PERGUNTA HUSI JOVEN SIRA
Haʼu tenke habelun ho ema oioin ka lae?
“Haʼu toman ona ho haʼu-nia belun sira, no susar loos ba haʼu atu habelun ho ema barak liután.”—Alan.
“Haʼu iha belun diʼak balu, no haʼu gosta ida-neʼe. Haʼu sente susar atu koʼalia ho ema seluk neʼebé haʼu ladún koñese.”—Sara.
Ita sente hanesan Alan no Sara ka lae? Ita iha ona belun diʼak balu neʼebé Ita sempre ransu no sente susar hodi halo belun foun ka lae?
Se nuneʼe, informasaun neʼe bele ajuda Ita!
Problema kuandu sempre ransu deʼit ho belun diʼak sira
La sala atu sempre ransu ho belun diʼak sira. Ita sente kontente hamutuk ho Ita-nia belun sira, tanba sira simu Ita maski Ita iha fraku.
“Ita sente diʼak kuandu ema seluk gosta Ita no Ita sai parte husi grupu ida. Bainhira ita joven, ita hakarak ita-nia belun sira simu ita.”—Karen, 19.
Ita hatene ka lae? Jesus iha belun barak, inklui ninia apóstolu na’in-12, maibé husi ninia apóstolu sira, nia besik liu ho Pedro, Tiago, no João.—Marcos 9:2; Lucas 8:51.
Maibé, sempre ransu deʼit ho Ita-nia belun diʼak sira no la konvida ema seluk bele hamosu problema. Porezemplu:
Neʼe bele taka dalan atu habelun ho ema seluk neʼebé diʼak.
“Habelun deʼit ho ema neʼebé hanesan ho Ita, neʼe hanetik Ita atu hetan esperiénsia foun no habelun ho ema neʼebé diʼak.”—Evan, 21.
Neʼe bele halo ema haree Ita nuʼudar foti an.
“Bainhira Ita habelun ho ema balu deʼit, ida-neʼe bele halo ema seluk sente katak Ita lakohi koʼalia ho sira.”—Sara, 17.
Neʼe bele halo Ita hola parte hodi haterus ema seluk.
“Karik Ita rasik la fó terus ba ema seluk, maibé se Ita-nia belun diʼak sira halo nuneʼe, Ita sente ida-neʼe mak diʼak ka komik deʼit.”—James, 17.
Neʼe bele halo Ita hetan susar, liuliu se Ita prontu atu halo buat naran deʼit hodi sai parte nafatin iha grupu neʼe.
“Se ema ida deʼit husi Ita-nia grupu iha hahalok la diʼak, nia bele halo ita hotu monu ba sala.”—Martina, 17.
Buat neʼebé Ita bele halo
Analiza Ita-nia morál sira.
Husu Ita-nia an: ‘Ha’u hakarak moris tuir morál saida deʼit? Haʼu-nia belun sira halo susar ka fasil ba haʼu atu moris tuir haʼu-nia morál sira? Haʼu sei halo buat naran deʼit atu la lakon haʼu-nia belun sira-neʼe ka lae?’
Bíblia nia prinsípiu: “Ransu hamutuk ho ema aat sei estraga morál neʼebé diʼak”.—1 Korinto 15:33, nota-rodapé.
“Se Ita-nia belun sira la apoia Ita-nia morál sira, karik Ita sei halo hahalok aat neʼebé uluk Ita sei nunka halo.”—Ellen, 14.
Hanoin didiʼak kona-ba Ita-nia laran-metin.
Husu Ita-nia an: ‘Se haʼu-nia belun monu ba sala boot, haʼu sei husik haʼu-nia morál sira hodi la lakon haʼu-nia belun ka lae?
Bíblia nia prinsípiu: “Haʼu fó konsellu no dixiplina ba ema hotu neʼebé haʼu hadomi.”—Apokalipse 3:19.
“Se Ita-nia belun halo sala boot, no Ita laran-metin ba nia duké Jeová, karik Ita sente katak Ita tenke proteje Ita-nia belun hodi subar nia sala.”—Melanie, 22.
Habelun ho ema oioin.
Husu Ita-nia an: ‘Haʼu bele hetan benefísiu hodi habelun ho ema neʼebé haʼu ladún koñese ka lae?’
Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
“Karik problema iha família laran halo susar ba joven balu atu halo kolega. Se Ita koñese sira diʼak liután, baibain Ita sei hatene katak sira mak ema diʼak loos.”—Brian, 19.
Keta haluha: La sala hodi iha belun balu neʼebé Ita sente besik liu. Maibé, Ita bele hetan benefísiu hodi habelun ho ema oioin. Bíblia hatete: “Ema neʼebé fó kmaan ba ema seluk, nia rasik mós sei simu kmaan.”—Provérbios 11:25.