ESPLIKASAUN KONA-BA ESKRITURA
Génesis 1:1—“Horiuluk kedas Maromak kria lalehan no rai”
“Horiuluk kedas Maromak kria lalehan no rai.”—Génesis 1:1, Tradusaun Mundu Foun.
“Hahuu fo-foun, Maromak kria lalehan no rai.”—Jénesis 1:1, Bíblia Kadi Kapasidade.
Signifikadu husi Génesis 1:1
Eskritura neʼe fó sai lia-loos importante rua. Primeiru, “lalehan no rai”, ka universu iha ninia hahú. Segundu, Maromak mak kria buat sira-neʼe.—Apokalipse 4:11.
Bíblia la fó-hatene kona-ba horibainhira mak Maromak kria universu no oinsá nia kria. Maibé, Bíblia esplika katak Maromak kria universu ho “forsa neʼebé boot no ninia kbiit neʼebé kmanek”.—Isaias 40:26.
Liafuan neʼebé tradús nuʼudar “kria” mai husi liafuan verbu Ebraiku nian neʼebé uza deʼit ba Maromak.a Iha Bíblia só Maromak Jeováb deʼit mak temi nuʼudar Kriadór.—Isaias 42:5; 45:18.
Kontestu husi Génesis 1:1
Neʼe mak versíkulu primeiru kona-ba kriasaun neʼebé fó sai iha Génesis kapítulu 1 no 2. Génesis 1:1 toʼo 2:4 konta ho liafuan simples kona-ba saida deʼit mak Maromak halo bainhira nia kria mundu no buat hotu iha mundu neʼe, inklui mane no feto primeiru. Depois neʼe, Bíblia esplika liután kona-ba oinsá mak Maromak kria mane no feto.—Génesis 2:7-25.
Tuir livru Génesis, Maromak kria buat oioin durante “loron” neen. Maibé neʼe laʼós loron ida oras 24, tuir loloos neʼe mak tempu naruk neʼebé ema ida la hatene. Bíblia temi liafuan “loron” atu refere ba tempu naruk liu, laʼós oras 24 deʼit. Porezemplu, Génesis 2:4 uza liafuan “loron” atu refere ba “tempu”, no temi loron neen kriasaun nian nuʼudar “loron” ida deʼit.
Hanoin neʼebé sala kona-ba Génesis 1:1
Hanoin neʼebé sala: Maromak kria universu neʼe tinan rihun balu liubá.
Faktu: Bíblia la hatete kona-ba horibainhira mak universu neʼe kria. Liafuan iha Génesis 1:1 la kontra ho buat neʼebé sientista sira hanoin kona-ba universu, katak universu neʼe iha tinan biliaun ba biliaun ona.c
Hanoin neʼebé sala: Génesis 1:1 hatudu katak Maromak mak trindade, tanba liafuan “Maromak” iha versíkulu neʼe mak plurál.
Faktu: Liafuan Ebraiku ‘Elohim’ neʼebé tradús nuʼudar “Maromak” iha versíkulu neʼe mak plurál. Maibé neʼe atu hatudu kona-ba pozisaun boot ka kmanek liu, laʼós atu hatudu kona-ba naʼin-hira. Livru New Catholic Encyclopedia mós hatete katak maski liafuan Elohim iha Génesis 1:1 mak plurál, maibé “verbu neʼebé tuir liafuan neʼe mak sempre singulár, neʼe hatudu ninia pozisaun boot laʼós kona-ba naʼin-hira”.—Segundu Edisaun, Volume 6, pájina 272.
Lee Génesis kapítulu 1 hamutuk ho esplikasaun husi nota-rodapé no referénsia marjinál.
a Liafuan “kria” iha Génesis 1 tradús husi liafuan Ebraiku bara. Livru Pengantar Perjanjian Lama: Taurat dan Sejarah hatete: “Liafuan neʼe atu hatudu serbisu úniku neʼebé la hanesan ho ema nia serbisu . . . kapítulu neʼe konta kona-ba serbisu neʼebé só Maromak deʼit mak bele halo.”—Volume 1, pájina 122, husi W.S. LaSor, D.A. Hubbard, no F.W. Bush.
b Jeová mak Maromak nia naran rasik.—Salmo 83:18.
c Livru The Expositor’s Bible Commentary mós hatete katak liafuan Ebraiku “horiuluk kedas” la hatudu kona-ba tempu hira.—Edisaun Revizaun, Volume I, pájina 51.