PERGUNTA HUSI JOVEN SIRA
Oinsá se haʼu sente haʼu la hanesan ho ema seluk?
“Ita tenke sai hanesan ho ema seluk, se lae Ita sei la iha belun, la moris kontente no la iha futuru. Ema sei haluha Ita no Ita sei mesamesak.”—Carl.
Situasaun sei sai aat duni hanesan neʼe ka lae? Karik. Maibé joven barak halo buat naran deʼit atu la hasoru situasaun neʼebé Carl temi. Oinsá ho Ita? Informasaun neʼe sei ajuda Ita atu habelun ho ema seluk iha dalan neʼebé diʼak.
Tanbasá ema hakarak sai hanesan ho ema seluk?
Tanba sira hakarak ema seluk ransu ho sira. “Haʼu haree foto sira iha média sosiál, kolega balu bá halimar hamutuk maibé la bolu haʼu atu laʼo ho sira. Neʼe halo haʼu hanoin tanbasá sira la gosta haʼu. Haʼu hanoin beibeik kona-ba neʼe. Haʼu sempre hanoin katak sira lakohi kolega ho haʼu no lakohi laʼo ho haʼu.”—Natalie.
HANOIN TOʼOK: Ita sente ona katak ema balu lakohi ransu ho Ita ka lae? Ita halo buat ruma atu nuneʼe sira simu Ita ka lae? Saida mak Ita halo?
Tanba sira lakohi sai diferente. “Haʼu-nia inan-aman la fó lisensa ba haʼu atu kaer telemovel. Bainhira joven sira husu haʼu-nia númeru no haʼu hatete ba sira katak haʼu la iha telemovel, sira dehan ba haʼu: ‘Tebes! Ó tinan hira?’ Bainhira haʼu fó-hatene sira katak haʼu tinan 13, sira haree haʼu ho kasian.”—Mary.
HANOIN TOʼOK: Regra saida husi Ita-nia inan-aman halo Ita sente katak Ita la hanesan ho ema seluk? Saida mak Ita bele halo atu tahan situasaun neʼe?
Lakohi ema seluk atu haterus sira. “Labarik sira iha eskola la gosta labarik seluk neʼebé iha hahalok, jeitu koʼalia no relijiaun neʼebé la hanesan ho sira. Se Ita la hanesan ho ema seluk, ema nota kedas no sei haterus Ita.”—Olivia.
HANOIN TOʼOK: Ema haterus ona Ita tanba Ita la hanesan ho sira ka lae? Ita halo saida atu tahan situasaun neʼe?
Tanba sira lakohi lakon sira-nia belun sira. “Haʼu koko atu troka haʼu-nia an tuir grupu neʼebé haʼu ransu. Haʼu troka haʼu-nia dalan atu koʼalia hodi tuir sira. Haʼu hamnasa maski haʼu sente neʼe la komik. No kuandu grupu neʼe goza ema seluk haʼu mós goza ema neʼe, maski haʼu hatene neʼe hakanek nia.”—Rachel.
HANOIN TOʼOK: Ita sente katak importante atu kolega neʼebé tinan hanesan ho Ita gosta Ita ka lae? Dala ruma Ita troka Ita-nia hahalok ka dalan atu koʼalia hodi sira simu Ita ka lae?
Ita presiza hatene saida?
Bainhira Ita halo tuir ema seluk atu sira gosta Ita, neʼe bele halo sira la gosta Ita. Tanbasá? Tanba baibain ema hatene se Ita finje deʼit. Brian neʼebé tinan 20 hatete: “Bainhira haʼu finje sai hanesan ema seluk, ema la gosta haʼu liután. Haʼu aprende katak diʼak liu la finje tanba ema seluk hatene se Ita finje deʼit.”
DALAN DIʼAK LIU: Hanoin kona-ba saida mak importante liu. Bíblia hatete: “Buka-hatene loloos buat sira neʼebé importante liu.” (Filipe 1:10) Entaun husu ba Ita-nia an: ‘Saida mak importante liu, ema neʼebé iha morál la hanesan ho haʼu mak simu haʼu ka haʼu kaer metin ba hahalok neʼebé haʼu hatene mak loos?’
“Saugati deʼit atu koko sai hanesan ema seluk. Neʼe la book ema atu gosta Ita liután no neʼe mós la ajuda Ita sai ema neʼebé diʼak liután.”—James.
Koko atu sai hanesan ho ema seluk bele hanetik Ita atu hatudu sai Ita mak ema hanesan saida. Neʼe bele book Ita atu tuir deʼit ema seluk atu nuneʼe ema seluk gosta no simu Ita. Mane joven ida naran Jeremy hatete: “Uluk haʼu sempre prontu atu halo buat naran deʼit atu ema seluk simu haʼu, maski neʼe estraga haʼu-nia naran diʼak. Haʼu husik ema seluk kontrola haʼu-nia hahalok no dalan neʼebé haʼu koʼalia.”
DALAN DIʼAK LIU: Duké troka hela deʼit Ita-nia morál no hanoin tuir deʼit ema seluk, diʼak liu buka-hatene morál saida mak Ita hakarak moris tuir, no tuirmai kaer metin ba morál sira-neʼe. Iha razaun diʼak tanbasá Bíblia hatete: “Imi labele tuir deʼit ema-lubun.”—Éxodo 23:2
“Haʼu koko atu gosta buat hotu neʼebé sira gosta, inklui múzika, game, roupa, programa televizaun, makeup. Haʼu hakaʼas an atu sai hanesan ho sira. Haʼu hanoin, sira hatene katak haʼu finje deʼit. Haʼu hanoin ema hotu hatene haʼu finje deʼit, inklui haʼu. Ikusmai haʼu sente triste no mesamesak no haʼu la hatene ho loloos saida mak haʼu gosta no hanoin. Haʼu aprende katak Ita labele sai hanesan ema hotu neʼebé Ita hasoru no mós laʼós ema hotu sei gosta Ita. Labele rende an atu habelun ho ema, hanoin-hetan katak presiza tempu atu habelun ho ema no sai ema maduru.”—Melinda.
Koko atu sai hanesan ema seluk bele estraga hahalok diʼak. Mane joven ida naran Chris nota ida-neʼe kona-ba ninia primu. Chris hatete: “Haʼu-nia primu komesa halo buat neʼebé baibain nia nunka halo, hanesan uza droga. Nia sai toman atu uza droga no labele para. Neʼe besik atu estraga ninia moris.”
DALAN DIʼAK LIU: Lalika ransu ho ema neʼebé hatudu katak sira la iha morál neʼebé diʼak liuhusi sira-nia liafuan no hahalok. Bíblia hatete: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.”—Provérbios 13:20.
“Dala ruma diʼak atu hakaʼas an troka hodi ema seluk simu ita. Maibé nunka halo buat neʼebé la loos tan deʼit hakarak ema seluk atu simu Ita. Ema neʼebé bele sai belun diʼak sei simu Ita maski Ita la troka Ita-nia an atu sai hanesan ho sira.”—Melanie.
Sujestaun: Bainhira Ita koko atu hasoru ema foun no habelun ho sira, keta buka deʼit ema neʼebé gosta buat neʼebé hanesan ho Ita. Buka atu sai belun ho ema neʼebé iha morál no iha fiar hanesan ho Ita.
Roupa balu haree la jeitu bainhira Ita hatais. Nuneʼe mós dala ruma ema nia hahalok la ajuda Ita atu hatudu hahalok neʼebé diʼak