Números 6:24-26—“NAʼI haraik bensaun ba imi no tau matan ba imi”

“Jeová sei haraik bensaun ba imi no proteje imi. Jeová sei hatudu laran-sadiʼa ba imi, no nia sei simu imi. Jeová sei hateke ba imi ho laran-diʼak no haraik dame ba imi.”—Números 6:24-26, Tradusaun Mundu Foun.

“NAI haraik bensaun ba imi no tau matan ba imi, NAI halo ninia oin leno ba imi no hatudu grasa ba imi, NAI fila nia oin ba imi no haraik dame ba imi.”—Númeru 6:24-26, Bíblia Kadi Kapasidade.

Signifikadu husi Números 6:24-26

Ema temi eskritura sira-neʼe nuʼudar amlulik nia liafuan bensaun, ka bensaun husi Arão, amlulik boot primeiru husi nasaun Izraél. (Éxodo 28:1) Liafuan sira-neʼe mai husi Maromak. (Números 6:22, 23) Maromak dehan ba Moisés: “Hatete ba Arão no ninia oan-mane sira: ‘Imi tenke haraik bensaun ba povu Izraél hanesan tuirmai neʼe.’” Depois, Maromak fó sai liafuan neʼebé hakerek iha Números 6:24-26. Amlulik sira neʼebé laran-metin halo tuir Maromak nia mandamentu neʼe. Sira mós hahiʼi Maromak nia naran Jeová.a Iha versíkulu 27, Maromak dehan: “Sira [amlulik sira] tenke temi haʼu-nia naran hodi fó bensaun ba povu Izraél, atu nuneʼe haʼu sei haraik bensaun ba sira.”

“Jeová sei haraik bensaun ba imi no proteje imi.” Jeová haraik bensaun ba ninia atan sira hodi proteje sira, dirije sira, no halo sira moris kontente. (Provérbios 10:22) Iha lian orijinál, liafuan “imi” iha Números 6:24-26 mak liafuan singulár. Karik neʼe hatudu katak Maromak hakarak atu fó bensaun ba ema Izraél ida-idak, laʼós deʼit ba nasaun Izraél tomak nuʼudar grupu.

“Jeová sei hatudu laran-sadiʼa ba imi, no nia sei simu imi.” Iha lian orijinál, fraze neʼe tradús nuʼudar “Jeová sei halo ninia oin nabilan ba imi”, neʼe mak liafuan atu husu ba Maromak hodi hatudu laran-diʼak no laran-sadiʼa.b Fraze neʼe bele mós tradús nuʼudar: “NAʼI hatudu oin-midar ba imi.” (Números 6:25, New International Reader’s Version) Jeová simu ninia povu hodi hanoin sira, no hatudu laran-diʼak no laran-sadiʼa ba sira.—Isaias 30:18.

“Jeovác sei hateke ba imi ho laran-diʼak no haraik dame ba imi.” Jeová “hateke”, ka “fila nia oin” ba ninia atan sira hodi tau atensaun ba sira ho domin no haraik dame ba sira. Tuir livru referénsia ida neʼebé esplika kona-ba Bíblia, “liafuan Ebraiku shalom neʼebé tradús nuʼudar dame la refere deʼit ba kondisaun neʼebé la iha konflitu, maibé refere ba situasaun diʼak no kompletu iha dalan fíziku no espirituál”.

Atu hetan bensaun hanesan hakerek iha eskritura sira-neʼe, ema Izraél presiza halo tuir Jeová. (Levítico 26:3-6, 9) Bainhira sira halo tuir, Jeová kumpre duni ninia promesa. Porezemplu, iha Liurai Salomão nia tempu no Liurai Ezequias nia tempu, povu hetan bensaun no moris kontente ho dame.—1 Reis 4:20, 25; 2 Krónikas 31:9, 10.

Maski Maromak la haruka ema Kristaun atu dekór ka repete eskritura sira-neʼe, maibé ita bele fó sai sentimentu neʼebé atu hanesan kuandu halo orasaun ba Maromak kona-ba ema seluk ka kuandu enkoraja maluk Kristaun sira. (1 Tesalónika 5:11, 25) Jeová la troka ninia hahalok. Nia sempre hakarak atu fó bensaun no proteje ninia atan sira neʼebé laran-metin. Tan neʼe, ema Kristaun neʼebé loos mós bele sente dame iha laran tanba hatene katak Jeová simu sira no “halo ninia oin nabilan” ba sira.

Kontestu husi Números 6:24-26

Kapítulu ida toʼo sanulu husi livru Números fó sai Maromak nia lia-menon ba ema Izraél bainhira sira hela besik Foho Sinai iha dalan atu bá rai neʼebé Maromak promete nanis ona. Durante maizumenus tinan ida neʼebé sira iha Foho Sinai nia okos, Jeová organiza sira atu forma nasaun ida no fó sira ukun-fuan neʼebé sai parte iha aliansa Ukun-Fuan.

Jeová mós fó-hatene ba Moisés kona-ba oinsá mak Arão no ninia oan sira neʼebé sai nuʼudar amlulik sei haraik bensaun ba ema Izraél. (Números 6:22, 23) Tuirmai, Arão no ninia oan sira temi liafuan iha Números 6:24-26 atu haraik bensaun ba nasaun Izraél. Ikusmai, temi liafuan sira-neʼe mak sai hanesan tradisaun ida, no loron-loron amlulik ida hatoʼo liafuan bensaun neʼe bainhira sira hasaʼe hotu ona sakrifísiu loroloron nian iha templu.

Haree vídeo badak neʼe hodi komprende kona-ba livru Números.