Haʼu bele tahan bainhira hasoru susar ka lae?

Ita bele tahan bainhira hasoru susar ka lae? Ita hasoru ona situasaun susar hanesan . . .

• ema neʼebé Ita hadomi mate?

• moras todan?

• dezastre naturais?

Peskizadór sira fó sai katak Ita presiza aprende atu tahan hasoru susar oioin, laʼós deʼit problema sira neʼebé boot. Loroloron Ita hasoru situasaun neʼebé bele halo Ita estrese no halo Ita moras. Tan neʼe importante atu aprende oinsá atu tahan hasoru problema sira maski problema mak kiʼik ka boot.

• Saida mak kbiit atu tahan hasoru susar?

• Tanbasá Ita presiza aprende atu tahan hasoru susar?

• Oinsá haʼu bele haburas kbiit atu tahan?

• Ita-nia kolega hanoin saida

Saida mak kbiit atu tahan hasoru susar?

Ema neʼebé iha kbiit atu tahan bele tahan hasoru mudansa sira no susar sira neʼebé akontese iha sira-nia moris. Maski sira mós hasoru problema neʼebé hanesan ho ema seluk, maibé sira bele manán hasoru sira-nia problema no ikusmai iha kbiit atu hasoru problema seluk tan.

Tanbasá Ita presiza aprende atu tahan hasoru susar?

• Tanba ema hotu hasoru problema sira. Bíblia hatete: “Laʼós ema neʼebé halai lalais mak sempre manán halai-taru, . . . laʼós ema neʼebé iha koñesimentu mak sempre hetan susesu, tanba tempu susar no situasaun neʼebé mosu derrepente deʼit kona sira hotu.” (Eclesiastes 9:11) Neʼe hanorin saida mai Ita? Ema diʼak mós hasoru problema, maski laʼós sira mak halo sala.

• Tanba kbiit atu tahan bele proteje Ita. Mestre ida neʼebé fó konsellu ba estudante iha eskola sekundária hatete: “Agora estudante barak mai hasoru haʼu no estrese tanba sira hetan valór neʼebé la diʼak ka ema koʼalia aat sira iha média sosiál.” Nia esplika katak maski problema sira-neʼe haree kiʼik deʼit, maibé se estudante sira la hatene oinsá atu tahan hasoru susar sira-neʼe, karik ikusmai sira bele kona moras mentál.a

• Tanba kbiit atu tahan bele ajuda Ita agora no kuandu Ita sai adultu. Dr. Richard Lerner hakerek kona-ba susar sira neʼebé ita hasoru: “Atu bele sai adultu neʼebé susesu, ita presiza aprende oinsá atu manán hasoru susar sira, halo planu foun no buka dalan foun atu kumpre ita-nia planu.”b

Oinsá haʼu bele haburas kbiit atu tahan?

• Iha hanoin neʼebé loos kona-ba Ita-nia problema sira. Aprende atu buka-hatene problema ida-neʼebé mak kiʼik deʼit no problema ida-neʼebé mak boot. Bíblia hatete: “Ema beik hatudu kedas ninia laran-hirus, maibé ema matenek haluha deʼit kuandu ema hamoe nia.” (Provérbios 12:16) Ita la presiza hanoin barak kona-ba problema hotu neʼebé Ita hasoru.

  “Haʼu-nia kolega eskola barak muramura kona-ba problema kiʼik sira hanesan problema sira-neʼe mak boot tebes. Tuirmai sira-nia belun iha média sosiál apoia sira no ida-neʼe halo sira sai estrese liután ho sira-nia problema. No ikusmai sira la hatene oinsá atu iha hanoin neʼebé loos kona-ba sira-nia problema.”—Joanne.

• Aprende husi ema seluk. Bíblia hatete: “Besi kadi ho besi bele sai kroʼat, nuneʼe mós ema ida bele halo kroʼat ninia belun.” (Provérbios 27:17) Ita bele aprende lisaun importante husi ema neʼebé tahan hasoru ona problema neʼebé susar.

  “Bainhira ita koʼalia beibeik ho ema seluk, ita bele hatene katak sira hasoru ona susar oioin. Sira liu ona susar sira-neʼe no agora sira diʼak hela. Koʼalia ho sira no buka-hatene oinsá sira bele tahan hasoru sira-nia situasaun susar.”—Julia.

• Hatudu pasiénsia. Bíblia hatete: “Maski karik ema laran-loos bele monu ba dala hitu, nia sei hamriik fali.” (Provérbios 24:16) Presiza tempu atu simu realidade katak dala ruma buat barak la tuir Ita-nia hakarak. Tan neʼe keta hakfodak se dala ruma Ita sente triste kona-ba Ita-nia situasaun. Maibé buat neʼebé importante mak Ita hakarak atu “hamriik fali”.

  “Bainhira ita hasoru susar ruma, ita sei sai laran-kraik no mós triste. No ita presiza tempu atu sai diʼak fali. Prosesu mak neʼe. Haʼu aprende katak nuʼudar tempu liu daudaun, ita bele komesa sente kontente fali.”—Andrea.

• Haburas agradese. Bíblia hatete: “Sempre hatudu agradese bá.” (Koloso 3:15) Maski Ita hasoru situasaun neʼebé susar tebes, maibé Ita bele sempre hatudu agradese kona-ba buat ruma. Hanoin kona-ba buat tolu iha Ita-nia moris neʼebé halo Ita kontente.

  “Bainhira ita hasoru susar, dala ruma fasil atu hatete: ‘Tanbasá neʼe akontese ba haʼu?’ Ema neʼebé bele tahan hasoru situasaun susar sei la kontinua hanoin kona-ba susar neʼebé sira hasoru. Sira iha hanoin pozitivu no hatudu agradese.”—Samantha.

• Hakaʼas an atu kontente ho buat neʼebé Ita iha. Apóstolu Paulo hatete: “Iha situasaun naran deʼit haʼu aprende ona atu sai kontente ho buat neʼebé haʼu iha.” (Filipe 4:11) Paulo labele kontrola susar sira neʼebé nia hasoru. Maibé nia bele kontrola buat neʼebé nia halo bainhira nia hasoru susar. Paulo hakaʼas an atu kontente ho buat neʼebé nia iha.

  “Haʼu rekoñese katak bainhira hasoru situasaun susar, haʼu sempre hanoin negativu. Tan neʼe, haʼu hakaʼas an atu sempre hanoin pozitivu kona-ba problema naran deʼit neʼebé haʼu hasoru. Neʼe lori rezultadu diʼak ba haʼu no mós ba ema seluk.”—Matthew.

• Halo orasaun. Bíblia hatete: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.” (Salmo 55:22) Ita halo orasaun laʼós tan deʼit hakarak atu sente diʼak bainhira estrese. Orasaun mak dalan atu koʼalia ho Kriadór neʼebé hanoin Ita.—1 Pedro 5:7.

  “Haʼu la presiza tahan hasoru susar sira mesak. Haʼu bele halo orasaun no koʼalia nakloke deʼit ba Maromak kona-ba haʼu-nia problema sira no mós hatudu agradese ba nia kona-ba buat diʼak neʼebé haʼu hetan. Hodi halo nuneʼe, haʼu la hanoin negativu tan no tau fokus ba buat diʼak neʼebé haʼu simu husi Maromak. Orasaun mak importante tebes.”—Carlos.