Prodús vídeo sira ba Reuniaun Boot “Haksolok nafatin bá”! tinan 2020

Vídeo sira neʼebé fó sai durante ita-nia reuniaun boot book ita-nia laran no ajuda ita komprende liután Bíblia nia hanorin. Reuniaun Boot “Haksolok nafatin bá”! tinan 2020 iha vídeo hamutuk 114, neʼe inklui diskursu 43 neʼebé membru sira husi Grupu Administradór no mós sira-nia ajuda-naʼin mak hatoʼo. Prosesu atu prodús vídeo sira-neʼe laʼo oinsá no presiza osan hira atu halo vídeo sira-neʼe?

Maizumenus irmaun-irmán naʼin-900 husi mundu tomak kontribui sira-nia tempu no matenek atu ajuda halo vídeo sira-neʼe. Durante tinan rua liu, sira uza maizumenus oras 100.000 atu halo projetu neʼe. Ida-neʼe inklui mós oras 70.000 neʼebé sira uza atu halo vídeo drama Neemias: ‘Jeová nia ksolok mak ita-nia fatin seguru’, vídeo neʼe laʼo ba minutu 76.

Klaru katak presiza osan barak atu bele tau matan ba irmaun-irmán voluntáriu sira-neʼe nia presiza. No presiza mós osan atu selu tékniku, ekipamentu no buat sira seluk.

Irmaun Jared Gossman neʼebé serbisu iha Departamentu Serbisu Áudio/Vídeo hatete: “Komisaun Hanorin nian husi Grupu Administradór hakarak tebes atu hatudu sai kultura no fatin oioin iha ita-nia vídeo sira. Sira hakarak ita atu haree katak ita iha irmaun-irmán sira iha mundu tomak. Tan neʼe atu bele kumpre ida-neʼe, ekipa 24 husi nasaun 11 serbisu hamutuk atu halo projetu neʼe. Entaun presiza osan barak, halo planu didiʼak no serbisu hamutuk atu irmaun-irmán iha mundu tomak bele halaʼo projetu neʼe.”

Ami presiza ekipamentu espesiál no fatin atu bele halo vídeo barak. Porezemplu, fatin sira neʼebé Ita haree iha vídeo drama Neemias: ‘Jeová nia ksolok mak ita-nia fatin seguru’ mak harii iha estúdiu iha Mount Ebo besik Patterson, Novaiorke, Estadus Unidus. Ami hakarak uza ho didiʼak osan kontribuisaun neʼebé ema fó hodi halo fatin sira-neʼe haree hanesan duni ho istória. Tan neʼe irmaun sira harii fatin tuir Jeruzalein nia moru sira iha tempu uluk hodi uza materiál neʼebé kmaan. Moru ida-idak halo husi ai neʼebé aas metru neen no taka tomak ho esponja no tuirmai pinta ho kór neʼebé atu haree hanesan fatuk. Irmaun sira bele muda “moru” sira-neʼe no bele uza fali ida-neʼe iha tempu seluk. Hodi halo nuneʼe, neʼe hamenus “moru” sira neʼebé presiza harii. Maski nuneʼe, atu harii deʼit fatin sira ba vídeo drama neʼe gasta osan maizumenus dolar 100.000.a

Hodi hatene liután kona-ba oinsá irmaun sira-nia preparasaun atu halo vídeo sira-neʼe, neʼe book Ita atu hafolin liután vídeo sira ba reuniaun boot ba tinan neʼe. Ami fiar katak ema hotu nia hakaʼas an atu halo hotu projetu neʼe sei lori glória ba Jeová iha mundu tomak. Obrigada barak ba imi-nia kontribuisaun neʼebé imi fó ho laran-luak liuhusi donate.jw.org no mós liuhusi dalan seluk.