaun susar.” Tan neʼe, hodi aprende oinsá atu tahan situasaun neʼebé susar sei ajuda sira kuandu sai boot ona.
Sujestaun: Hatudu ezemplu neʼebé diʼak. Hanoin-hetan katak dalan neʼebé Ita tahan susar, sei ajuda treinu sira oinsá atu tahan situasaun susar.